നടൻ സിദ്ദീഖിന്റെ മകൻ റാഷിൻ അന്തരിച്ചു. 37 വയസായിരുന്നു. പടമുകൾ ജുമാ മസ്ജിദിൽ ഇന്ന് വൈകുന്നേരം നാലു മണിക്കാണ് കബറടക്കം.
സാപ്പി എന്ന് വിളിപ്പേരുള്ള റാഷിൻ സിദ്ദീഖിന്റെ മൂന്ന് മക്കളിൽ മൂത്തയാളാണ്. ജീവിതത്തിലെ നല്ല നിമിഷങ്ങൾ സോഷ്യൽ മീഡിയയിലെ പ്രിയപ്പെട്ടവരോടായി പങ്കുവയ്ക്കാറുള്ള സിദ്ദീഖ് സാപ്പിയുടെ വിശേഷങ്ങളും പങ്കുവയ്ക്കാറുണ്ടായിരുന്നു. മാനസിക വെല്ലുവിളി നേരിട്ടിരുന്ന സാപ്പിയെ ‘സ്പെഷൽ ചൈൽഡ്’ എന്നാണ് സിദ്ദീഖ് വിശേഷിപ്പിച്ചിരുന്നത്.
കുടുംബത്തിലെ എല്ലാ ചടങ്ങുകളിലും സാപ്പിയുടെ സാന്നിദ്ധ്യവും ഉണ്ടാകും. സിദ്ദീഖിന്റെ വീട്ടിൽ ഏത് അതിഥിയെത്തിയാലും ആദ്യം ഒാടിയെത്തുന്നതും സാപ്പിയായിരുന്നു. കഴിഞ്ഞ നവംബർ 26–ന് നടന്ന സാപ്പിയുടെ പിറന്നാള്‍ ആഘോഷത്തില്‍ നിന്നുള്ള ചിത്രങ്ങളും വിഡിയോകളുമെല്ലാം സിദ്ദീഖ് സമൂഹ മാധ്യമങ്ങളിൽ പോസ്റ്റ് ചെയ്തിരുന്നു.ഫര്‍ഹീന്‍, ഷഹീൻ സിദ്ദീഖ് എന്നിവര്‍ സഹോദരങ്ങളാണ്.
