പ്രതിസന്ധികൾ താണ്ടി ‘കടുവ’ നാളെ തിയറ്ററുകളിൽ. പൃഥ്വിരാജിനെ നായകനാക്കി ഷാജി കൈലാസ് സംവിധാനം ചെയ്യുന്ന ചിത്രം ജൂൺ 30നായിരുന്നു ആദ്യം റിലീസ് പ്രഖ്യാപിച്ചത്. എന്നാൽ സിനിമ നിലവിലെ രൂപത്തിൽ റിലീസ് ചെയ്താൽ തന്നെയും കുടുംബത്തെയും അപകീർത്തിപ്പെടുത്തുന്നതാകും എന്നു ചൂണ്ടിക്കാട്ടി പാലാ സ്വദേശിയും പ്ലാന്ററും കേരള കോൺഗ്രസ് (ജെ) നേതാവുമായ ജോസ് കുരുവിനാക്കുന്നേൽ ഹർജി നൽകിയിരുന്നു. ഇതേ തുടർന്നാണ് റിലീസ് വൈകിയത്.
പുതിയ റിലീസ് തീയതി നിർമാതാവ് ലിസ്റ്റിൻ സ്റ്റീഫൻ ഫെയ്സ്ബുക്കിലൂടെ അറിയിച്ചു.
‘നിങ്ങളുമായി വലിയൊരു സന്തോഷം പങ്ക് വെക്കുന്നു.. ഒരുപാട് പോരാട്ടങ്ങൾക്കും തടസങ്ങൾക്കും ഒടുവിൽ കടുവ നിങ്ങളുടെ മുൻപിലേക്ക് എത്തുകയാണ് ... ജൂലൈ 7th, വ്യാഴാഴ്ച മുതൽ ഷാജി കൈലാസ് സിനിമയിലെ തന്നെ ഡയലോഗ് കടമെടുത്ത്‌ പറയട്ടെ ... ‘തൂണ് പിളർന്നും വരും’ അതാണ് ഈ കടുവ ...
കടുവയെ കാണാൻ ഇന്ന് തന്നെ ടിക്കറ്റു ബുക്ക് ചെയ്യൂ ...
ഒരുപാട് അവകാശവാദങ്ങൾ ഉന്നയിക്കുന്നില്ല.
വലിയ തള്ളൽ നടത്താൻ ഉദ്ദേശിക്കുന്നുമില്ല ..പക്ഷെ ഒരുറപ്പ്‌ ...കടുവ ഒരു പക്കാ മാസ്സ് എന്റർടൈനറാണ്.
സിനിമകൾ വിജയിക്കട്ടെ. തീയേറ്ററുകൾ ഉണരട്ടെ
ജയ് ജയ് കടുവ’.– റിലീസ് തീയതി പ്രഖ്യാപിച്ച് ലിസ്റ്റിൻ ഫെയ്സ്ബുക്കിൽ കുറിച്ചു.
ജിനു വി. എബ്രഹാമിന്റേതാണ് കടുവയുടെ തിരക്കഥ. വിവേക് ഒബ്‌റോയ്, അർജുൻ അശോകൻ, അലൻസിയർ, ബൈജു, രൺജി പണിക്കർ എന്നിവരും പ്രധാനവേഷങ്ങളിലെത്തുന്നു.
