പ്രണവ് മോഹൻലാൽ നായകനായി എത്തുന്ന ആദ്യ ചിത്രം ‘ആദി’യുടെ ഫസ്റ്റ് ലുക്ക് പോസ്റ്റർ പുറത്തുവന്നത് മുതൽ താരത്തിന്റെ മറ്റു സിനിമാ വിശേഷങ്ങൾ അറിയാൻ കാത്തിരിക്കുകയാണ് എല്ലാവരും. എന്നാൽ മാധ്യമങ്ങളെ ശ്രദ്ധിക്കാതെ സ്വന്തം വിശേഷങ്ങൾ അധികം പറഞ്ഞ് മറ്റുള്ളവരെ ബോറടിപ്പിക്കാതെ തിരക്കുകളുമായി മുന്നോട്ട് പോകുകയാണ് പ്രണവ്. എന്നാൽ അക്കാര്യത്തിൽ നാണം കുണുങ്ങി എന്ന് പറഞ്ഞ് പ്രണവിനെ മാറ്റി നിർത്താനും ആർക്കും കഴിയില്ല. കാരണം സെറ്റിലെ രസികനായ സഹസംവിധായകനും മറ്റുള്ളവരോട് കരുണയുള്ള മനുഷ്യനുമൊക്കെയാണ് പ്രണവ് എന്നും.
സിനിമയിലേക്ക് വരുന്നതിനു മുൻപും താരപുത്രനായിരുന്നിട്ടുകൂടി പ്രണവ് എപ്പോഴും മാധ്യമങ്ങളിൽ നിന്ന് അകന്നു നിൽക്കാൻ ശ്രദ്ധിച്ചിരുന്നു. എന്നാലും പ്രണവ് ചെയ്യുന്ന ഒരു ചെറിയ കാര്യങ്ങളും സാധാരണക്കാരനായുള്ള ജീവിത ശൈലിയുമെല്ലാം തന്നെ സോഷ്യൽ മീഡിയയിലൂടെ പ്രചരിച്ച് പ്രണവ് പോലുമറിയാതെ പ്രേക്ഷകർ പ്രണവിനെ അറിഞ്ഞു.
ആദ്യ സിനിമയുടെ ലോഞ്ചിന്റെ സമയത്തും പ്രണവ് ഒരു വാക്ക് പോലും സംസാരിച്ചിരുന്നില്ല. അച്ഛനൊപ്പം ചേർന്ന് സദാ ശാന്തമായ മുഖവുമായാണ് പ്രണവ് അന്ന് ഇരുന്നത്. എന്നാൽ എന്ത് കൊണ്ടാണ് പ്രണവ് മാധ്യമങ്ങളിൽ നിന്ന് ഇങ്ങനെ അകന്നു നിൽക്കുന്നതെന്ന് പ്രണവ് തന്നെ പറയുകയാണ്:
എനിക്ക് മാധ്യമങ്ങളോട് വെറുപ്പില്ല. എൻ്റെ സ്വകാര്യതകള്‍ അറിഞ്ഞിട്ട് ജനങ്ങള്‍ക്ക് എന്ത് പ്രയോജനം എന്നു തോന്നി. അതുകൊണ്ടാണ്. എനിക്ക് പ്രത്യേകമായി അങ്ങനെ ഇഷ്ടങ്ങൾ ഒന്നുമില്ല. അങ്ങനെ ജീവിച്ചുപോകുക. യാത്രകള്‍ ഞാന്‍ ഒരുപാട് ഇഷ്ടപ്പെടുന്നുണ്ട്.
