ബാല താരമായെത്തി പ്രേക്ഷക മനസുകളിൽ ഇടംനേടിയ താരമാണ് നിവേദ തോമസ്. മലയാളത്തിൽ മാത്രമല്ല തെന്നിന്ത്യയിലെ സൂപ്പർ താരങ്ങൾക്കൊപ്പവും സ്ക്രീനിൽ തിളങ്ങി നിവേദ പ്രേക്ഷകർക്ക് പ്രിയപ്പെട്ടവളായി. കുഞ്ചാക്കോ ബോബനൊപ്പം അഭിനയിച്ച 'എന്താടാ സജി' എന്ന ചിത്രമാണ് നിവേദയുടെ ഏറ്റവും ഒടുവിൽ റിലീസ് ആയ മലയാള ചിത്രം..
എന്നാൽ കഴിഞ്ഞ കുറച്ചു ദിവസങ്ങളായി താരത്തിന്റെ ലുക്കിനെ ചുറ്റിപ്പറ്റിയാണ് സോഷ്യൽ മീഡിയയില്‍ ചർച്ച മുഴുവൻ. ഏറ്റവും പുതിയ തെലുങ്കു ചിത്രം '35 ചിന്നകഥ കാടു' എന്ന സിനിമയുടെ പ്രമോഷൻ പരിപാടിക്കെത്തിയ താരത്തിന്റെ ലുക്ക് ഞൊടിയിട കൊണ്ട്സമൂഹമാധ്യമങ്ങളിൽ ചർച്ചയായി. സാരിയിൽ അതീവസുന്ദരിയായാണ് നിവേദ ആരാധകർക്കു മുൻപിൽ പ്രത്യക്ഷപ്പെട്ടത്. എന്നാൽ, താരം തടി വച്ചല്ലോ എന്നായിരുന്നു സമൂഹമാധ്യമങ്ങളിൽ ചിലരുടെ സംശയവും കമന്റും. ഫേക്ക് ഐഡിയിൽ വന്ന് ബോഡി ഷെയ്മിങ്ങ് ചെയ്യാനും ചിലര്‍ മുതിർന്നു. എന്നാൽ, ആരോഗ്യ പ്രശ്നങ്ങൾ കൊണ്ടാകും താരം തടി വച്ചതെന്നും ചിലർ ചൂണ്ടിക്കാട്ടുന്നു. തടി വച്ചാലും ഇല്ലെങ്കിലും താരത്തിന്റെ പുഞ്ചിരിയുടെ ഭംഗി അതുപോലെ തന്നെയുണ്ടെന്നാണ് ആരാധകരുടെ പക്ഷം. നിവേദ ശ്രദ്ധേയ വേഷത്തിലെത്തുന്ന '35 ചിന്നകഥ കാടുവിൽ’ വിശ്വദേവ രചകോണ്ടയാണ് പ്രധാന വേഷത്തിലെത്തുന്നത്. ചിത്രത്തിൽ രണ്ടു കുട്ടികളുടെ അമ്മയുടെ വേഷത്തിലാണ് നിവേദ തോമസ് എത്തുന്നത്. ഗൗതമി, ഭാഗ്യരാജ്, കൃഷ്ണ തേജ തുടങ്ങിയവർ കേന്ദ്ര കഥാപാത്രങ്ങളെ അവതരിപ്പിക്കുന്ന സിനിമയിൽ അഭിനയപ്രധാന്യമുള്ള വേഷമാണ് നിവേദ കൈകാര്യം ചെയ്യുന്നത്.
വെറുതെ അല്ല ഭാര്യ എന്ന ചിത്രത്തിലൂടെയാണ് നിവേദ തോമസ് മലയാളത്തിൽ അരങ്ങേറുന്നത്. അതിനു മുൻപു തന്നെ സീരിയലുകളിലൂടെ ശ്രദ്ധ നേടിയിരുന്നു. പിന്നീട് തമിഴ്, തെലുങ്കു ചിത്രങ്ങളിലേക്ക് ചുവടു മാറ്റിയ നിവേദ, ദൃശ്യത്തിന്റെ തമിഴ് പതിപ്പായ പാപനാശത്തിലും അഭിനയിച്ചു.
