ചികിത്സിച്ചു ഭേദമാക്കാൻ ബുദ്ധിമുട്ടുള്ള രോഗമാണു കാൻസർ എന്നാണു പൊതുവേയുള്ള ധാരണ. എന്നാൽ തൈറോയ്ഡ് കാൻസർ അങ്ങനെയല്ല ; ലളിതമായും വളരെ കുറവു ചികിത്സകളിലൂടെയും ഭേദമാക്കാനാകുന്ന കാൻസറാണ്. തൈറോയ്ഡ് കാൻസറിൽ, തൈറോയ്ഡ് ഗ്രന്ഥിയിലെ കോശങ്ങൾ അനിയന്ത്രിതമായി വളർന്ന് ഒരു ട്യൂമറായി രൂപാന്തരപ്പെടുന്നു. മറ്റു കാൻസറുകളെ അപേക്ഷിച്ചു തൈറോയ്ഡ് കാൻസറുകളുടെ വളർച്ച സാവധാനത്തിലായിരിക്കും. കഴുത്തിൽ മാത്രമായി അത് ഒതുങ്ങി നിൽക്കുകയും ചെയ്യും.
തൈറോയ്ഡ് കാൻസറുകൾ പലതരമുണ്ട്. ഓരോന്നിന്റെയും വളർച്ച വ്യത്യസ്ത തരത്തിലായിരിക്കും. ചികിത്സാരീതിയും അവയുടെ സ്വഭാവമനുസരിച്ചു വ്യത്യാസപ്പെട്ടിരിക്കും.
∙ പാപ്പിലറി തൈറോയ്ഡ് കാൻസർ-ഏറ്റവും വ്യാപകമായി കാണുന്ന ഈ തൈറോയ്ഡ് അർബുദം സാധാരണയായി യുവജനങ്ങളിലാണു കാണപ്പെടുക. സാവധാനമാണ് ഇതു വളരുക. മികച്ച ചികിത്സാവിജയം സാധ്യമായ അർബുദമാണിത്. തൈറോയ്ഡ് ഹോർമോൺ ഉൽപാദിപ്പിക്കുന്ന കോശങ്ങളായ ഫോളികുലർ കോശങ്ങളിലാണ് ഈ കാൻസറിന്റെ തുടക്കം.
∙ ഫോളികുലർ തൈറോയ്ഡ് കാൻസർ-പാപ്പിലറി തൈറോയ്ഡ് കാൻസർ പോലെ സാവധാനം വളരുന്നതും മികച്ച ചികിത്സാവിജയം ലഭിക്കുന്നതുമായ കാൻസറാണ് ഇതും. എന്നാൽ, പാപ്പിലറി തൈറോയ്ഡ് കാൻസറിൽ നിന്നു വ്യത്യസ്തമായി മറ്റു സ്ഥാനങ്ങളിലേക്ക്- ശ്വാസകോശങ്ങളിലേക്കും എല്ലുകളിലേക്കുമൊക്കെ- ഈ കാൻസർ പടർന്നേക്കാം. ഫോളികുലർ കോശങ്ങളിൽനിന്നാണ് ഇതിന്റെയും തുടക്കം.
∙ മെഡുല്ലറി തൈറോയ്ഡ് കാൻസർ- അപൂർവമായി കാണപ്പെടുന്ന കാൻസറാണിത്. തൈറോയ്ഡ് ഗ്രന്ഥിയിലെ പാരാഫോളികുലർ കോശങ്ങളിലാണു (സി കോശങ്ങൾ) തുടക്കം. കാൽസ്യത്തിന്റെ അളവു നിയന്ത്രിക്കുന്ന കാൽസിടോണിൻ എന്ന ഹോർമോൺ ഉൽപാദിപ്പിക്കുന്നതു മേൽപറഞ്ഞ കോശങ്ങളാണ്. ജനിതകമായ ചില രോഗങ്ങൾ കൊണ്ടും ഇത്തരം കാൻസറുകൾ ഉണ്ടാകാറുണ്ട്. അതുകൊണ്ടു പാരമ്പര്യസാധ്യത തള്ളിക്കളയരുത്.
∙ അനാപ്ലാസ്റ്റിക് തൈറോയ്ഡ് കാൻസർ- തൈറോയ്ഡ് കാൻസറുകളിൽ അത്ര സാധാരണമല്ലാത്തതും എന്നാൽ തീവ്രമായി ബാധിക്കുന്നതുമായ അർബുദമാണിത്. അതി വേഗത്തിൽ പടരുന്ന ഈ അർബുദത്തിന്റെ ചികിത്സയും വെല്ലുവിളി നിറഞ്ഞതാണ്. വിവിധ ചികിത്സാരീതികളെ സമന്വയിപ്പിച്ചുള്ള സമീപനങ്ങളാണിതിന് ആവശ്യം. സാധാരണയായി പ്രായം ചെന്നവരിലാണ് ഇത്തരം കാൻസർ കാണപ്പെടുക.
എന്തുകൊണ്ടു വരുന്നു?
മിക്ക തൈറോയ്ഡ് കാൻസറുകളും വരാനുള്ള കൃത്യമായ കാരണം ഇതുവരെ കണ്ടെത്തിയിട്ടില്ല. എങ്കിലും കാൻസർ സാധ്യത കൂട്ടുന്ന ചില ഘടകങ്ങളെ തിരിച്ചറിഞ്ഞിട്ടുണ്ട്.
∙ ലിംഗം: താരതമ്യേന സ്ത്രീകളിലാണു പുരുഷന്മാരേക്കാൾ തൈറോയ്ഡ് കാൻസർ കണ്ടുവരാറുള്ളത്. സ്ത്രീകളിലെ ഹോർമോണുകളുടെ പ്രവർത്തനം സ്വാധീനിക്കുന്നുണ്ടാകാം എന്നാണു നിഗമനം.
∙ പ്രായം: ഏതുതരം തൈറോയ്ഡ് കാൻസറാണെന്നതിന് അനുസരിച്ച് അർബുദം വരുന്ന പ്രായം വ്യത്യാസപ്പെടും. പാപ്പിലറി, ഫോളികുലർ കാൻസറുകൾ 30 വയസ്സിനും 50 വയസ്സിനും ഇടയിലുള്ളവരിലാണു സാധാരണ കണ്ടുവരുന്നത്. 60-നു മേൽ പ്രായമുള്ളവരെയാണ് അനാപ്ലാസ്റ്റിക് കാൻസർ ബാധിക്കുക.
∙ റേഡിയേഷൻ: തല, കഴുത്തു തുട ങ്ങിയ ഭാഗങ്ങളിൽ അയണൈസിങ് റേഡിയേഷൻ ഏറ്റവരിൽ തൈറോയ്ഡ് കാൻസർ വരാനുള്ള സാധ്യത ഏറെയാണ്. ഇതു മറ്റു രോഗങ്ങളുടെ ചികിത്സയുടെ ഭാഗമായുള്ള റേഡിയേഷൻ തെറപ്പി കൊണ്ടോ പരിസ്ഥിതിപരമായ സ്രോതസ്സുകളിൽ നിന്നോ ആകാം. കുട്ടിക്കാലത്ത് ഇത്തരം റേഡിയേഷനുകൾ ഏൽക്കാനിടയായാൽ ഭാവിയിൽ കാൻസർ വരാനുള്ള സാധ്യത ഏറെയാണ്.
∙ പാരമ്പര്യവും ജനിതക തകരാറുകളും: മൾട്ടിപ്പിൾ എൻഡോക്രൈൻ നിയോപ്ലാസിയ ടൈപ്പ് 2 (പുരുഷൻമാരിൽ), ഫമിലിയൽ മെഡുല്ലറി തൈറോയ്ഡ് കാർസിനോമ (എഫ്എം ടിസി), കൗഡൻ സിൻഡ്രം തുടങ്ങിയ അപൂർവ ജനിതകരോഗങ്ങളുള്ളവരിൽ തൈറോയ്ഡ് കാൻസർ
വരാനുള്ള സാധ്യത കൂടുതലാണ്.
∙ അയഡിൻ: ഭക്ഷണത്തിലൂടെ ശരീരത്തിലെത്തുന്ന അയഡിൻ ചില തൈറോയ്ഡ് കാൻസറുകളുടെ
കാര്യത്തിൽ നിർണായക സ്വാധീനം ചെലുത്തുന്നുണ്ട്. അയഡിൻ അഭാവം ഉള്ള പ്രദേശങ്ങളിലുള്ളവരിലും അമിതമായി അയഡിൻ കഴിക്കുന്നവരിലും ചിലതരം തൈറോയ്ഡ് കാൻസറുകൾ വ്യാപകമായി കാണുന്നു. കൃത്യ അളവിൽ അയഡിൻ നിലനിർത്തുന്നതാണു തൈറോയ്ഡ് ഗ്രന്ഥിയുടെ ആരോഗ്യത്തിന് ഉത്തമം.
∙ അർബുദമല്ലാത്ത രോഗാവസ്ഥകൾ-തൈറോയ്ഡ് ഗ്രന്ഥിയിൽ വരുന്ന തടിപ്പുകൾ ( നൊഡ്യൂളുകൾ) മിക്കതും അർബുദമല്ല, അർബുദസാധ്യതയ്ക്ക് ഇടയാക്കുകയുമില്ല. എന്നാൽ, മൾട്ടി നോഡുലർ ഗോയിറ്റർ, ഹാഷിമോട്ടോസ് തൈറോയിഡൈറ്റിസ് (ഓട്ടോ ഇമ്യൂൺ തൈറോയ്ഡ് ഡിസീസ്) തുടങ്ങിയ രോഗാവസ്ഥകളുള്ളവരിൽ തൈറോയ്ഡ് കാൻസർ വരാനുള്ള സാധ്യത അൽപം കൂടുതലാണെന്നു കണ്ടിട്ടുണ്ട്.
മുഴയും സ്വരവ്യത്യാസവും
പ്രാരംഭ ഘട്ടത്തിൽ തൈറോയ്ഡ് കാൻസർ പ്രത്യേകിച്ചു ലക്ഷണങ്ങളൊന്നും കാണിക്കണമെന്നില്ല. എന്നാൽ വളരുന്നതിനനുസരിച്ച് അവ ചില ലക്ഷണങ്ങൾ കാണിക്കും.
കഴുത്തിൽ തടിപ്പോ മുഴയോ പ്രത്യക്ഷപ്പെടുക, ശബ്ദത്തിലുണ്ടാകുന്ന വ്യത്യാസം, വിഴുങ്ങുന്നതിനും ശ്വാസമെടുക്കുന്നതിനും ബുദ്ധിമുട്ട് അനുഭവപ്പെടുക, കഴുത്തിലും തൊണ്ടയിലും വേദന തുടങ്ങിയവയൊക്കെ തൈറോയ്ഡ് കാൻസറിന്റെ ലക്ഷണങ്ങളായേക്കാം. ഈ ലക്ഷണങ്ങൾ കണ്ടെന്നുവച്ച് അതു തൈറോയ്ഡ് കാൻസറാണെന്ന് ഉറപ്പിക്കാനും പറ്റില്ല. ഇത്തരം ലക്ഷണങ്ങൾ കണ്ടാൽ വിശദമായ വൈദ്യപരിശോധനയ്ക്കു വിധേയമാകുന്നതാണ് അഭികാമ്യം.
സർജറിയും മറ്റു ചികിത്സകളും
അർബുദത്തിന്റെ തരം, ഘട്ടം, രോഗിയുടെ പ്രായം, ആരോഗ്യാവസ്ഥ തുടങ്ങി ഒട്ടേറെ ഘടകങ്ങൾ പരിഗണിച്ചാണു ചികിത്സ തീരുമാനിക്കുക.
മിക്കവാറും തൈറോയ്ഡ് കാൻസറുകളിലും പ്രഥമവും ഏറ്റവും നിർണായകവുമായ ചികിത്സ സർജറിയാണ്. ലോബെക്‌ടമി (തൈറോയ്ഡ് ഗ്രന്ഥിയുടെ ഒരു ഭാഗം നീക്കം ചെയ്യുക) മുതൽ തൈറോഡക്ടമി (തൈറോയ്ഡ് ഗ്രന്ഥി മുഴുവനായും നീക്കം ചെയ്യുക) വരെ ഇതിൽ ഉൾപ്പെടുന്നു. ലിംഫ് നോഡിലേക്ക് അർബുദം പടർന്നതായി സംശയമുള്ളപ്പോൾ ലിംഫ് നോഡ് ഡിസക്‌ഷൻ (കഴുത്തിന്റെ സമീപഭാഗങ്ങളിലെ ലിംഫ് നോഡ് നീക്കം ചെയ്യൽ) എന്ന ശസ്ത്രക്രിയയും നടത്താറുണ്ട്.
പാപ്പിലറി കാൻസർ, ഫോളിക്കുലർ തൈറോയ്ഡ് കാൻസർ എന്നിവയുടെ ചികിത്സയുടെ ഭാഗമായി തൈറോയ്ഡ് ഗ്രന്ഥി പൂർണമായോ ഭാഗികമായോ നീക്കിയ ശേഷം, കാൻസർ കോശങ്ങളെ പൂർണമായും ഇല്ലാതാക്കാൻ റേഡിയോ ആക്ടീവ് അയഡിൻ മരുന്നുകൾ നൽകാറുണ്ട്.
തൈറോയ്ഡ് ഗ്രന്ഥി പൂർണമായും നീക്കം ചെയ്തവർ ജീവിതകാലം മുഴുവൻ തൈറോയ്ഡ് ഹോർമോൺ റീപ്ലേസ്മെന്റ് തെറപ്പിക്കു വിധേയരാകേണ്ടി വരും. ഇവ കൂടാതെ അപൂർവമായി എക്സ്‌റ്റേണൽ ബീം റേഡിയേഷൻ തെറപ്പി, ടാർഗറ്റഡ് തെറപ്പി, കീമോതെറപ്പി എന്നിവയും ഉപയോഗിക്കാറുണ്ട്.
നേരത്തേ തിരിച്ചറിയുകയും ചികിത്സ തുടങ്ങുകയും ചെയ്താൽ മിക്ക തൈറോയ്ഡ് കാൻസറുകളും പൂർണമായും ഭേദമാക്കാം.
ഡോ. സൗരഭ് രാധാകൃഷ്ണന്‍
അസോ. പ്രഫസര്‍, മെഡിക്കല്‍ ഒാങ്കോളജി
അമൃത ഹോസ്പിറ്റല്‍
കൊച്ചി
