ബ്രൂവറികൾക്ക് പ്രശസ്തമായ ജർമൻ നഗരത്തിൽ ആവേശം നുരഞ്ഞുപൊന്തുന്നു, ലോകത്തെ ഏറ്റവും വലിയ ജനകീയ ഉത്സവങ്ങളിലൊന്നായ ഒക്ടോബർ ഫെസ്റ്റിന് തുടക്കമായി

ഈ വർഷത്തെ ഒക്ടോബർഫെസ്റ്റിന് തുടക്കമായിട്ട് രണ്ട് ദിവസമായി. ബ്രൂവറികളുടെ നഗരമായ മ്യൂണിച്ചിലെ തെരേസിയൻവീസിൽ ബ്രൂവറികളൊരുക്കുന്ന പന്തലുകളിലേക്ക് ലോകത്തിന്റെ പല ഭാഗത്തു നിന്നുള്ള ലക്ഷക്കണക്കിന് ആളുകൾ ഒഴുകിക്കൊണ്ടിരിക്കുന്നു. ഇത് ഒക്ടോബർ അഞ്ച് വരെ തുടരും... കഴിഞ്ഞ വർഷത്തെ ഒക്ടോബർഫെസ്റ്റിലെ നേർ അനുഭവങ്ങൾ മനോരമ ട്രാവലറിലൂടെ പങ്കിടുന്നു സ്വീഡനിൽ താമസിക്കുന്ന മലയാളിയും സഞ്ചാരിയുമായ ജിനു സാമുവൽ.

സെന്റ് പോൾ പള്ളിയിലേക്ക്

സെപ്റ്റംബർ 21 രാവിലെ ഹക്കർബ്രൂക്കെ സ്‌റ്റേഷനിൽ ട്രെയിൻ ഇറങ്ങി സെന്റ്പോൾ പള്ളി ലക്ഷ്യമാക്കി നടന്നു. അണപൊട്ടി ഒഴുകുന്ന ജനക്കൂട്ടത്തെ നിയന്ത്രിക്കാൻ പൊലീസ് നന്നേ പാടുപെടുന്നുണ്ട്. വഴിയുടെ ഇരുവശവും ബാരിക്കേഡുകൾ തീർത്തു പരേഡിനായി പാത ഒരുക്കി കാത്തു നിൽക്കുകയാണവർ. ലോകത്തെ വലിയ ഫോക്ക് ഫെസ്റ്റിവലായ ഒക്ടോബർ ഫെസ്റ്റിനു ലോകമൊന്നാകെ ജർമനിയിലേക്ക് ഒഴുകുന്ന രണ്ടാഴ്ചയ്ക്കു തുടക്കം കുറിക്കുന്ന ദിവസമാണ്. ഒക്ടോബർ ഫെസ്റ്റിന്റെ ഉദ്ഘാടനത്തെ അടയാളപ്പെടുത്തുന്ന ഐൻസുഗ് ഡെർ വീസ്ൻവിർട്ടെ (Einzug der Wiesnwirte) പരേഡിന് സാക്ഷ്യം വഹിക്കാൻ സുഹൃത്തുക്കളോടൊപ്പം പള്ളിയുടെ മുന്നിലുള്ള തെരുവോരത്ത് ഇടംപിടിച്ചു. ‌‌‍

ജോസഫ്സ്പിറ്റൽസ്ട്രാസയിൽ നിന്ന് ഔദ്യോഗിക ഒക്‌ടോബർ ഫെസ്റ്റ് ഗ്രൗണ്ടായ തെരേസിയൻവീസിലേക്ക് പരേഡ് നീങ്ങുന്നത് ഈ വഴിയാണ്. ജർമൻ നാടോടിവസ്ത്രമാണ് ഡിൻഡൽ (dirndl). ആൽപ്സ് പർവതനിരയോട് ചേർന്ന് ജർമൻ സംസാരിക്കുന്ന നാടുകളിൽ പ്രസിദ്ധമാണ് സ്ത്രീകളുടെ ഈ വേഷം. 16–18 നൂറ്റാണ്ടുകളിൽ പ്രചാരത്തിലുണ്ടായിരുന്ന ഇത് ഒക്ടോബർഫെസ്റ്റിന്റെ പ്രധാന വേഷവിധാനങ്ങളിൽ ഒന്നാണ്. പാവാടയും ബ്ലൗസും പുറംകുപ്പായവും ചേർന്ന ഈ വസ്ത്രം ധരിച്ച ജർമൻ സുന്ദരിമാർ തെരുവിന്റെ അഴക‌് വർധിപ്പിച്ചു. തുകലിൽ നിർമിച്ച പരമ്പരാഗത ഷോർട്ട്സുകളാണ് ലേഡാഹൊസൻ. തെക്കൻ ജർമനിയിലെ ബവേറിയ , ഓസ്ട്രിയ, സ്വിറ്റ്സർലൻഡിന്റെ ചില ഭാഗങ്ങളിൽ ഒക്കെ പ്രചാരത്തിലുണ്ടായിരുന്ന പുരുഷ വസ്ത്രമാണ് ഇത്. വൃത്തിയാക്കാൻ എളുപ്പമുള്ളതിനാൽ കൃഷി, വേട്ട, കുതിരസവാരി തുടങ്ങിയ ജോലികളിൽ ഏർപ്പെടുന്നവരാണ് ധരിച്ചിരുന്നത്. ഒക്ടോബർഫെസ്റ്റിനെത്തുന്ന പുരുഷന്മാരിൽ ഭൂരിഭാഗവും ധരിച്ചിരിക്കുന്നത് ഈ വേഷമാണ്.

മേള, സാമ്പത്തിക മേള

1810 ഒക്ടോബര്‍ 12നാണ് ആദ്യമായി ജര്‍മനിയില്‍ ഒക്ടോബര്‍ ഫെസ്റ്റ് ആഘോഷിച്ചത്. രാജാവായിരുന്ന ലുഡ്‍വിക് ഒന്നാമന്റെ വിവാഹ വിളംബരമായിട്ടായിരുന്നു തുടക്കം. മ്യൂണിക്കിലെ ജനങ്ങൾക്കായി ഒക്ടോബർ 12നു നടത്തിയ ഈ ആഘോഷത്തിൽ നിരവധി ആളുകളാണ് പങ്കെടുത്തത്. അന്ന് ആഘോഷം നടത്തിയ ഇടം രാജ്ഞിയുടെ പേരുമായി ബന്ധപ്പെടുത്തി തെരേസിയൻവീസ് എന്ന പേരിൽ അറിയപ്പെട്ടു. ഇന്നും ആഘോഷ വേദി ആ പേരിലാണ് അറിയപ്പെടുന്നത്.

കൃത്യം പതിനൊന്നു മണിക്ക് പരേഡ് ആരംഭിച്ചു. മ്യൂണിക്ക് നഗരപരിധിയിലുള്ള ബ്ര്യുവറികൾ അണിയിച്ചൊരുക്കുന്ന പരേഡിനെ വർണാഭമാക്കുന്നത് അലങ്കരിച്ച കുതിരവണ്ടികൾ, ബ്രൂവറി ഫ്ലോട്ടുകൾ, പരമ്പരാഗത സംഗീതജ്ഞർ, പരമ്പരാഗത ബവേറിയൻ വസ്ത്രങ്ങൾ ധരിച്ചവർ ചേർന്നാണ്. പരേഡ് തെരേസിയൻവീസിൽ എത്തുന്നതോടുകൂടി ഒക്ടോബർ ഫെസ്റ്റ് ആരംഭിക്കുന്ന ചടങ്ങുകൾക്ക് തുടക്കമാകും.

മ്യൂണിക്ക് മേയർ ആദ്യത്തെ കെഗ് തുറന്നു "O' zapft is" പറയുന്നതോടുകൂടിയാണ് ഒക്ടോബർ ഫെസ്റ്റ് ഔദ്യോഗികമായി ആരംഭിക്കുന്നത്. മേയർ ആദ്യത്തെ ബാരൽ ബീയർ തുറന്നുകഴിഞ്ഞ് മാത്രമേ മറ്റുള്ളവർക്ക് ബീയർ നൽകി തുടങ്ങുകയുള്ളു. പരേഡ് കടന്നു പോയ ശേഷം തെരേസിയൻവീസിലേക്ക് തിടുക്കത്തിൽ ഓടി. പരമ്പരാഗത വസ്ത്രങ്ങൾ ധരിച്ച ആയിരങ്ങളുടെ കൂട്ടയോട്ടമായി തെരുവ് മാറി. സഞ്ചാരികളെ കാത്തിരിക്കുന്ന ടെന്റുകളൊന്നിൽ കയറിപ്പറ്റുകയാണ് ലക്ഷ്യം.

ഒക്ടോബർ ഫെസ്റ് മ്യൂണിക്ക് നഗരത്തിന്റെ സാമ്പത്തിക നട്ടെല്ലാണ്. ഏഴു ദശലക്ഷത്തോളം സഞ്ചാരികൾ ഏതാണ്ട് ഒന്നേകാൽ ബില്യൺ യൂറോ ചെലവഴിക്കുന്നു എന്നാണ് മ്യൂണിക്കിലെ ലേബർ ആൻഡ് ഇക്കണോമിക്ക്സ് ഡിപ്പാർട്ട്മെന്റ് പുറത്തുവിട്ട കണക്കുകൾ സൂചിപ്പിക്കുന്നത്.

അതിനുപുറമെ നഗരത്തിനു പുറത്തുനിന്നും ആഘോഷത്തിനെത്തുന്നവർ അഞ്ഞൂറ്റിയഞ്ചു ദശലക്ഷം യൂറോ താമസത്തിനായി ചെലവഴിക്കുന്നു. 12000 മുതൽ 13000 തൊഴിലവസരങ്ങൾ ഈ മൂന്നാഴ്ചകളിൽ മ്യൂണിക്കിൽ മാത്രമായി സൃഷ്ടിക്കപ്പെടുന്നു. അതിലൂടെ ഓരോരുത്തരും നേടുന്നത് അയ്യായിരം യൂറോയോളമാണ്.

ആഘോഷ ടെന്റുകൾ

ചെറുതും വലുതുമായ ടെന്റുകളിലാണ് ആഘോഷം നടക്കുന്നത്. കൂറ്റൻ ടെന്റുകൾ ഒരുക്കുന്നതും ആളുകളെ നിയന്ത്രിക്കുന്നതും എല്ലാം ബ്രൂവറികളാണ്. ചെറുതും വലുതുമായ മുപ്പതിൽപരം ടെന്റുകളിൽ ഇരിപ്പിടം ഉറപ്പാക്കണമെങ്കിൽ ഒരുവർഷം മുൻപേ ബുക്ക് ചെയ്യണം എന്നറിയുമ്പോൾ ഈ ആഘോഷത്തിന്റെ പെരുമ മനസ്സിലാവും. ബുക്കിങ് ആവശ്യമില്ലാത്ത ചുരുക്കം ഇരിപ്പിടം ലക്ഷ്യമാക്കിയാണ് ജനങ്ങളെല്ലാം ഓടുന്നത്. വലിയ ടെന്റുകളിൽ ആറായിരം ഇരിപ്പിടമുണ്ട് എന്നറിയുമ്പോൾ ടെന്റുകളുടെ വലുപ്പം ഊഹിക്കാമല്ലോ....

‌

കൂട്ടയോട്ടത്തിന്റെ മുന്നിൽ ഓടിയ ഞങ്ങൾ ടെന്റുകളിലൊന്നിൽ കയറിപ്പറ്റി. പൗളനെർ ബ്രൂവറി നടത്തുന്ന ടെന്റിൽ സീറ്റ് മുൻകൂട്ടി ബുക്ക് ചെയ്തിരുന്ന ആയിരങ്ങൾ ഇരിപ്പുറപ്പിച്ചിരുന്നു. 1634 ൽ സ്ഥാപിച്ച ഈ ബീയർ നിർമാണശാല ജർമനിയിലെ പഴയകാല ബ്രൂവറികളിൽ ഒന്നാണ്. പൗളനെർ കൂടാതെ അഗസ്റ്റിനർ, ഹാക്കർ പീഷോർ, ഹൂഫ്ബ്രായു, ലൂവൻബ്രായൂ, സ്പാട്ടൻ തുടങ്ങിയ ബീയർ നിർമാണശാലകളുടെ ടെന്റുകളും ഈ ആഘോഷത്തിന്റെ ഭാഗമായുണ്ട് ടെന്റിനകത്തു ആദ്യത്തെ കെഗിൽ നിന്നുള്ള ബീയർ സൗജന്യമായി നൽകുന്ന തിരക്കാണ്.

ബെഞ്ചും ഡെസ്ക്കുമാണ് ഇരിപ്പിടങ്ങൾ. ടെന്റിൽ പരതിയിട്ടു ഒഴിഞ്ഞ സീറ്റുകൾ ഒന്നും കാണുന്നില്ല. മിക്കതും നിറഞ്ഞു ആളുകൾ ഇരിക്കുന്നു. ഒഴിഞ്ഞു കിടക്കുന്നത് മുൻകൂട്ടി ബുക്ക് ചെയ്തവരുടെ ഇരിപ്പിടങ്ങളാണ്. ഫ്രാൻസിൽ നിന്നു വന്ന കൂട്ടരോടൊപ്പം ഞങ്ങൾ ഇടം പിടിച്ചു. മ്യൂണിക്കിൽ സ്ഥിരതാമസമായ മലയാളി ഡോക്ടർ പ്രഭയും ഭർത്താവ് യൂർഗനും ഞങ്ങളോടൊപ്പം കൂടി. ബാൻഡ് സംഘങ്ങൾ വലിയ സ്റ്റേജിൽ നിന്നുകൊണ്ട് ആഘോഷത്തിന് മേളക്കൊഴുപ്പേകുന്നു.

ബീയറും ഭക്ഷണവും വിളമ്പാൻ പരമ്പരാഗത വേഷങ്ങളിൽ ജർമൻ സുന്ദരികളും സുന്ദരന്മാരും മത്സരിക്കുന്നു. എല്ലാത്തിനും സാധാരണയെക്കാൾ ഇരട്ടി വില. ഈ ആഘോഷത്തിലെ ഏറ്റവും പ്രധാന ഐറ്റം ബീയർ തന്നെയാണ്. മുൻ വർഷത്തെ ആഘോഷത്തിൽ ഏകദേശം എട്ടു ദശലക്ഷം ലിറ്റർ ബീയർ വിറ്റിരുന്നു. ഒരു ലിറ്റർ മഗ്ഗുകളിലാണ് ബീയർ വിൽക്കുന്നത്.സർക്കസിലെ അഭ്യാസംപോലെ അഞ്ചും എട്ടും മഗ്ഗ് ബീയർ കയ്യിലെടുത്തുകൊണ്ടാണ് വിളമ്പുകാർ നടക്കുന്നത്. പ്രത്യേക വൈഭവം വേണ്ട ഒരു ജോലി തന്നെ.

പതിനഞ്ചു യൂറോ നൽകി ഒരു ബീയർ വാങ്ങി. വിളമ്പുകാരി ഒരു യൂറോ ടിപ്പും ചോദിച്ചു വാങ്ങി. വിളമ്പുകാർ പലരും ഈ സീസണിൽ മാത്രം സമ്പാദിക്കുന്നത് ലക്ഷങ്ങളാണ്. ബീയർ വിളമ്പുന്നവരെ കൂടാതെ ഒക്ടോബർഫെസ്റ്റിന്റെ പരമ്പരാഗത തൊപ്പികൾ, ജർമ്മൻ ബ്രഡ് ആയ പ്രെറ്റ്‌സെൽ വിൽക്കുന്നവർ, അങ്ങനെ കച്ചവടക്കാർ ഓരോ ടെന്റിനും ഉത്സവാന്തരീക്ഷം നൽകുന്നു. ഇവിടെ വിളമ്പുന്ന ബീയറിനും പ്രത്യേകതകൾ ഏറെയാണ്. ഒക്ടോബർ ഫെസ്റ്റിനായി ബ്രൂവറികൾ വീര്യം കൂടിയ ബീയർ പ്രത്യേകമായി തയാറാക്കുകയാണ് പതിവ്. ‌

ബാൻഡ് സംഘത്തിന്റെ പാട്ട് ഉച്ചത്തിലായതോടുകൂടി പലരും ഇരിപ്പിടത്തിൽ നിന്നും എഴുന്നേറ്റു ബഞ്ചിൽ നിന്നുകൊണ്ടായി നൃത്തം.Ein Prosit, ein Prosit Der Gemutlichkeit Ein Prosit, ein Prosit Der Gemutlichkeit"

ഐൻ പ്രോസിറ്റ് ഗാനത്തോടൊപ്പം എല്ലാവരും ചേർന്നു ബീയർ ഗ്ലാസ്സുകൾ മുട്ടിച്ചു നൃത്തം തുടർന്നു . പല ദേശങ്ങളിൽനിന്നും സംസ്കാരങ്ങളിൽനിന്നും വന്നവർ ഭാഷയുടെയും വർണത്തിന്റെയും അതിരുകൾക്കപ്പുറമായി ആഘോഷിക്കുന്ന നിമിഷങ്ങൾ.

ടെന്റിലെ കുർബാനയും ആചാരവെടിയും

1956 മുതൽ ഒക്ടോബർ ഫെസ്റ്റിലെ ആദ്യ ബുധനാഴ്ച രാവിലെ 9:30 ന് മാർസ്റ്റൽ ടെന്റിൽ എക്യുമെനിക്കൽ ചർച്ച് കുർബാനയും നടത്തും. ടെന്റുകളിൽ ജോലി ചെയ്യുന്നവർക്കും ബീയർ നിർമാണ ശാലയിലെ ജോലിക്കാർക്കും വേണ്ടി നടത്തുന്ന ഈ പ്രാർഥനയിൽ സന്ദർശകർക്കും കയറാം. തെരേസിയൻവീസിലെ ബവേറിയ പ്രതിമയുടെ മുൻപിൽ മുന്നൂറോളം സംഗീതജ്ഞർ നടത്തുന്ന ബാന്റ് ആണ് ഒക്ടോബർഫെസ്റ്റിലെ രണ്ടാമത്തെ ഞായറിന്റെ പ്രത്യേകത. എല്ലാ ടെന്റുകളിലേയും ബാന്റുകൾ ഒത്തുചേർന്ന് ബവേറിയൻ സംഗീതം ആലപിക്കും.

പതിനഞ്ചാം നൂറ്റാണ്ടിന്റെ അവസാനം മുതൽ ബവേറിയയിൽ പരമ്പരാഗതമായി ആചാരവെടി നടത്തിവരുന്നു. ഉയർന്ന പദവിയുള്ള വ്യക്തികളെ ആദരിക്കുന്നതിനും ജനനം, ജന്മദിനങ്ങൾ, പേരിടീൽ എന്നിവ

ആഘോഷിക്കുന്നതിനും ദുഷ്ടാത്മാക്കളെ ഭയപ്പെടുത്താനും ഇത് ഉപയോഗിച്ചിരുന്നു. ഒക്‌ടോബർ ഫെസ്റ്റ് ആരംഭിക്കുന്നതും ആചാരവെടിയോടുകൂടിയാണ്. മ്യൂണിക്ക് മേയർ ആദ്യ ബീയർ ഗ്ലാസിൽ പകരുമ്പോൾ 12 ആചാരവെടി മുഴക്കി മറ്റു ടെന്റുകൾ അത് അറിയിക്കുന്നതോടുകൂടിയാണ് ചടങ്ങുകൾ ആരംഭിക്കുന്നത്. ഒക്‌ടോബർ ഫെസ്റ്റ് അവസാനിക്കുന്നതും ആചാരവെടിയോടു കൂടിയാണ്. അവസാന ദിവസം ഉച്ചയ്ക്ക് 12 മണിക്ക് ബവേറിയയുടെ പ്രതിമക്ക് താഴെയുള്ള പടികളിൽ പരമ്പരാഗത വേഷവിധാനത്തിൽ 60 പുരുഷന്മാരും സ്ത്രീകളും തോക്കുകളുമായി അണിനിരക്കുന്നു. വെടിയുണ്ടകൾക്ക് പകരം കറുത്ത പൊടിയുപയോഗി ആഘോഷ നഗരിയെ ആകെ വെളുത്ത പുകയിൽ മുക്കും.

ഉച്ച മുതൽ രാത്രി വരെ പല ടെന്റുകളിൽ ചെലവഴിച്ച ഞങ്ങൾക്ക് തിരികെ പോകാൻ സമയമായി .ബവേറിയൻ ആൽപ്സിനുപിന്നിൽ സൂര്യനൊളിക്കുമ്പോൾ ഒക്ടോബർഫെസ്റ് വേദിയായ തെരേസിയൻവീസ് സ്വർണനിറത്തിൽ കുളിച്ചു. മങ്ങിപ്പോകുന്ന വെളിച്ചത്തിൽ മിന്നിത്തിളങ്ങുന്ന ബീയർ ടെന്റുകൾക്കുള്ളിൽനിന്നും സഞ്ചാരികളുടെ ചിരിയും അട്ടഹാസവും പടരുന്നു. പരമ്പരാഗത ബവേറിയൻ ബ്രാസ് ബാൻഡുകളുടെ സംഗീതത്തിന് മറ്റൊരു ഭാവം കൈവന്നിരിക്കുന്നു. കൂറ്റൻ റൈഡുകൾ വൈദ്യുതാലങ്കാരത്തിൽ മിന്നിത്തിളങ്ങി. ചിരിയും സംഗീതവും അന്തരീക്ഷത്തിൽ നക്ഷത്രങ്ങളെപ്പോലെ മിന്നിമറയുന്ന കാഴ്ചകൾക്ക് ഒരു നിശ്ശബ്ദ കാവൽക്കാരിയെപോലെ സാക്ഷിയായി ബവേറിയയുടെ കൂറ്റൻ പ്രതിമ തിളങ്ങിനിന്നു