ജോവർ മാവ് കൊണ്ടുണ്ടാക്കിയ മൊരിഞ്ഞ ടാർട്ട് കപ്പിനുള്ളിൽ, സ്വാദിഷ്ടമായ നാടൻ ചിക്കൻ മസാല ഫില്ലിംഗ് നിറച്ചു ബേക്ക് ചെയ്തെടുത്ത ഒരു ഹെൽത്തി ഫ്യൂഷൻ പലഹാരം.കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന മികച്ചൊരു പലഹാരമാണ്.
ആവശ്യമായ ചേരുവകൾ
ക്രസ്റ്റിന്
1. ജോവർപൊടി – ഒരു കപ്പ്
അരിപ്പൊടി – അരക്കപ്പ്
ഫ്ളാക്സ് സീഡ് പൊടി – രണ്ടു വലിയ സ്പൂൺ
കപ്പപ്പൊടി – അരക്കപ്പ്
ഉപ്പ് – ഒരു ചെറിയ സ്പൂൺ
ബേക്കിങ് പൗഡർ – അര ചെറിയ സ്പൂൺ
2. തണുപ്പിച്ച വെണ്ണ – അരക്കപ്പ്
3. ആപ്പിൾ സിഡർ വിനിഗർ – രണ്ടു ചെറിയ സ്പൂൺ
4. മുട്ട – ഒന്ന്
5. ഐസ്വെള്ളം – കാൽ കപ്പ്, അരക്കപ്പ് ഐസ്ക്യൂബ് ചേർത്തത്
ചിക്കൻ ഫില്ലിങ്ങിന്
6. ചിക്കൻ – ഒരു ചെറുതിന്റെ പകുതി
7. വെണ്ണ – രണ്ടു വലിയ സ്പൂൺ
വെളുത്തുള്ളി പൊടിയായി അരിഞ്ഞത് – ഒരു ചെറിയ സ്പൂൺ
ഉപ്പ്, കുരുമുളകുപൊടി – പാകത്തിന്
8. റോസ്മേരി – ഒരു തണ്ട്
നാരങ്ങ – ഒന്നിന്റെ പകുതി
വെളുത്തുള്ളി – ഒരു കുടം, മുഴുവനോടെ വട്ടത്തിൽ മുറിച്ചത്
9. വെള്ളം – രണ്ടു കപ്പ്
10. സവാള പൊടിയായി അരിഞ്ഞത് – അരക്കപ്പ്
11. കാരറ്റ്, ഉരുളക്കിഴങ്ങ് എന്നിവ പൊടിയായി അരിഞ്ഞത് – അരക്കപ്പ് വീതം
12. ഗ്രീൻപീസ്, സെലറി – അരക്കപ്പ് വീതം
ഉപ്പ് – പാകത്തിന്
13. ജോവർ പൊടി – ഒരു വലിയ സ്പൂൺ
14. ഫ്രെഷ് ക്രീം – ഒരു വലിയ സ്പൂൺ
പാഴ്സ്ലി പൊടിയായിഅരിഞ്ഞത് – കാൽ കപ്പ്
പാകം ചെയ്യുന്ന വിധം
∙ ഒന്നാമത്തെ ചേരുവ ഒരു ബൗളിലാക്കി, വെണ്ണ ചേർത്തു വിരൽത്തുമ്പു കൊണ്ടു മെല്ലേ ഞെരടി യോജിപ്പിച്ചു റൊട്ടിപ്പൊടി പരുവമാക്കണം.
. ഇതിലേക്ക് ആപ്പിൾ സിഡർ വിനിഗർ ചേർത്ത ശേഷം മുട്ട അടിച്ചതിന്റെ മുക്കാൽഭാഗവും ചേർത്തു യോജിപ്പിക്കുക.
∙ ഐസ്വെള്ളം അൽപാൽപം വീതം ചേർത്തു മയമുള്ള മാവു തയാറാക്കി, രണ്ടു ബേക്കിങ് ഷീറ്റിനിടയിൽ വച്ചു പരത്തുക.
. ഇതു മൂന്നായി മടക്കിയ ശേഷം, 90 ഡിഗ്രിയിൽ തിരിച്ചു വച്ചു വീണ്ടും മൂന്നായി മടക്കണം.
. ഇതു ക്ലിങ് ഫിലിമിൽ പൊതിഞ്ഞ് ഒരു മണിക്കൂർ ഫ്രിഡ്ജിൽ വയ്ക്കുക.
∙ അവ്ൻ 180 ഡിഗ്രി സെൽഷ്യസില് ചൂടാക്കിയിടുക.
∙ ചിക്കൻ നന്നായി തുടച്ച് ഏഴാമത്തെ ചേരുവ പുരട്ടി വച്ച ശേഷം എട്ടാമത്തെ ചേരുവ നിരത്തി ട്രേയിൽ വച്ച് ചൂടാക്കിയിട്ടിരിക്കുന്ന അവ്നിൽ വച്ച് 45–50 മിനിറ്റ് ബേക്ക് ചെയ്യുക.
∙ ചിക്കൻ പുറത്തെടുത്ത്,എല്ലു നീക്കം ചെയ്തു പൊടിയായി അരിഞ്ഞു വയ്ക്കുക.
. ചിക്കനിൽ നിന്ന് ഊറി വന്ന ജ്യൂസ് മാറ്റിവയ്ക്കുക.
∙ സോസ്പാനിൽ ചിക്കന്റെ എല്ലും രണ്ടു കപ്പ് വെള്ളവും ചേർത്തു ചെറുതീയിൽ 10 മിനിറ്റ് തിളപ്പിച്ച് അരിച്ചു വയ്ക്കുക.
∙ പാനിൽ വെണ്ണ ചൂടാക്കി സവാള വഴറ്റിയ ശേഷം കാരറ്റും ഉരുളക്കിഴങ്ങും ചേർത്തു വഴറ്റണം. ഇതിലേക്കു ഉപ്പും പീസും സെലറിയും ചേർത്ത ശേഷം ചിക്കനും ചേർത്തു വഴറ്റണം.
∙ മറ്റൊരു ഫ്രൈയിങ് പാനിൽ ഒരു വലിയ സ്പൂൺ വെണ്ണ ചൂടാക്കി ജോവർപൊടി വറുത്ത്, ഇതിലേക്കു
സ്റ്റോക്കിൽ മെല്ലേ ചേർത്തിളക്കണം.
. ചിക്കൻ വെന്ത ജ്യൂസും ചേർത്തിളക്കി കുറുകി വരുമ്പോൾ ചിക്കൻ മിശ്രിതവും ചേർത്തിളക്കി വരട്ടി വാങ്ങണം.
. ഫ്രെഷ് ക്രീമും പാഴ്സ്ലിയും വിതറി വാങ്ങി ചൂടാറാൻ വയ്ക്കണം.
∙ മാവ് എട്ട് ഉരുളകളാക്കി ഓരോന്നും ഒരിഞ്ചു വട്ടത്തിൽ പരത്തി, ടാര്ട്ട്ലെറ്റ് ടിന്നിൽ വച്ച ശേഷം തള്ളവിരൽ കൊണ്ടമർത്തി ടിന്നിന് അടിയിലും വശങ്ങളിലും പരത്തി,അധികമുള്ളതു കത്രിക കൊണ്ടു മുറിച്ചു മാറ്റണം.
∙ ഇതിൽ ഒരു ഫോർക്ക് കൊണ്ട് അങ്ങിങ്ങായി കുത്തിയ ശേഷം അവ്നിൽ വച്ച് 10 മിനിറ്റ് ബേക്ക് ചെയ്തു വാങ്ങി, ചിക്കൻ മിശ്രിതം നിറച്ച ശേഷം വീണ്ടും 10–15 മിനിറ്റ് ബേക്ക് ചെയ്യുക.