നിറത്തിലും ഗുണത്തിലും കേമനാണ് ബീറ്റ്റൂട്ട് റൈസ്. ചോറും ഗ്രേറ്റ് ചെയ്ത ബീറ്റ്റൂട്ടും പച്ചമുളകും ചേർത്ത് വളരെ എളുപ്പത്തിൽ തയ്യാറാക്കാവുന്ന ഈ വിഭവം ഉച്ചഭക്ഷണത്തിന് ഏറ്റവും മികച്ചതാണ്. ശരീരത്തിന് ആവശ്യമായ ഇരുമ്പ് നൽകാനും ഇത് സഹായിക്കും.
ആവശ്യമായ ചേരുവകൾ
1. കൈമ അരി – 200 ഗ്രാം
2. ബീറ്റ്റൂട്ട്, പൊടിയായി അരിഞ്ഞത് – 100 ഗ്രാം
3. എണ്ണ – രണ്ടു വലിയ സ്പൂൺ
4. തക്കാളി – ഒരു ചെറുത്, പൊടിയായി അരിഞ്ഞത്
സവാള – 150 ഗ്രാം, പൊടിയായി അരിഞ്ഞത്
വെളുത്തുള്ളി - മൂന്ന് അല്ലി, പൊടിയായി അരിഞ്ഞത്
5. പുതിനയില അരിഞ്ഞത് – 25 ഗ്രാം
മല്ലിയില അരിഞ്ഞത് – 25 ഗ്രാം
6. മഞ്ഞൾപൊടി – കാൽ ചെറിയ സ്പൂൺ
കശ്മീരി മുളകുപൊടി – അര ചെറിയ സ്പൂൺ
ഉപ്പ് – പാകത്തിന്
7. ഗ്രീൻ പീസ് – 50 ഗ്രാം
സ്വീറ്റ്കോൺ – 50 ഗ്രാം
8. നെയ്യ് – 25 മില്ലി
പാകം ചെയ്യുന്ന വിധം
∙ അരി കഴുകി 30 മിനിറ്റ് കുതിരാൻ വയ്ക്കണം.
∙ ബീറ്റ്റൂട്ട് വേവിച്ച് അരച്ചെടുക്കണം.
∙ പാനിൽ എണ്ണ ചൂടാക്കി നാലാമത്തെ ചേരുവ ചേർത്തു വഴറ്റി ഗോൾഡൻ നിറമാകുമ്പോൾ മല്ലിയിലയും പുതിനയിലയും ചേർത്ത് ഒരു മിനിറ്റ് വേവിക്കുക. അടുപ്പിൽ നിന്നു വാങ്ങി മയത്തിൽ അരയ്ക്കണം.
∙ കുക്കറിൽ അൽപം എണ്ണ ചൂടാക്കി അരപ്പു ചേർത്തു വഴറ്റിയ ശേഷം മുളകുപൊടിയും മഞ്ഞൾപ്പൊടിയും ഉപ്പും ചേർത്ത് വഴറ്റുക.
. ഇതിലേക്ക് ബീറ്റ്റൂട്ട് പേസ്റ്റും കോണും പീസും ചേർത്തിളക്കുക
∙ അരി ചേർത്തിളക്കി ചെറുതീയിൽ അഞ്ചുമിനിറ്റ് വേവിക്കണം.
∙ ഇതിലേക്ക് അരിയുടെ ഒന്നരയിരട്ടി അളവിൽ ചൂടുവെള്ളം ഒഴിച്ചു കുക്കർ അടച്ച് ഒരു വിസിൽ വരും വരെ വേവിക്കണം.
∙ പിന്നീട് 10 മിനിറ്റ് ചെറുതീയിൽ വച്ച ശേഷം തീ അണയ്ക്കുക
∙ 10 മിനിറ്റിനു ശേഷം തുറന്ന്, ചോറ് ഫോർക്ക് കൊണ്ട് മെല്ലേ വിടർത്തിയിടണം.
∙ നെയ്യ് തൂവി വിളമ്പാം.