തിരക്കു പിടിച്ച ജീവിതത്തിൽ സ്ത്രീകൾ പലപ്പോഴും മറക്കുന്നത് അവരെ തന്നെയാണ്. വീട്ടിലെയും ഓഫീസിലെയും കാര്യങ്ങൾക്കിടയിൽ അവർക്കായി മാറ്റി വയ്ക്കാൻ സമയം ഇല്ലാതെ പോകുന്നു. പലപ്പോഴും പലനേരങ്ങളിലെയും ഭക്ഷണം പോലും ഒഴിവാക്കുന്നു. എന്നാൽ ഇനി ആ സങ്കടം വേണ്ട. ഇതാ നിങ്ങൾക്കായി ഈസി പ്രോട്ടീൻ ലഡു റെസിപ്പി. ദിവസവും ഒന്നോ രണ്ടോ എണ്ണം കഴിച്ചാൽ നിങ്ങൾക്കാവശ്യമായ എല്ലാ എനർജിയും ലഭിക്കും. തയാറാക്കുന്നത് എങ്ങനെ എന്നു നോക്കാം.
പ്രോട്ടീൻ ലഡു
1.വെളുത്ത എള്ള് – അരക്കപ്പ്
ഫ്ലാക്സ് സീഡ് – ഒരു കപ്പ്
ബദാം – അരക്കപ്പ്
മെലൺ സീഡ് – അരക്കപ്പ്
2.വെള്ളം – കാല് കപ്പ്
ശർക്കര – ഒരു കപ്പ്
3.ഏലയ്ക്കപ്പൊടി – ഒരു ചെറിയ സ്പൂൺ
4.നെയ്യ് – ഒരു ചെറിയ സ്പൂൺ
പാകം ചെയ്യുന്ന വിധം
∙പാനിൽ ഒന്നാമത്തെ ചേരുവ വെവ്വേറെ ചൂടാക്കി തണുക്കാൻ മാറ്റി വയ്ക്കുക.
∙തണുത്ത ശേഷം മിക്സിയിൽ നന്നായി പൊടിച്ചു വയ്ക്കണം.
∙ഒരു പാനിൽ രണ്ടാമത്തെ ചേരുവ ചേർത്തു പാനി തയാറാക്കുക.
∙ഒരുനൂൽ പരുവമാകുമ്പോൾ അരിച്ചെടുക്കുക.
∙മറ്റൊരു പാനിലേക്ക് ശർക്കരപാനി ഒഴിച്ചു തിളയ്ക്കുമ്പോൾ ഏലയ്ക്കപ്പൊടിയും ഒന്നാമത്തെ ചേരുവ പൊടിച്ചതു ചേർത്ത് നന്നായി ഇളക്കി യോജിപ്പിക്കുക.
∙നെയ്യ് ചേർത്തു വീണ്ടും ഇളക്കി യോജിപ്പിക്കണം.
∙പാനിന്റെ വശങ്ങളിൽ നിന്നും വിട്ടു വരുന്ന പരുവമാകുമ്പോൾ മറ്റൊരു പാത്രത്തിലേക്കു മാറ്റുക.
∙കൈയിൽ നെയ്യ് തടവി ചെറു ചൂടോടെ ഉരുട്ടിയെടുക്കാം.
∙വായു കടക്കാത്ത പാത്രത്തിൽ സൂക്ഷിക്കാം.