ഗോതമ്പുപായസം, വ്യത്യസ്ത രുചിയില്‍; മനോഹരൻ പിള്ളയുടെ സൂപ്പര്‍ റെസിപ്പി

ആലപ്പുഴ കൈതവനയിലുള്ള കൃഷ്ണ കേറ്ററേഴ്സ് ഉടമ എസ്. മനോഹരൻ പിള്ള കഴിഞ്ഞ 27 വർഷമായി സദ്യകൾ നടത്തുന്നു. ആയിരത്തിലധികം സദ്യകൾ നടത്തിയ മനോഹരൻ പിള്ളയുടെ ബോളി- പാൽപ്പായസം കോമ്പോ സൂപ്പർഹിറ്റ് ആണ്. വനിത വായനക്കാർക്കായി മനോഹരൻ പിള്ള ഒരുക്കുന്നു, ഗോതമ്പുപായസം.

ഗോതമ്പുപായസം

1.    സൂചിഗോതമ്പു നുറുക്ക് (കഞ്ഞി റവ) – 250 ഗ്രാം

2.    ചെറുപയർപരിപ്പ് – 100 ഗ്രാം

3.    ശർക്കര – 700 ഗ്രാം

4.    തേങ്ങ – മൂന്ന്

5.    ജീരകംപൊടി – കാൽ ചെറിയ സ്പൂൺ

6.    ചുക്കുപൊടി – കാൽ ചെറിയ സ്പൂൺ

7.    നെയ്യ് – അഞ്ചു ചെറിയ സ്പൂൺ

8.    ഏലയ്ക്കാപ്പൊടി – കാൽ ചെറിയ സ്പൂൺ

9.    തേങ്ങാക്കൊത്ത് പൊടിയായി അരിഞ്ഞത്         – രണ്ടു വലിയ സ്പൂൺ

    കശുവണ്ടിപ്പരിപ്പ്, ഉണക്കമുന്തിരി – 50 ഗ്രാം വീതം

പാകം ചെയ്യുന്ന വിധം

∙    കഞ്ഞി റവ വൃത്തിയാക്കി വയ്ക്കണം.

∙    ചെറുപയര്‍പരിപ്പ് കരിഞ്ഞുപോകാതെ ചെറുതീയിൽ ചുവക്കെ വറുത്തു വാങ്ങണം.

∙    ഗോതമ്പു റവയും വറുത്ത പരിപ്പും യോജിപ്പിച്ചു മൂന്നു തവണ നന്നായി  കഴുകി വാരിയ ശേഷം  ഒന്നര ലീറ്റർ വെള്ളവും ചേർത്ത് പ്രഷർകുക്കറിലാക്കി അടുപ്പത്തു വയ്ക്കുക.

∙    മൂന്നു വിസിൽ വന്ന ശേഷം തീ അണച്ച് ആവി പോകാനായി വയ്ക്കണം.

∙    ശർക്കര ഉരുക്കി അരിച്ചെടുക്കണം.

∙    തേങ്ങ ചുരണ്ടി മിക്സിയിലാക്കി വെള്ളം ചേർക്കാതെ ചതച്ച ശേഷം അൽപം വെള്ളം തളിച്ചു പിഴിഞ്ഞ് ഒരു ഗ്ലാസ് ഒന്നാംപാൽ എടുത്തു വയ്ക്കണം.

∙    അതേ തേങ്ങയിൽ രണ്ടര ഗ്ലാസ് വെള്ളം ചേർത്തടിച്ചു പിഴിഞ്ഞു രണ്ടാംപാലും എടുത്തു വയ്ക്കണം.

∙    ഗോതമ്പും പരിപ്പും വേവിച്ച മിശ്രിതം, ആവശ്യമെങ്കിൽ അൽപം വെള്ളവും ചേർത്തു വലിയ ഉരുളിയിലാക്കുക.

∙    ഇത് അടുപ്പത്തു വച്ചു ശർക്കര ഉരുക്കി അരിച്ചതും ചേർത്തിളക്കി കട്ടയുടച്ച് ഇളക്കിക്കൊടുക്കണം.

∙    തിളയ്ക്കുന്നതിനു തൊട്ടുമുൻപ് ജീരകംപൊടി ചേർത്തു നന്നായി ഇളക്കി യോജിപ്പിക്കുക.

∙    ഇതിലേക്കു രണ്ടാംപാൽ ചേർത്തിളക്കി യോജിപ്പിച്ച ശേഷം ചുക്കുപൊടിയും ചേർത്തിളക്കണം.

∙    ഒരു ചെറിയ സ്പൂൺ നെയ്യും ചേർത്തിളക്കി നന്നായി കുറുകി വരുമ്പോൾ തീ അണയ്ക്കണം.

∙    ഇതിലേക്ക് ഒന്നാംപാലും ഏലയ്ക്കാപ്പൊടിയും ചേർത്തിളക്കി വയ്ക്കുക.

∙    ബാക്കി നെയ്യ് ചൂടാക്കി തേങ്ങാക്കൊത്തു വറുത്ത ശേ ഷം കശുവണ്ടിപ്പരിപ്പും ഉണക്കമുന്തിരിയും വറുത്തു നെയ്യോടു കൂടി പായസത്തിൽ ചേർത്തു ചൂടോടെ വിളമ്പാം.