ഗോസിപ്പുകൾക്കും നെഗറ്റീവ് കമന്റുകൾക്കും വിട. മിനി സ്ക്രീൻ പ്രേക്ഷകർക്ക് പ്രിയങ്കരരായ ജിഷിൻ മോഹനും അമേയ നായരും വിവാഹിതരാകുന്നു. പ്രണയദിനത്തിലാണ് മൗനംവെടിഞ്ഞ് ഇരുവരും പ്രണയം ഉറപ്പിച്ചത്.
വിവാഹ നിശ്ചയം കഴിഞ്ഞെന്ന് ഇരുവരും വെളിപ്പെടുത്തി. ‘‘അവളും അവനും യെസ് പറഞ്ഞു. എൻഗേജ്മെന്റ് കഴിഞ്ഞു. ഹാപ്പി വലന്റൈൻസ് ഡേ, നിന്റെ കൈകളിലാണ് എന്റെ സന്തോഷം, പ്രപഞ്ചത്തിന് നന്ദി.’’–അമേയയും ജിഷിനും കുറിച്ചു.
കഴിഞ്ഞ ഒരു വര്‍ഷത്തോളമായി ജിഷിന്‍ മോഹന്‍-അമേയ നായര്‍ ബന്ധത്തെ കുറിച്ച് പല തരത്തിലുള്ള ഗോസിപ്പുകൾ സോഷ്യൽ മീഡിയയിൽ പ്രചരിച്ചിരുന്നു. ഇരുവരും ഒന്നിച്ചുള്ള വിഡിയോകൾക്കും ചിത്രങ്ങൾക്കും കീഴെ ട്രോളുകളും പരിഹാസങ്ങളും ഗോസിപ്പുകളും നിറഞ്ഞിരുന്നു. അമേയയുമായുള്ള ബന്ധത്തെ കുറിച്ചുള്ള ചോദ്യങ്ങളോട്, സൗഹൃദത്തിനപ്പുറമുള്ള ഒരു ആത്മബന്ധം അമേയയുമായി ഉണ്ട് എന്നാണ് ജിഷിന്‍ മുൻപ് മറുപടി പറഞ്ഞിട്ടുള്ളത്.
നടി വരദയാണ് ജിഷിൻ മോഹന്റെ ആദ്യ ഭാര്യ. ഈ ബന്ധത്തിൽ ഇരുവർക്കും ഒരു മകനുണ്ട്. ഇരുവരും മൂന്നു വർഷം മുൻപ് വിവാഹമോചിതരായി. അമേയയുടേതും രണ്ടാം വിവാഹമാണ്. ഈ ബന്ധത്തിൽ അമേയയ്ക്ക് രണ്ട് മക്കളുണ്ട്.
വിവാഹമോചനത്തിന് ശേഷം താൻ നിരോധിക്കപ്പെട്ട ലഹരി വരെ ഉപയോഗിച്ചിരുന്നെന്നും അതിൽ നിന്നുള്ള മോചനത്തിനു കാരണക്കാരിയാണ് പുതിയ കൂട്ടുകാരി അമേയ എന്നുമാണ് ജിഷിൻ പറഞ്ഞത്.
