മൂക്കുത്തി അഴകിൽ ആൺ സൗന്ദര്യം: കുത്തും മുൻപും ശേഷവും ഇക്കാര്യങ്ങൾ ശ്രദ്ധിക്കാം... അണുബാധ വരാതെ നോക്കാം... Essential Dos and Don'ts of Nose Piercing for Men

ചരിത്രം പരിശോധിച്ചാൽ ‘മൂക്കുകുത്തൽ നമുക്ക് അറിയാത്ത കാര്യമൊന്നുമല്ലല്ലോ’ എന്ന് ബേബി മോളുടെ ടോണിൽ നമുക്ക് പറയേണ്ടി വരും. ഫഹദ് ഫാസിൽ മൂക്കുകുത്തിയ പരസ്യം വരുന്നതിനും എത്രയോ മുൻപേ മുക്കു കുത്തൽ ഇവിടെ സാധാരമാണ്. എന്നാൽ ആണുങ്ങളുടെ മൂക്കു കുത്തലിനു പിന്നിലെ ചില കേശവൻമാമൻമാരുടെ ‘വൈക്ലബ്യം’ കുറയ്ക്കൻ ഫദഹിനെ പോലൊരാൾ അതു ചെയ്യുന്നതു കാണുന്ന കാഴ്ച്ച സഹായിക്കും എന്നതിൽ തർക്കമില്ല താനും.

ആണുങ്ങളുടെ മൂക്കുത്തി ചരിത്രം പരിശോധിച്ചാൽ 4000–5000 വർഷം മുൻപേ തൊട്ട് മൂക്കുത്തിയിട്ട ആൺമുഖങ്ങൾ മിഡിൽ ഈസ്റ്റിൽ കാണാം.. യുദ്ധവീര്യവും വർഗ ബോധവും കാണിക്കാനായി ഓസ്ട്രേലിയിലും നോർത്ത് അമേരിക്കയിലുമൊക്കെ സെപ്റ്റം പിയേഴ്സിങ്ങ് വ്യാപകമായി നിലനിന്നിരുന്നു....

ചരിത്രത്തിൽ നിന്ന് ഇന്നിലേക്ക് പറന്നിറങ്ങിയാൽ ഇന്നിപ്പോ ‘ജൻഡർ’ എന്നൊരു അതിരില്ലാതെ ഫാഷനും ട്രെന്റും ഒക്കെ എല്ലാവരിലേക്കും എത്തുന്ന കാഴ്ച്ചയാണ് മുന്നിൽ. അക്കൂട്ടത്തിൽ മുൻപന്തിയിസായി തന്നെ ആണുങ്ങളുടെ മൂക്കു കുത്തലുണ്ട്. മൂക്കു കുത്തും മുൻപും പിൻപും ശ്രദ്ധിക്കേണ്ട ചില കാര്യങ്ങൾ അറിയാം...

മൂക്കുകുത്തും മുൻപ്

∙ കൃത്യമായ ആരോഗ്യ സർട്ടിഫിക്കേഷനുകൾ ഉള്ളയിടത്തു നിന്ന് മാത്രം മൂക്കു കുത്താൻ ശ്രമിക്കുക.

. മുക്കു കുത്തിയായിടുന്ന ലോഹത്തോട് അലർജിയില്ലെന്ന് ഉറപ്പു വരുത്തുക. കഴിവതും ടൈറ്റാനിയം, സ്വണം പോലുള്ള അലർജിയുണ്ടാക്കാത്ത തരം ലോഹമൂക്കൂത്തി ഉപയോഗിക്കുന്നതാണ് നല്ലത്. അടുത്തുള്ളൊരാൾക്ക് ഇന്ന ലോഹം അലർജിയുണ്ടാക്കിയില്ല എന്നത് നിങ്ങൾക്കുണ്ടാക്കില്ല എന്നതിനുള്ള ഉറപ്പല്ലെന്ന് ഓർക്കാം. 

∙ മൂക്കുകുത്തി പുറമേ ഉണങ്ങാൻ വലിയ സമയം എടുക്കില്ലെങ്കിലും ഉണ്ടാകുന്ന മുറിവ് പൂർണമായി ഉണങ്ങാൻ ഏതാണ് 4–6 മാസമോ അതിൽ കൂടുതലോ വേണ്ടിവന്നേക്കാം എന്ന ബോധ്യം വേണം.

∙ കണ്ണട ഉപയോഗിക്കുന്ന ആളാണെങ്കിൽ മൂക്കു കുത്തുമ്പോൾ അതിനനുസരിച്ചുള്ള ഡിസൈനിലുള്ള മൂക്കൂത്തി മുൻകൂട്ടി തീരുമാനിച്ചുറപ്പിക്കാം. ഇതു കൂടാതെ എവിടെ കുത്തണം എന്നും കണ്ണടയുടെ വലിപ്പവും മറ്റും നോക്കി തീരുമാനിക്കാം.

കുത്തി കഴിഞ്ഞും വേണം ശ്രദ്ധ

∙ ഉപ്പു വെള്ളം കൊണ്ട് ആ ഭാഗം ഇടയ്ക്ക് വൃത്തിയാക്കാം. സ്പിരിറ്റോ വീര്യം കൂടിയ സോപ്പോ അവിടെ തേച്ചിട്ടുള്ള വൃത്തിയാക്കൽ ഒഴിവാക്കുക.

∙ ഇടയ്ക്കിടെ മൂക്കുത്തി തൊട്ട് നോക്കുന്നതും തിരിക്കുന്നതും ഒഴിവാക്കാം.. കുത്തിയ ഉടനെ തന്നെ വേറെ മൂക്കൂത്തി മാറ്റിയിടാതിരിക്കാം, അണുബാധ വരാതെ നോക്കാം.

∙ മുറിവുണങ്ങുന്ന സമയത്ത് നീന്തൽ കഴിവതും ഒഴിവാക്കുക.

∙ ഉടുപ്പിടുമ്പോഴും ഊരുമ്പോഴും തല തുവർത്തുമ്പോഴും മുഖം തുടയ്ക്കുമ്പോഴും ഒക്കെ ശ്രദ്ധിക്കുക. ടവൽ തട്ടി മൂക്കൂത്തി ഇളകാതെ നോക്കാം.

∙ മെയ്ക്കപ്പ്, സൺസ്ക്രീൻ, പൗഡർ മുതലായവ മുറിവുണങ്ങും വരെ മൂക്കിനടുത്തേക്ക് ഇടാതിരിക്കാം..

∙ കണ്ണടയും മറ്റും എപ്പോഴും മൂക്കുത്തിയിൽ തട്ടി ഇരിക്കാതെ നോക്കാം.

∙ എന്തെങ്കിലും അസ്വസ്ഥത തോന്നിയാൽ മടിക്കാതെ ഡോക്ടറെ കാണുക.