പാസ്ത, സുമാക്കിറാ...; കുട്ടികൾക്കു കൊടുക്കാൻ വ്യത്യസ്തമായ പ്രാതൽ വിഭവം!

Cooking Expert

‘പാസ്ത എന്നു കേൾക്കുമ്പോൾ ജഗതിച്ചേട്ടന്റെ ‘പിസ്തപ്പാട്ട്’ ആണ് ആദ്യം ഓർമ വരുന്നത്. പുട്ടും കൊഴുക്കട്ടയുമൊക്കെ വെന്തെടുത്തിരുന്ന അടുക്കളകളിൽ ഇപ്പോൾ അരങ്ങുവാഴുന്നത് നൂഡിൽസും പാസ്തയുമൊക്കെയാണല്ലോ. നമ്മൾ ഓൾഡ് ജനറേഷനു പരിചിതമല്ലാത്തതുകൊണ്ട് നല്ലതല്ലെന്നു പറഞ്ഞു തള്ളിക്കളയാൻ വരട്ടെ. പച്ചക്കറിയും ചീസും വെണ്ണയും ചേരുന്നതുകൊണ്ട് കുട്ടിക ൾക്ക് നല്ലൊരു ഹെൽതി വിഭവമാണ് പാസ്ത.

ഇറ്റലിക്കാരുടെ മുഖ്യഭക്ഷണമായ പാസ്ത നമ്മുടെ വിഭവങ്ങൾ പോലെ ഒട്ടും സ്ൈപസി അല്ല. ഇതിൽ ചീസിന്റെ ക്രീമി രുചിയാണ് മുന്നിട്ടു നിൽക്കുന്നത്. നല്ല ചൂടോടെ കഴിക്കാൻ രുചികരമായ ഒരു ‘സൂപ്പി ഡിഷ്’.

ഞങ്ങളുടെ വീട്ടിൽ ഞാനും ഇളയ മകൻ നാരായണനുമാണ് പാസ്തയുടെ ആരാധകർ. മൂന്നുനേരം പാസ്ത കിട്ടിയാലും ഞങ്ങൾ മടുപ്പു കൂടാതെ കഴിക്കും. പക്ഷേ, വണ്ണം കുറയ്ക്കാൻ നോക്കുന്നവർക്ക് പറ്റിയ ഭക്ഷണമല്ല എന്നുള്ളതുകൊണ്ടുമാത്രം പാസ്തയുണ്ടാക്കൽ ഞാനിപ്പോൾ കുറച്ചിരിക്കുകയാണ്.

ഇഷ്ടമുള്ള പച്ചക്കറികൾ ചേർക്കാം എന്നതാണ് ഈ വിഭവത്തിന്റെ പ്രത്യേകത. മക്കൾ കഴിക്കാൻ മടിക്കുന്ന പച്ചക്കറികളെല്ലാം ഞാനിതിൽ പൊടിപൊടിയായി അരിഞ്ഞുചേർക്കും. ബാക്കി വിഭവങ്ങളിലെ പച്ചക്കറികൾ എടുത്തു മാറ്റിയാലും പാസ്തയിലേത് എടുത്തു മാറ്റാൻ അവർ മിനക്കെടാറില്ല.

പച്ചക്കറികൾക്കു പകരം ചിക്കനും ബീഫും ചേർത്തു പാസ്തയുണ്ടാക്കാം. അതുപോലെ തക്കാളി മാത്രം ചേർത്തും രുചികരമായ പാസ്തയുണ്ടാക്കാം. ഓരോ വീട്ടമ്മമാരുടെയും മനോധർമമനുസരിച്ചു എന്തു വേണമെങ്കിലും ചേർക്കാമെന്നു ചുരുക്കം. വെളിച്ചെണ്ണ ഇതിന്റെ രുചിയുമായി ഒത്തുപോകാത്തതുകൊണ്ട് വെണ്ണയോ മറ്റു ഓയിലു കളോ ഉപയോഗിക്കുന്നതാണ് നല്ലത്.