നന്നായി ഗ്രിൽ ചെയ്തെടുത്ത മത്തങ്ങയുടെ മധുരത്തിലേക്ക്, ചെറുതായി അരിഞ്ഞ പച്ചക്കറികളും സുഗന്ധവ്യഞ്ജനങ്ങളും ചേർത്ത റെലിഷ് കൂട്ടിയിണക്കിയ ഒരു മോഡേൺ വിഭവം.
ആവശ്യമായ ചേരുവകൾ
1. മത്തങ്ങ – 300 ഗ്രാം
2. ഒലിവ് ഓയിൽ– ഒന്നര വലിയ സ്പൂൺ
ഉപ്പ് – പാകത്തിന്
കുരുമുളകുപൊടി, ജീരകംപൊടി, മുളകുപൊടി – അര ചെറിയ സ്പൂൺ
നാരങ്ങാനീര് – ഒരു ചെറിയ സ്പൂൺ
വെളുത്തുള്ളി പൊടിയായി അരിഞ്ഞത് – ഒരു ചെറിയ സ്പൂൺ
റെലിഷിന്
3. തക്കാളി – ഒരു വലുത്, പൊടിയായി അരിഞ്ഞത്
സാലഡ് കുക്കുമ്പർ – ഒരു ഇടത്തരം,പൊടിയായി അരിഞ്ഞത്
സവാള പൊടിയായി അരിഞ്ഞത് – രണ്ടു വലിയ സ്പൂൺ
പച്ചമുളക് – ഒന്ന്, പൊടിയായി അരിഞ്ഞത്
4. നാരങ്ങാനീര്/വിനാഗിരി – ഒരു വലിയ സ്പൂൺ
ഉപ്പ് – പാകത്തിന്
ജീരകം വറുത്തു പൊടിച്ചത് – കാൽ ചെറിയ സ്പൂൺ
മല്ലിയില/ പുതിനയില അരിഞ്ഞത് – രണ്ടു വലിയ സ്പൂൺ
ഒലിവ് ഓയിൽ – ഒരു ചെറിയ സ്പൂൺ
പാകം ചെയ്യുന്ന വിധം
∙ മത്തങ്ങ അരയിഞ്ചു കനത്തിൽ സ്ലൈസ് ചെയ്തു രണ്ടാമത്തെ ചേരുവ പുരട്ടി വയ്ക്കുക.
∙ ഇതു ചൂടായ തവയിൽ മൂന്ന്–നാലു മിനിറ്റ് വീതം ഓരോ വശവും ഗ്രിൽ ചെയ്യണം. പുറം അൽപം കരിഞ്ഞ് ഉൾവശം മൃദുവാകുന്നതാണു പാകം.
∙ റെലിഷ് തയാറാക്കാൻ മൂന്നാമത്തെ ചേരുവ യോജിപ്പിച്ചതിൽ നാലാമത്തെ ചേരുവ ചേർത്തിളക്കണം.
∙ മത്തങ്ങ വിളമ്പാനുള്ള പ്ലേറ്റിൽ നിരത്തി, അതിനു മുകളിൽ റെലിഷ് നിരത്തണം.