സുഹൃത്തും സീരിയല്‍ ക്യാമറാമാനുമായ വിഷ്ണു സന്തോഷിനൊപ്പമുള്ള മനോഹരമായൊരു ചിത്രം ഇൻസ്റ്റഗ്രാമിൽ പങ്കുവച്ച് മിനിസ്ക്രീൻ താരം സ്വാതി നിത്യാനന്ദ്. വിഷ്ണുവിന്റെ തോളിൽ ചാഞ്ഞ് കിടക്കുന്ന മനോഹരമായ ഒരു സെൽഫി ചിത്രം, ‘എനിക്കെന്നും ചായാൻ ഈ തോൾ വേണം’ എന്ന കുറിപ്പോടെയാണ് സ്വാതി പങ്കുവച്ചത്. ഇതേ ചിത്രം വിഷ്ണുവും ഷെയർ ചെയ്തിട്ടുണ്ട്. പിരിയാൻ കഴിയാത്ത ബന്ധമാണ് ഇപ്പോൾ പരസ്പരം എന്നാണ് കഴിഞ്ഞ ഒരു പോസ്റ്റിൽ വിഷ്ണു സന്തോഷ് കുറിച്ചത്. സ്വാതിയുടെ ഒരു കമ്മൽ തനിക്കേറ്റവും പ്രിയപ്പെട്ട വണ്ടിയുടെ കീചെയിൻ ആക്കിയിട്ടുണ്ട് വിഷ്ണു. വിഷ്ണു പകർത്തിയ തന്റെ മനോഹരമായ ചിത്രങ്ങൾ സ്വാതി മുൻപും സോഷ്യൽ മീഡിയയിൽ പോസ്റ്റ് ചെയ്തിട്ടുണ്ട്. ഇരുവരും ഒന്നിച്ചുള്ള ഒരു നൃത്ത വിഡിയോയും ആരാധകർ ഏറ്റെടുത്തു കഴിഞ്ഞു.
തിരുവനന്തപുരം സ്വദേശിയായ സ്വാതി ‘ചെമ്പട്ട്’ എന്ന സീരിയലിലൂടെയാണ് അഭിനയരംഗത്തെത്തുന്നത്. പിന്നീട് മഴവിൽ മനോരയിലെ ഭ്രമണം എന്ന പരമ്പരയിലൂടെ പ്രേക്ഷക ശ്രദ്ധ നേടുകയായിരുന്നു. ഇതേ സീരിയലിലെ ക്യാമാറാമാനായിരുന്ന പ്രതീഷ് നെന്മാറയെ ആണ് സ്വാതി വിവാഹം ചെയ്തത്. നടി അനുശ്രീ ആയിരുന്നു വിഷ്ണുവിന്റെ ജീവിതപങ്കാളി. എന്നാൽ ഇവർ വേർപിരിഞ്ഞു.
