വേവിച്ചെടുത്ത കപ്പയിൽ ഫ്രഷ് പച്ചക്കറികളും, പച്ചമുളകും, വെളിച്ചെണ്ണയുടെ മണവും ചേർത്ത് തയ്യാറാക്കുന്ന നാടൻ കപ്പ സാലഡ്. വൈകുന്നേരത്തെ പലഹാരങ്ങൾക്ക് ഏറ്റവും മികച്ചതാണ്.
ആവശ്യമായ ചേരുവകൾ
1. കപ്പ– ഒരു ഇടത്തരം, വേവിച്ചത്
2. സാലഡ് കുക്കുമ്പർ – അരക്കപ്പ്
സവാള പൊടിയായി അരിഞ്ഞത് – അരക്കപ്പ്
തക്കാളി പൊടിയായി അരിഞ്ഞത് – അരക്കപ്പ്
മല്ലിയില അരിഞ്ഞത് – രണ്ടു വലിയ സ്പൂൺ
3. ഉപ്പ് – പാകത്തിന്
ബ്ലാക്ക് സോൾട്ട് – കാൽ ചെറിയ സ്പൂൺ
നാരങ്ങാനീര് – ഒന്നര വലിയ സ്പൂൺ
മുളകുപൊടി, ജീരകംപൊടി, ചാട്ട്മസാല,
പഞ്ചസാര – അര ചെറിയ സ്പൂൺ വീതം
4. എണ്ണ – ഒന്നര വലിയ സ്പൂൺ
5. കടുക് – അര ചെറിയ സ്പൂൺ
ജീരകം – അര ചെറിയ സ്പൂൺ
6. പച്ചമുളക് – രണ്ട്
കറിവേപ്പില – രണ്ടു തണ്ട്
ഇഞ്ചി അരിഞ്ഞത്– അര ചെറിയ സ്പൂൺ
പാകം ചെയ്യുന്ന വിധം
∙ കപ്പ വൃത്തിയാക്കി വേവിച്ചൂറ്റി ചൂടാറാൻ വയ്ക്കണം.
∙ ഇതിലേക്കു രണ്ടാമത്തെ ചേരുവ ചേർത്തു യോജിപ്പിച്ച ശേഷം മൂന്നാമത്തെ ചേരുവയും യോജിപ്പിക്കുക.
∙ പാനിൽ എണ്ണ ചൂടാക്കി കടുകും ജീരകവും മൂപ്പിക്കുക.
∙ ഇതിലേക്ക് ആറാമത്തെ ചേരുവ ചേർത്തിളക്കി വാങ്ങി സാലഡിൽ ഒഴിക്കണം.
∙ ഇതു മെല്ലേ ഇളക്കി യോജിപ്പിച്ച ശേഷം ഉടന് വിളമ്പാം.