മോഹൻലാലിന്റെ അനന്തരവനും ജീത്തു ജോസഫ്, രാജീവ് രവി, മോഹൻലാൽ എന്നിവരുടെ സംവിധാന സഹായിയുമായ അദ്വൈത് നായർ സംവിധാനം ചെയ്യുന്ന ആദ്യചിത്രം ‘ചത്താ പച്ച’യുടെ ടൈറ്റിൽ പോസ്റ്റർ എത്തി. റെസ്‌ലിങിൽ നിന്നു പ്രചോദനമുൾക്കൊണ്ട് ഒരുക്കുന്ന ഈ പാൻ ഇന്ത്യൻ ആക്‌ഷൻ കോമഡി എന്റർടെയ്നറിൽ അർജുൻ അശോകൻ നായകനായി എത്തുന്നു. റോഷൻ മാത്യു, ഇഷാൻ ഷൗക്കത്, വിശാഖ് നായർ, പൂജ മോഹൻദാസ് എന്നിവരും വേഷമിടുന്നു.
ഈ ബിഗ് ബജറ്റ് ചിത്രം നിർമ്മിക്കുന്നത് റീൽ വേൾഡ് എന്റർടെയ്ൻമെന്റാണ്. ട്രാൻസ് വേൾഡ് ഗ്രൂപ്, ലെൻസ്മാൻ ഗ്രൂപ്പ് എന്നിവർ കൂടി ചേർന്നാണ് റീൽ വേൾഡ് എന്റർടൈൻമെന്റിന്റെ രൂപീകരണം. ട്രാൻസ് വേൾഡ് ഗ്രൂപ്പിന്റെ രമേഷ്, റിതേഷ് രാമകൃഷ്ണൻ, ലെൻസ്മാൻ ഗ്രൂപ്പിന്റെ ഷിഹാൻ ഷൌക്കത്ത് എന്നിവർക്കൊപ്പം ഈ ചിത്രത്തിന്റെ നിർമ്മാണ പ്രക്രിയയിൽ, മമ്മൂട്ടി കമ്പനിയുടെ നേതൃനിരയിലുള്ള എസ്. ജോർജ്, സുനിൽ സിങ് എന്നിവരും പങ്കാളികളാകുന്നു.
പ്രശസ്ത ബോളിവുഡ് സംഗീത സംവിധായകരായ ശങ്കർ എഹ്‌സാൻ ലോയ് ടീം ഈ ചിത്രത്തിലൂടെ മലയാളത്തിൽ സംഗീത സംവിധായകരായി അരങ്ങേറ്റം കുറിക്കുകയാണ്. പ്രി പ്രൊഡക്‌ഷൻ ജോലികൾ പുരോഗമിക്കുന്ന ചിത്രത്തിന്റെ ചിത്രീകരണം 2025 മേയ് മാസത്തിൽ ആരംഭിക്കും.
ഛായാഗ്രാഹകൻ – ചന്ദ്രു സെൽവരാജ്, ആക്‌ഷൻ – കലൈ കിങ്‌സൺ, എഡിറ്റിങ് – പ്രവീൺ പ്രഭാകർ, മേക്കപ്പ് – റോണക്സ് സേവ്യർ, വസ്ത്രാലങ്കാരം – മെൽവി.
