ആരാധരുടെ ചോദ്യങ്ങൾക്ക് മറുപടിയുമായി അവതാരക ലക്ഷ്മി നക്ഷത്ര. സോഷ്യൽ മീഡിയയിലെ നെഗറ്റീവ് കമന്റുകളും, റിയാക്ഷനുകളും തന്നെ എങ്ങനെ ബാധിക്കുന്നു എന്നും യൂട്യൂബിൽ പങ്കുവച്ച വി ഡിയോയിൽ ലക്ഷ്മി നക്ഷത്ര പറഞ്ഞു. ഓരോ കാര്യങ്ങൾ വരുമ്പോഴും മെന്റലി വിഷമിക്കുമെങ്കിലും, പിന്നീട് അതൊക്കെ മാറ്റി നിർത്താനും സെൻസിൽ എടുക്കാനും തനിക്ക് കഴിയാറുണ്ട്. പക്ഷേ, ഒറ്റ ഒരു സംഭവത്തിൽ മാത്രമാണ് കേസ് കൊടുത്തതെന്ന് താരം പറയുന്നു.
ഒരു മോശം റിയാക്ഷൻ വിഡിയോ വളരെ അധികം വേദനിപ്പിച്ചു. ആള് ആരാണെന്നോ, ചാനൽ ഏതാണെന്നോ ഞാൻ പറയുന്നില്ല, ഇനി ഞാൻ കാരണം ഒരു പ്രമോഷൻ അദ്ദേഹത്തിനു കൊടുക്കണം എന്നു തോന്നുന്നില്ല. എന്നെ അദ്ദേഹത്തിന്റെ വിഡിയോയിൽ അഭിസംഭോധന ചെയ്തത് വാർക്കപ്പണിക്കാരി എന്നാണ്. വേറെ പലതും ആ വിഡിയോയിൽ പറയുന്നുണ്ട്, പക്ഷേ എന്നെ വേദനിപ്പിച്ചത് - അവൾക്ക് പ്രസവിക്കാനുള്ള കഴിവില്ല, ഒന്നിനും കൊള്ളില്ല എന്ന് പറഞ്ഞുകൊണ്ട് ഉപയോഗിച്ച ഒരു വാക്കാണ്. കണ്ടപ്പോൾ വളരെ വേദന തോന്നി. ആ സംഭവത്തിൽ മാത്രം ഞാൻ പൊലീസ് കേസ് കൊടുത്തു. പൊലീസുകാരോട് എനിക്ക് ഒരൊറ്റ അഭ്യർത്ഥന മാത്രമേ ഉണ്ടായിരുന്നുള്ളൂ, പിടിച്ചാൽ അദ്ദേഹത്തെ എനിക്കൊന്നു കാണണം എന്ന്. തൃശ്ശൂരുകാരനാണ്. ഞാൻ പൊലീസ് സ്റ്റേഷനിൽ പോയി കാണുമ്പോൾ കോട്ടില്ല. വിഡിയോയിൽ കണ്ട പോലെയേ അല്ല, വളരെ വിനയ സ്വഭാവം. എന്തിനാണ് ഇത് ചെയ്തതെന്നു ചോദിച്ചപ്പോൾ, എനിക്ക് കാശിന് അത്യാവശ്യം ഉണ്ടായിരുന്നു, ആ വിഡിയോയ്ക്ക് റീച്ച് കിട്ടിയാൽ എനിക്കാവശ്യമുള്ള കാശ് കിട്ടും എന്നു പറഞ്ഞ ആളോട് എന്ത് പറയാനാണ്. അമ്മയാകുക എന്നത് പവിത്രമായ ഒന്നാണ്. അതിന് കഴിവില്ല എന്നൊക്കെ ഒരു പെൺകുട്ടിയെ കുറിച്ച് പറയുന്നത് ന്യായീകരിക്കാൻ ആവുമോ. അയാൾക്ക് എന്റെ അച്ഛനാകാനുള്ള പ്രായമുണ്ട്. എന്തു തന്നെയായാലും, ആ കേസ് ഞാൻ പിൻവലിച്ചു. വീണ്ടും അയാൾ ഇട്ട വിഡിയോയിൽ തന്നെ വിശേഷിപ്പിച്ചത് ലക്ഷ്മി നക്ഷത്രക്കുട്ടി, ചിന്നു മോൾ എന്നൊക്കെയാണെന്നും ലക്ഷ്മി നക്ഷത്ര പറഞ്ഞു.
