തുർക്കിഷ് ശൈലിയിൽ തയ്യാറാക്കിയ സോഫ്റ്റ് & ജൂസി ചിക്കനും, ഒലിവ് ഓയിലും ഹെർബ്സുമിട്ട് ഗ്രിൽ ചെയ്ത ഫ്രഷ് മെഡിറ്ററേനിയൻ പച്ചക്കറികളും ചേരുമ്പോൾ കിട്ടുന്ന രുചി പറഞ്ഞറിയിക്കാൻ പറ്റാത്തതാണ്. ആരോഗ്യത്തിന് ഏറെ ഉത്തമമാണ് ഈ വിഭവം.
ആവശ്യമായ ചേരുവകൾ
1. ചിക്കൻ ബ്രെസ്റ്റ് – 500 ഗ്രാം
2. ചിക്കൻ ടിക്ക പൗഡർ – ഒരു വലിയ സ്പൂൺ
മുളകുപൊടി - ഒരു വലിയ സ്പൂൺ
ജീരകംപൊടി – അര ചെറിയ സ്പൂൺ
മല്ലിപ്പൊടി – അര ചെറിയ സ്പൂൺ
ഒറിഗാനോ – അര ചെറിയ സ്പൂൺ
കട്ടത്തൈര് – രണ്ടു വലിയ സ്പൂൺ
ഒലിവ് ഓയിൽ – ഒരു വലിയ സ്പൂൺ
വിനാഗിരി – ഒരു വലിയ സ്പൂൺ
ഉപ്പ് – പാകത്തിന്
3. സവാള ഇതളുകളായി അടർത്തിയത് – ഒരു കപ്പ്
കാപ്സിക്കം ചതുരക്കഷണങ്ങളായി മുറിച്ചത് – ഒരു കപ്പ്
കാരറ്റ് കനത്തിൽ സ്ലൈസ് ചെയ്തത് – ഒരു കപ്പ്
4. ഒലിവ് ഓയിൽ – രണ്ടു വലിയ സ്പൂണ്
ഉപ്പ്, കുരുമുളകുപൊടി, ഒറിഗാനോ – പാകത്തിന്
വൈറ്റ് സോസിന്
5. വെണ്ണ– ഒരു വലിയ സ്പൂൺ
6. വെളുത്തുള്ളി പൊടിയായി അരിഞ്ഞത് – ഒരു ചെറിയ സ്പൂൺ
ചുവന്നുള്ളി പൊടിയായി അരിഞ്ഞത് – ഒരു വലിയ സ്പൂൺ
7. മൈദ – ഒരു വലിയ സ്പൂൺ
8. പാൽ – ഒന്നരക്കപ്പ്
9. ഉപ്പ് – പാകത്തിന്
വറ്റൽമുളകു ചതച്ചത്– അര ചെറിയ സ്പൂണ്
സെറ്റ് ചെയ്യാൻ
10. മൊസെറെല്ല ചീസ് –അരക്കപ്പ്
ചുവന്ന കാപ്സിക്കം പൊടിയായി അരിഞ്ഞത് – രണ്ടു വലിയ സ്പൂണ്(ആവശ്യമെങ്കില്)
മല്ലിയില അരിഞ്ഞത് – രണ്ടു വലിയ സ്പൂണ്
പാകം ചെയ്യുന്ന വിധം
∙ ചിക്കൻ വൃത്തിയാക്കി രണ്ടാമത്തെ ചേരുവ പുരട്ടി കുറഞ്ഞത് ഒരു മണിക്കൂറെങ്കിലും വയ്ക്കുക.
∙ ഇതു 180 ഡിഗ്രി സെൽഷ്യസിൽ ചൂടാക്കിയിട്ടിരിക്കുന്ന അവ്നിൽ വച്ചോ എയർ ഫ്രൈയറിലോ 12 മിനിറ്റ് ഗ്രിൽ ചെയ്യുക.
. നന്നായി വെന്തു മെല്ലേ കരിഞ്ഞു വരുന്നതാണു പാകം.
∙ മൂന്നാമത്തെ ചേരുവ ഒരു ബൗളിലാക്കി നാലാമത്തെ ചേരുവ ചേർത്തു മെല്ലേ കുടഞ്ഞു യോജിപ്പിച്ച ശേഷം 180 ഡിഗ്രി സെൽഷ്യസിൽ ചൂടാക്കിയിട്ടിരിക്കുന്ന അവ്നിൽ വച്ച് 20–25 മിനിറ്റ് റോസ്റ്റ് ചെയ്യണം.
∙ വൈറ്റ് സോസ് തയ്യാറാക്കാൻ വെണ്ണ ചൂടാക്കി വെളുത്തുള്ളിയും ചുവന്നുള്ളിയും വഴറ്റിയ ശേഷം മൈദ ചേർത്തു വഴറ്റുക.
. പച്ചമണം മാറുമ്പോൾ പാൽ അൽപാൽപം വീതം ചേർത്തു തുടരെയിളക്കണം.
. കട്ടകെട്ടാതെ കുറുകി വരുമ്പോൾ വാങ്ങി ഉപ്പും വറ്റൽമുളകു ചതച്ചതും ചേർത്തിളക്കി വയ്ക്കുക.
∙ ബേക്കിങ് പാനിൽ ചിക്കൻ നിരത്തി, അതിനു മുകളിൽ വൈറ്റ് സോസ് ഒഴിച്ച ശേഷം മൊസെറെല്ല വിതറുക.
. കാപ്സിക്കവും മല്ലിയിലയും നിരത്തി 200 ഡിഗ്രി സെൽഷ്യസിൽ ചൂടാക്കിയിട്ടിരിക്കുന്ന അവ്നിൽ വച്ച് ഗ്രിൽ/ബേക്ക് ചെയ്യുക.
. ചീസ് ഉരുകി കുമിളച്ചു വരുന്നതാണു പാകം.
∙ റോസ്റ്റ് ചെയ്ത പച്ചക്കറികൾക്കൊപ്പം വിളമ്പാം.