വിവാഹിതയാവാന്‍ പോകുന്നുവെന്ന സന്തോഷ വാര്‍ത്ത പങ്കുവച്ച് നടിയും അവതാരകയുമായ ആര്യ. ഡിജെ സിബിന്‍ ബെഞ്ചമിനാണ് വരന്‍. സിബിനൊപ്പമുള്ള ഫോട്ടോയും കുറിപ്പും പങ്കുവച്ചാണ് മംഗളകാര്യത്തെ കുറിച്ച് ആര്യ പങ്കുവച്ചത്. ഇതോടെ നിരവധിപേര്‍ ഇരുവര്‍ക്കും ആശംസകളുമായി എത്തി.
"ഉറ്റസുഹൃത്തുക്കളിൽ നിന്ന് ജീവിത പങ്കാളികളിലേക്ക്... ലളിതമായ ഒരു ചോദ്യത്തിലൂടെയും എന്റെ ഇതുവരെയുള്ള ജീവിതത്തിൽ എടുത്തിട്ടുള്ളതിൽ വച്ച് ഏറ്റവും വേഗത്തിലുള്ള തീരുമാനം. ജീവിതം അവിശ്വസനീയവും മനോഹരവുമായ വഴിത്തിരിവില്‍ എത്തിനില്‍ക്കുകയാണ്. എന്റെ ജീവിതത്തില്‍ പ്ലാനിങ് ചെയ്യാത്ത ഏറ്റവും നല്ല കാര്യമാണിതെന്ന് നിസ്സംശയം പറയാം.
എല്ലാ സമയത്തും ഞങ്ങൾ ഒരുമിച്ച് ഉണ്ടായിരുന്നു. നല്ലകാലത്തും ചീത്ത കാലത്തും. എന്നാൽ ജീവിതകാലം മുഴുവനും ഒരുമിച്ചായിരിക്കുമെന്ന് ഒരിക്കലും കരുതിയിരുന്നില്ല. എനിക്ക് ഏറ്റവും വലിയ പിന്തുണ നല്‍കിയതിലും, എല്ലാ പ്രശ്നങ്ങളിലും സമാധാനം നൽകിയതിനും, സമാധാനത്തോടെ എനിക്ക് ചാരാനുള്ള തോളായതിനും, നമ്മുടെ മകൾക്ക് ഏറ്റവും നല്ല അച്ഛനായതിനും നന്ദി. എന്റെയും ഖുഷിയുടേയും ഏറ്റവും നല്ല സുഹൃത്തായതിനും ഞങ്ങളുടെ കുടുംബത്തിന് ശക്തിയായതിനും നന്ദി.
ഒടുവിൽ ഞാൻ പൂർണത അനുഭവിക്കുകയാണ്. എന്റെ മനസ് സന്തോഷം കണ്ടെത്തി. നിന്റെ കൈയ്ക്കുള്ളിൽ ഞാനെന്റെ വീട് കണ്ടെത്തി. എന്റെ ശരിയായ സമയത്ത് ശരിയായ വ്യക്തിയെ കണ്ടുമുട്ടി. ഖുഷിയുടെ പ്രിയപ്പെട്ട വ്യക്തിയെ കണ്ടെത്തി. അവളിപ്പോൾ ഡാഡി എന്നാണ് വിളിക്കുന്നത്. ഞാൻ എന്നെന്നും നിന്നെ സ്നേഹിക്കുന്നു. എന്റെ കുറവുകളും പൂർണതയും മനസിലാക്കി നിങ്ങളുടേതാക്കിയതിന് നന്ദി. എന്തൊക്കെ വന്നാലും എന്റെ അവസാന ശ്വാസം വരെ ഞാൻ നിന്നെ മുറുകെ പിടിക്കും. അതെന്റെ ഉറപ്പാണ്"- ആര്യ കുറിച്ചു.
ജീവിതത്തിൽ പലതവണ തെറ്റായ തീരുമാനങ്ങൾ എടുത്തിട്ടുണ്ടെന്നും എന്നാല്‍ ഏതു കൊടുംങ്കാറ്റിലും തനിക്കൊപ്പം നിന്നത് ആര്യയാണെന്നും സിബിന്‍ കുറിച്ചു. 'യഥാർത്ഥത്തിലുള്ള എന്നെ അവൾ കണ്ടു, എന്റെ എല്ലാ പോരായ്മകളും സ്വീകരിച്ചു, അവളോടൊപ്പം എപ്പോഴും സുരക്ഷിതത്വവും എന്റെ സ്വത്വവും അനുഭവപ്പെട്ടു. അതിനാലാണ് ഞാൻ ജീവിതത്തിൽ എറ്റവും എളുപ്പത്തിൽ ഒരു തീരുമാനമെടുത്തത്— അവളുടെ കൂടെയാകാൻ, അവളെ സ്നേഹിക്കാൻ, സംരക്ഷിക്കാൻ, ചേർന്ന് വളരാൻ.'- സിബിന്‍ കുറിച്ചു.
