സ്കൂൾ തുറന്നു. പഠനത്തിനായി പുതിയ ലോകത്തെത്തിയിരിക്കുകയാണ് കുട്ടികൾ. എന്നാൽ രോഗസാധ്യത കൂടുതലുള്ള സമയം കൂടിയാണിത്. കുട്ടികളുടെ ആരോഗ്യത്തിനായി മാതാപിതാക്കൾ ശ്രദ്ധിക്കേണ്ട കാര്യങ്ങൾ ABCDEF എന്ന രീതിയിൽ ടിപ്സ് ആയി അവതരിപ്പിക്കുകയാണ് ശിശുരോഗചികിത്സനായ ഡോ. ജിസ്സ് തോമസ്.
A- Avoid Contact
പനിയുള്ള കുട്ടികളെ സ്കൂളിൽ വിടാതിരിക്കുക. സ്കൂളിൽ എത്തിയതിനുശേഷമാണു പനി വന്നതെങ്കിൽ കുട്ടിയെ സിക്ക് റൂമിലേക്കു മാറ്റി മറ്റു കുട്ടികളുമായി ഇടപഴകാതിരിക്കാൻ അധ്യാപകർ ശ്രദ്ധിക്കേണ്ടതാണ്.
B- Bacteria/Virus Vaccines
ന്യുമോണിയ, സാധാരണയായി പകരുന്ന ഇൻഫ്ലുവൻസാ പനികൾ ഇവയ്ക്ക് എതിരായുള്ള പ്രതിരോധ കുത്തിവയ്പുകൾ ഇന്നു ലഭ്യമാണ്. ആവശ്യമെങ്കിൽ ശിശുരോഗവിദഗ്ധന്റെ നിർദേശ പ്രകാരം അവ നൽകാവുന്നതാണ്.
C- Change the Habit
സ്കൂളിൽ നിന്നു വന്നാലും മൊബൈൽ ഫോൺ ഉപയോഗിക്കുന്ന കുട്ടികൾ ധാരാളമുണ്ട്. ടിവി കാണുന്നവരുമുണ്ട്. കുട്ടികളുടെ സ്ക്രീൻ ടൈം പരമാവധി ഒരു മണിക്കൂറിൽ താഴെ നിർത്തുന്നതിനു മാതാപിതാക്കൾ പ്രത്യേകം ശ്രദ്ധിക്കേണ്ടതാണ്. ദിവസം 40 മിനിറ്റെങ്കിലും കുട്ടിയ്ക്കു വ്യായാമവും ലഭിക്കണം.
D - Drugs
കുട്ടികൾക്കു ശിശുരോഗവിദഗ്ധർ നിർദ്ദേശിക്കുന്ന മരുന്നുകൾ നിർദേശിക്കുന്ന അളവിലും കാലയളവിലും കൃത്യമായി നൽകേണ്ടതാണ്. സ്വയംചികിത്സ പരമാവധി ഒഴിവാക്കുക. മുൻപ് രോഗം വന്നപ്പോൾ നൽകിയ മരുന്ന് പിന്നീട് രോഗം വരുമ്പോഴെല്ലാം കുട്ടിക്കു നൽകുന്ന പ്രവണത നല്ലതല്ല.
E- Enviornment
ഒരു കുട്ടിയുടെ ജീവിതത്തിൽ മൂന്നു ചുറ്റുപാടുകളാണുള്ളത്. സ്കൂൾ, വീട്, സ്കൂൾ ബസ്. ഈ ചുറ്റുപാടുകളെല്ലാം പരമാവധി അണുവിമുക്തമാക്കിയും പൊടി വിമുക്തമായും സംരക്ഷിക്കുക. ക്ലാസ് മുറികൾ വൃത്തിയായിരിക്കണം. കുട്ടിയുടെ മുറി എന്നും വൃത്തിയാക്കാൻ ശ്രദ്ധിക്കേണ്ടതാണ്. സ്കൂൾ ബസ് വൃത്തിയുള്ളതാകാൻ സ്കൂൾ അധികൃതർ ശ്രദ്ധിക്കണം.
F- Food
കുട്ടികളുടെ ആഹാരത്തിൽ ജങ്ക് ഫൂഡ്, ശീതളപാനീയങ്ങൾ മുതലായവ പരമാവധി ഒഴിവാക്കുക. ആഹാരത്തിൽ പഴങ്ങളും പച്ചക്കറികളും കൂടുതലായി ഉൾപ്പെടുത്തുക. കുട്ടി നന്നായി വെള്ളം കുടിക്കുന്നുണ്ടെന്ന് ഉറപ്പുവരുത്തണം.
തയാറാക്കിയത്
ഡോ. ജിസ്സ് തോമസ്
പാലൂക്കുന്നേൽ
സീനിയർ കൺസൽറ്റന്റ് ,
പീഡിയാട്രിക്സ് വിഭാഗം
മാർ സ്ലീവാ മെഡിസിറ്റി
പാലാ.
