അന്തരിച്ച നടനും മിമിക്രി കലാകാരനുമായ കൊല്ലം സുധിയുടെ ഭാര്യ രേണു സുധി ഇപ്പോൾ സോഷ്യൽ മീഡിയയിലെ മിന്നും താരമാണ്. സുധിയുടെ മരണശേഷം അഭിനയരംഗത്തു സജീവമായ രേണു റീൽസ് വിഡിയോസിലും മ്യൂസിക് ആൽബങ്ങളിലും ഷോർട് ഫിലിമുകളിലും തിളങ്ങുന്നു. സിനിമ പിന്നണി ഗാനരംഗത്തും സാന്നിധ്യമറിയിച്ചു.
തുടർന്ന് ബിഗ് ബോസ് മലയാളത്തിന്റെ ഏഴാം സീസൺ മത്സരാർത്ഥിയായി രേണു. പത്തൊമ്പത് മത്സരാർത്ഥികളുമായി ബിഗ് ബോസ് മലയാളത്തിന്റെ ഏഴാം സീസൺ ഇക്കഴിഞ്ഞ ആഗസ്റ്റ് മൂന്നിനാണ് ആരംഭിച്ചത്. ഒരു കോമണർ ഉൾപ്പെടെ സിനിമയിലും സീരിയലിലും സോഷ്യൽമീഡിയയിലും നിറഞ്ഞു നിൽക്കുന്നവരാണ് ഇത്തവണ മത്സരത്തിനെത്തിയത്. അക്കൂട്ടത്തിലെ വൈറൽ താരവും രേണുവായിരുന്നു. എന്നാൽ ആദ്യ ആഴ്ച പിന്നിട്ടപ്പോൾ മുതൽ ഹൗസിൽ തുടരാൻ തനിക്കു കഴിയുന്നില്ലെന്നും മാനസികമായി താൻ വളരെ വീക്കാണെന്നും രേണു പറയാൻ തുടങ്ങി. മക്കളെ കാണാൻ പറ്റാത്തതോർത്തു രേണു കരഞ്ഞു.
ഒടുവിൽ ഷോയിൽ നിന്നു പുറത്തായ രേണു ഇന്നലെ വീട്ടിൽ തിരിച്ചെത്തി. ഇളയമകൻ റിഥപ്പന്റെ അടുത്തേക്കാണു താരം ആദ്യം എത്തിയതും.
അമ്മയെ കാത്തുനിൽക്കുകയായിരുന്നു റിഥപ്പൻ. മോനെ കണ്ടതും ഓടിയെത്തി രേണു ഏറെനേരം വാരിപ്പുണർന്നു നിന്നു. കുഞ്ഞിനെ ഉമ്മവച്ചും കൊഞ്ചിച്ചും മതിവരാത്ത രേണുവിനെയാണു വിഡിയോയിൽ കാണുക. മകനു നൽകാന്‍ നിറയെ ചോക്ലേറ്റുകളും രേണു കയ്യിൽ കരുതിയിരുന്നു.
ഇപ്പോഴിതാ, രേണുവിന്റെ ഒരു സോഷ്യല്‍ മീഡിയ വിഡിയോയാണ് വൈറൽ. രേണുവും സഹനടനും തുളസിമാലകളണിഞ്ഞു നിൽക്കുന്നതാണ് വിഡിയോയിൽ. ‘ദിസ് ഇസ് നോട്ട് ഒറിജിനൽ. ദിസ് ഈസ് ക്യാരക്ടർ. ഓക്കെ. യു നോ. വീണ്ടും ചതി. വീണ്ടും തേപ്പുമായി രേണു സുധിയുടെ പുതിയ കഥ’ എന്നാണ് രേണു വിഡിയോയിൽ തമാശയായി പറയുന്നത്.
