അടുത്തടുത്ത് രണ്ട് വിയോഗങ്ങളാണ് മമ്മൂട്ടിയുടെ കുടുംബത്തിൽ സംഭവിച്ചത്. വാർധക്യസഹജമായ അസുഖത്തെ തുടർന്ന് കഴിഞ്ഞ ഏപ്രിലിലാണ് മമ്മൂട്ടിയുടെ ഉമ്മ ഫാത്തിമ ഇസ്മായിൽ (93) വിടപറയുന്നത്. സെപ്റ്റംബറിൽ മമ്മൂട്ടിയുടെയും ഇബ്രാഹിംകുട്ടിയുടെയും സഹോദരിയായ ആമിനയും (നസീമ–70) വിട പറഞ്ഞു. ആ വേദനയുടെ ആഴം ഉൾക്കൊണ്ട് ഹൃദയം തൊടുന്നൊരു ചിത്രം പങ്കുവയ്ക്കുകയാണ് മമ്മൂട്ടിയുടെ സഹോദരനും നടനുമായ ഇബ്രാഹിംകുട്ടി. ഫെയ്സ്ബുക്കിലാണ് ചിത്രം പങ്കുവച്ചത്.
തനിക്കൊപ്പമിരിക്കുന്ന ഉമ്മ ഫാത്തിമ്മയുടെയും സഹോദരി ആമിനയുടെയും ചിത്രമാണ് ഇബ്രാഹിംകുട്ടി പങ്കുവച്ചത്. ‘‘അടുത്തടുത്ത് രണ്ട് വേർപാടുകൾ’’ എന്നായിരുന്നു ചിത്രത്തിനു നൽകിയ അടിക്കുറിപ്പ്. നാല് മാസങ്ങളുടെ ഇടവേളകളിലാണ് ഇവരുടെ കുടുംബത്തിൽ നിന്നും രണ്ട് പ്രിയപ്പെട്ടവർ വിടവാങ്ങുന്നത്.
ആരാധകരും സഹപ്രവർത്തകരുമടക്കം നിരവധി ആളുകളാണ് ഇബ്രാഹിംകുട്ടിയുടെ പോസ്റ്റിനു താഴെ പ്രതികരണങ്ങളുമായി എത്തുന്നത്. ഇബ്രാഹിംകുട്ടി, സക്കരിയ എന്നീ രണ്ട് ഇളയ സഹോദരന്മാരും ആമിന, സൗദ, ഷഫീന എന്നീ സഹോദരിമാരുമാണ് മമ്മൂട്ടിക്കുള്ളത്.
