ഗ്രാൻഡ് മാസ്റ്ററിനു ശേഷം വീണ്ടുമൊരു ത്രില്ലർ ചിത്രവുമായി എത്തുകയാണ് ബി. ഉണ്ണികൃഷ്ണൻ. ഗ്രാൻഡ് മാസ്റ്ററിൽ മോഹൻലാൽ പൊലീസ് വേഷത്തിൽ തിളങ്ങിയപ്പോൾ പുതിയ ചിത്രത്തിൽ മെഗാ സ്റ്റാർ മമ്മൂട്ടിയാണ് പൊലീസ് വേഷത്തിലെത്തുന്നത്. സിനിമയുടെ പൂജ എറണാകുളത്ത് നടന്നു. തിരക്കഥ ഒരുക്കുന്നത് ഉദയ് കൃഷ്ണ ആണ്. ജൂലൈ 15 മുതൽ പൂയംകുട്ടിയിൽ ചിത്രീകരണം തുടങ്ങും. മമ്മൂട്ടി 18ന് ജോയിൻ ചെയ്യും.
സ്നേഹ, അമലപോൾ, ഐശ്വര്യ ലക്ഷ്മി എന്നിവരാണ് നായികമാർ. വില്ലനായെത്തുന്നത് പ്രശസ്ത തെന്നിന്ത്യൻ താരം വിനയ് റായ് ആണ്. വിനയ് റായ് അഭിനയിക്കുന്ന ആദ്യ മലയാള ചിത്രം കൂടിയാണിത്. ഷൈൻ ടോം ചാക്കോ, ദിലീഷ് പോത്തൻ, സിദ്ദീഖ്, ജിനു എബ്രഹാം തുടങ്ങി നിരവധി താരങ്ങളും ഈ ചിത്രത്തിൽ അണി നിരക്കുന്നു. മുപ്പത്തിയഞ്ചോളം പുതുമുഖങ്ങളും സിനിമയുടെ ഭാഗമാണ്.
ഛായാഗ്രഹണം നിർവഹിക്കുന്നത് ഓപ്പറേഷൻ ജാവ ഒരുക്കിയ ഫൈസ് സിദ്ദീഖ് ആണ്. സംഗീതം ജസ്റ്റിൻ വർഗീസ്, എഡിറ്റിങ് മനോജ്. കലാ സംവിധാനം ഷാജി നടുവിലും വസ്ത്രാലങ്കാരം പ്രവീൺവർമയും ചമയം ജിതേഷ് പൊയ്യയും കൈകാര്യം ചെയ്യുന്നു. അരോമ മോഹൻ ആണ് നിർമാണ നിർവഹണം. കൊച്ചി, പൂയംകുട്ടി, വണ്ടിപെരിയാർ എന്നിവിടങ്ങളിൽ ചിത്രീകരിക്കുന്ന ചിത്രത്തിന്റെ നിർമാണം ആർ.ഡി. ഇലുമിനേഷൻസ്.
