ഈ 8 മാറ്റങ്ങളെ അവഗണിക്കരുത്: ശരീരം മുൻപേ കാണിച്ചു തരും കാൻസർ സൂചനകൾ Recognizing Potential Signs of Cancer

അർബുദം കണ്ടെത്തുവാൻ വൈകിപ്പോകുമ്പോഴാണ് അത് മാരകവും ജീവന് ആപത്തുമുണ്ടാക്കുന്നതും ആകുന്നത്. മിക്ക അർബുദങ്ങളിലും ആരംഭഘട്ടത്തിൽ തന്നെ ശരീരം ചില സൂചനകളോ ലക്ഷണങ്ങളോ കാണിച്ചുതരും. ഒാരോ അർബുദത്തിനും പ്രത്യേകമായുള്ള ചില ലക്ഷണങ്ങളുണ്ട്. കൂടാതെ അർബുദം കാരണം വരാവുന്ന ചില പൊതുസൂചനകളും ലക്ഷണങ്ങളുമുണ്ട്. ഈ സൂചനകളെയും ലക്ഷണങ്ങളെയും തിരിച്ചറിഞ്ഞ് കാൻസർ അല്ല എന്നുറപ്പാക്കുകയാണ് നമ്മൾ ചെയ്യേണ്ടത്. െപാതുസൂചനകളുടെ കാര്യം ആദ്യം പറയാം. പ്രത്യേകം ഒാർമിക്കേണ്ട കാര്യം ഇവ നിശ്ചയമായും അർബുദലക്ഷണങ്ങളാണ് എന്നർഥമില്ല എന്നാണ്. മറ്റു ചില രോഗങ്ങളുടെ സൂചനയായും വരാം.

∙  കാരണമൊന്നുമില്ലാതെ ഭാരം കുറയുക

അർബുദരോഗികളിൽ പൊതുവായി കാണുന്ന ഒരു ലക്ഷണമാണ് ഭാരം കുറയൽ. 31 മുതൽ 87 ശതമാനം വരെ കാൻസർ രോഗികളിലും അകാരണമായ ഭാരം കുറയൽ ഉണ്ടാകുന്നതായി റിപ്പോർട്ടുകളുണ്ട്. എന്തുകൊണ്ട് അർബുദരോഗികളിൽ ഭാരം കുറയുന്നു എന്നു ചിന്തിച്ചിട്ടുണ്ടോ? അതിന്റെ പ്രധാനകാരണം കാൻസർ കോശങ്ങൾ പെരുകി വ്യാപിച്ച് ആരോഗ്യമുള്ള കോശങ്ങളെ ഞെരുക്കുന്നതു കാരണം ധാരാളമായി ഊർജം എരിച്ചുകളയുന്നതാണ്. മറ്റൊരു കാരണം അർബുദം കാരണം വിശപ്പു കുറയുന്നതാണ്. ഭക്ഷണത്തെ വിഘടിപ്പിച്ച് ഊർജമാക്കി മാറ്റുന്ന പ്രക്രിയയിൽ വരുന്ന മാറ്റങ്ങളും രുചി നഷ്ടപ്പെടുന്നതുമൊക്കെ കൊണ്ടു വിശപ്പു നഷ്ടമാകാം. ചവയ്ക്കുന്നതിലെയും വിഴുങ്ങുന്നതിലെയും ബുദ്ധിമുട്ടുകൾ കൊണ്ടും ഭക്ഷണം കഴിക്കൽ കുറയാം. ഇതൊക്കെ ഭാരനഷ്ടത്തിനിടയാക്കാം. ഭക്ഷണത്തിൽ നിന്നും പോഷകങ്ങൾ ആഗിരണം ചെയ്യുന്നതിലെ പ്രശ്നം കാരണവും ഭാരം കുറയാം. ശ്വാസകോശ കാൻസർ, അന്നനാള–ആമാശയ കാൻസർ, പാൻക്രിയാറ്റിക് കാൻസർ, കരൾ കാൻസർ എന്നീ അർബുദങ്ങളിലാണ് ഭാരനഷ്ടം സാധാരണയായി കാണുന്നത്.

∙ കടുത്ത ക്ഷീണം

അർബുദമുള്ള 80–100 ശതമാനം പേരിലും സാധാരണമായി കാണുന്നൊരു ലക്ഷണമാണ് ക്ഷീണം. അർബുദം കാരണം ശരീരത്തിലുണ്ടാകുന്ന പലതരം മാറ്റങ്ങൾ കടുത്ത ക്ഷീണത്തിനും ഊർജമില്ലായ്മയ്ക്കുമൊക്കെ കാരണമാകാം. ഉദാഹരണത്തിനു ചിലതരം അർബുദങ്ങളിൽ സൈറ്റോകൈനുകൾ എന്നു പേരായ പ്രോട്ടീനുകൾ പുറപ്പെടുവിക്കും. ഇവ ക്ഷീണത്തിനു കാരണമാകാം. സാധാരണ ജീവിതത്തിൽ നമുക്ക് അനുഭവപ്പെടുന്ന ക്ഷീണം പോലെയല്ല ഇത്. ഇരിക്കുന്നിടത്തു നിന്ന് എഴുന്നേറ്റ് ഒരു ചുവട് വയ്ക്കാൻ പോലും പ്രയാസമാകും. വിശ്രമം കൊണ്ടു ചെറിയൊരു ആശ്വാസമുണ്ടാകുമെങ്കിലും ക്ഷീണം മാറില്ല. നിത്യവും ചെയ്യുന്ന പ്രവർത്തികൾ പോലും ചെയ്യാൻ സാധിക്കാതെ വരും.

∙ മലവിസർജനത്തിലെ വ്യത്യാസങ്ങൾ

വയറിളക്കവും മലബന്ധവുമാണ് അർബുദവുമായി ബന്ധപ്പെട്ടു വരുന്ന പ്രധാനപ്പെട്ട ശോധനാപ്രശ്നങ്ങൾ. വൻകുടൽ അർബുദത്തിന്റെ ആദ്യ സൂചനകളിലൊന്നാണു മലശോധനയിലെ വ്യത്യാസങ്ങൾ. വീതികുറഞ്ഞു പെൻസിൽ പോലെ മലം പോവുക, മലവിസർജനസമയത്ത് വേദനയെടുക്കുക, എത്ര ശ്രമിച്ചിട്ടും വയറ്റിൽ നിന്നും പൂർണമായി പോയില്ലെന്ന അവസ്ഥ, മലദ്വാരത്തിൽ നിന്നും രക്തം വരിക എന്നീ ശോധനാപ്രശ്നങ്ങൾ കാണാം.

∙ ഉണങ്ങാത്ത മുറിവുകൾ, വ്രണങ്ങൾ–

സ്തനാർബുദം, തലയിലെയും കഴുത്തിലെയും അർബുദങ്ങൾ, മെലനോമ എന്നീ അർബുദങ്ങൾ ഉള്ളവരിലാണു സാധാരണ മുറിവുകളും വ്രണങ്ങളും കാണാൻ സാധ്യത. അർബുദം വളരുന്നത് അനുസരിച്ച് ചെറിയ രക്തക്കുഴലുകളിൽ തടസ്സമുണ്ടാക്കി അവയെ അടച്ചു കളയുന്നു. തത്ഫലമായി ആ ഭാഗത്തെ ചർമകോശങ്ങൾക്ക് ഒാക്സിജൻ ലഭിക്കാതെ വരികയും കോശങ്ങൾ നശിക്കുകയും ചെയ്യുന്നു. ഇത് ഈ ഭാഗത്ത് ഉണങ്ങാത്ത വ്രണങ്ങൾ രൂപപ്പെടാൻ കാരണമാകുന്നു

∙ മറുകുകൾക്ക് വ്യത്യാസം

ശരീരത്തിലെ മറുകുകളിലുണ്ടാകുന്ന വ്യത്യാസങ്ങളെല്ലാം അർബുദകാരണമാകണമെന്നില്ല. എങ്കിലും മറുകിൽ പെട്ടെന്നുണ്ടാകുന്ന വ്യത്യാസം ചർമത്തിലെ അർബുദമായ മെലനോമയുടെ സൂചനയാകാം. സൂര്യപ്രകാശത്തിൽ നിന്നുള്ള അൾട്രാവയലറ്റ് രശ്മികൾ ഏൽക്കുന്നത് മറുകുകൾ അർബുദമാകാനുള്ള സാധ്യത വർധിപ്പിക്കാം. മറുകുകൾ വലുതാവുകയോ നിറവ്യത്യാസമുണ്ടാവുകയോ ചെയ്താൽ ഡോക്ടറെ കാണിച്ചു പ്രശ്നമില്ല എന്നുറപ്പാക്കുക.

∙ സാധാരണമല്ലാത്ത രക്തസ്രാവം

വൻകുടൽ–മലദ്വാര കാൻസറിൽ മലത്തിൽ രക്തം കാണാം. സ്ത്രീകളിലെ അർബുദങ്ങളുടെ ഒരു പ്രധാനസൂചനയാണ് യോനിയിൽ നിന്നുള്ള അസാധാരണമായ രക്തസ്രാവം. എൻഡോമെട്രിയൽ കാൻസർ ഉള്ള 90 ശതമാനം സ്ത്രീകളിലും സാധാരണമല്ലാത്ത രക്തസ്രാവം കാണുന്നു. ഗർഭാശയഗള– അണ്ഡാശയ അർബുദങ്ങളിലും സാധാരണമല്ലാത്ത രക്തസ്രാവം ഉണ്ടാകാം.

∙ വിഴുങ്ങാൻ ബുദ്ധിമുട്ടും ദഹനപ്രശ്നങ്ങളും

ദഹനപ്രശ്നങ്ങളും വിഴുങ്ങാനുള്ള ബുദ്ധിമുട്ടുകളും മാറാതെ നിൽക്കുന്നത് അവഗണിക്കരുത്. പ്രായത്തിന്റെയാണെന്നോ അസിഡിറ്റിയും അൾസറും കാരണമാണെന്നോ വിചാരിച്ച് നിസ്സാരമാക്കരുത്. അന്നനാള അർബദത്തിന്റെയോ തൊണ്ടയിലെ കാൻസറിന്റെയോ ലക്ഷണമായി ഈ പ്രശ്നങ്ങൾ വരാം.

∙ അസാധാരണമായ മുഴ

സ്തനം, വൃഷണം, ലിംഫ് ഗ്രന്ഥികൾ, സ്നായുക്കൾ പോലുള്ള മൃദുവായ ശരീരകലകൾ എന്നിവിടങ്ങളിലാണ് സാധാരണതടിപ്പും മുഴയും കാണുന്നത്. മുഴകൾ എല്ലായ്പ്പോഴും കാൻസർ ലക്ഷണമാകണമെന്നില്ല. അർബുദത്തിന് ഇടയാക്കാത്ത തരം മുഴകളെ ബിനൈൻ ട്യൂമർ എന്നു പറയുന്നു. മുഴകളെ അവഗണിക്കരുത്, കാൻസറല്ല എന്നുറപ്പിക്കേണ്ടതു പ്രധാനമാണ്. പെട്ടെന്നുണ്ടായ മുഴകളാണെങ്കിലോ വലുപ്പം കൂടുന്നുണ്ടെങ്കിലോ പ്രത്യേകിച്ചും ശ്രദ്ധിക്കണം.

പ്രത്യേകം ഒാർക്കുക. ഈ ലക്ഷണങ്ങളെല്ലാം തന്നെ മറ്റു രോഗങ്ങളുടെയുമാകാം. ഭയം വേണ്ട, ജാഗ്രത മതി.