നവരത്ന കുറുമ - പേര് സൂചിപ്പിക്കുന്നത് പോലെ ഒമ്പത് തരം പച്ചക്കറികളും പഴങ്ങളും ചേർത്തൊരുക്കുന്ന വിഭവം. പച്ചക്കറികൾ കഴിക്കാൻ മടിയുള്ള കുട്ടികൾക്ക് പോലും ഇത് വളരെ ഇഷ്ടപ്പെടും. ചപ്പാത്തി, അപ്പം എന്നിവയ്ക്കൊപ്പം കഴിക്കാൻ വളരെ മികച്ച കോംബോ.
ആവശ്യമായ ചേരുവകൾ
1. കാരറ്റ് – 10 ഗ്രാം
ബീൻസ് – ഏഴു ഗ്രാം
കോളിഫ്ളവർ – ഏഴു ഗ്രാം
ഗ്രീൻപീസ് – അഞ്ചു ഗ്രാം
2. എണ്ണ – ഒരു ചെറിയ സ്പൂൺ
3. സവാള അരിഞ്ഞത് – ഒരു ചെറിയ സ്പൂൺ
പച്ചമുളക് – ഒന്ന്, അരിഞ്ഞത്
4. കശുവണ്ടിപ്പരിപ്പ് അരച്ചത് – 12 ഗ്രാം
5. പാൽ – രണ്ടു ചെറിയ സ്പൂൺ
ഏലയ്ക്കാപ്പൊടി – ഒരു നുള്ള്
ഉപ്പ് – പാകത്തിന്
6. കശുവണ്ടിപ്പരിപ്പ് വറുത്തത് - നാലു ഗ്രാം
ഉണക്കമുന്തിരി വറുത്തത് – രണ്ടു ഗ്രാം
7. ആപ്പിൾ കഷണങ്ങളാക്കിയത് – നാലു ഗ്രാം
മാതളനാരങ്ങ അല്ലികളാക്കിയത് – നാലു ഗ്രാം
പൈനാപ്പിൾ – മൂന്നു ഗ്രാം
8. വെള്ള കുരുമുളകുപൊടി – അൽപം
ഏലയ്ക്കാപ്പൊടി – ഒരു നുള്ള്
ക്രീം – ഒരു വലിയ സ്പൂൺ
നെയ്യ് - അര ചെറിയ സ്പൂൺ
9. മല്ലിയില അരിഞ്ഞത് – അലങ്കരിക്കാൻ
ഫ്രെഷ് ക്രീം – ഒരു വലിയ സ്പൂൺ
പാകം ചെയ്യുന്ന വിധം
∙ ഒന്നാമത്തെ ചേരുവ വേവിച്ചു വയ്ക്കണം.
∙ എണ്ണ ചൂടാക്കി മൂന്നാമത്തെ ചേരുവ വഴറ്റുക. വാടി വരുമ്പോൾ നാലാമത്തെ ചേരുവ ചേർത്തിളക്കണം.
∙ രണ്ടു മിനിറ്റ് വഴറ്റിയ ശേഷം അഞ്ചാമത്തെ ചേരുവ ചേർത്തു നന്നായി വഴറ്റണം.
∙ നന്നായി കുറുകി വരുമ്പോൾ വേവിച്ചു വച്ചിരിക്കുന്ന കാരറ്റും ബീൻസും കോളിഫ്ളവറും ഗ്രീൻപീസും ചേർത്തിളക്കുക.
∙ ഒരു മിനിറ്റ് വഴറ്റിയ ശേഷം വറുത്ത കശുവണ്ടിപ്പരിപ്പും ഉണക്കമുന്തിരിയും ഏഴാമത്തെ ചേരുവ ചെറിയ കഷണങ്ങളാക്കിയതും ചേർത്തിളക്കണം.
∙ എട്ടാമത്തെ ചേരുവ ചേർത്തിളക്കി വാങ്ങുക.
∙ ഒൻപതാമത്തെ ചേരുവ കൊണ്ട് അലങ്കരിച്ചു വിളമ്പാം.