ക്രീമിയായ ഗ്രേവിയിൽ തയ്യാറാക്കുന്ന ഒരു ഉത്തരേന്ത്യൻ വിഭവമാണ് പനീർ പസന്ദ. സാധാരണ പനീർ കറികളിൽ നിന്നും തികച്ചും വ്യത്യസ്തമായ രുചിയാണ് ഈ വിഭവത്തിനുള്ളത്.
ആവശ്യമായ ചേരുവകൾ
1. പനീർ –150 ഗ്രാം
2. പനീർ പൊടിച്ചത് – 30 ഗ്രാം
കശുവണ്ടിപ്പരിപ്പ് – 10 ഗ്രാം
ഉണക്കമുന്തിരി – അഞ്ചു ഗ്രാം
പച്ചമുളക് – ഒന്ന്, അരിഞ്ഞത്
ഉപ്പ് – പാകത്തിന്
പഞ്ചസാര – ഒരു നുള്ള്
3. മൈദ – രണ്ടു ചെറിയ സ്പൂൺ
കോൺഫ്ളോർ – ഒരു വലിയ സ്പൂൺ
ഉപ്പ് – പാകത്തിന്
വെള്ളം – രണ്ടു വലിയ സ്പൂൺ
4. എണ്ണ – 100 മില്ലി
വെണ്ണ – ഒരു വലിയ സ്പൂൺ
5. ബേ ലീഫ് – ഒന്ന്
ഏലയ്ക്ക – രണ്ട്
ഗ്രാമ്പൂ – രണ്ട്
6. സവാള – ഒന്ന്, പൊടിയായി അരിഞ്ഞത്
7. ഇഞ്ചി – വെളുത്തുള്ളി പേസ്റ്റ് – രണ്ടു ചെറിയ സ്പൂൺ
പച്ചമുളക് – ഒന്ന്, അരിഞ്ഞത്
8. മഞ്ഞൾപ്പൊടി – കാൽ ചെറിയ സ്പൂൺ
കശ്മീരി മുളകുപൊടി – കാൽ ചെറിയ സ്പൂൺ
ഉപ്പ് – പാകത്തിന്
9. കശുവണ്ടിപ്പരിപ്പ് അരച്ചത് – ഒരു വലിയ സ്പൂൺ
പാൽ – 100 മില്ലി
10. ഫ്രെഷ് ക്രീം – 25 ഗ്രാം
കസൂരി മേത്തി – ഒരു നുള്ള്
ഗരംമസാലപ്പൊടി – ഒരു നുള്ള്
11. ക്രീം – അലങ്കരിക്കാൻ
പാകം ചെയ്യുന്ന വിധം
∙ പനീർ സ്ലാബുകൾ ഒരറ്റം വിട്ടുപോകാതെ മെല്ലേ കീറി പോക്കറ്റ് പോലെയാക്കണം.
∙ രണ്ടാമത്തെ ചേരുവ യോജിപ്പിച്ചു കീറി വച്ച പനീറിനുള്ളിൽ നിറച്ച് അമർത്തി വയ്ക്കണം.
∙ മൂന്നാമത്തെ ചേരുവ യോജിപ്പിച്ചു തയാറാക്കിയ മാവിൽ പനീർ സ്ലാബുകൾ മുക്കി ചൂടായ എണ്ണയിലിട്ടു ഗോൾഡൻ ബ്രൗൺ നിറത്തിൽ വറുത്തു കോരുക.
∙ പാനിൽ എണ്ണയും വെണ്ണയും ചൂടാക്കി അഞ്ചാമത്തെ ചേരുവ ചേർത്തു മൂപ്പിച്ച ശേഷം സവാള ചേർത്തു വഴറ്റുക.
∙ സവാള വാടുമ്പോൾ ഏഴാമത്തെ ചേരുവ ചേർത്തു നന്നായി വഴറ്റണം.
∙ ഇതിലേക്ക് എട്ടാമത്തെ ചേരുവ ചേർത്തിളക്കി അൽപം വെള്ളവും തളിച്ചു വഴറ്റണം.
∙ മസാല മൂത്ത മണം വരുമ്പോൾ കശുവണ്ടിപ്പരിപ്പ് അരച്ചതും പാലും ചേർത്തിളക്കി മയപ്പെടുത്തണം.
∙ ഇതിലേക്കു പത്താമത്തെ ചേരുവ ചേർത്തിളക്കി ഗ്രേവിയാക്കി വാങ്ങുക.
∙ ഇതിലേക്കു പനീർ മെല്ലേ വച്ചു, ക്രീം കൊണ്ട് അലങ്കരിച്ചു വിളമ്പാം.