ഫോട്ടോ : വിഷ്ണു നാരായണൻ
ഒരു കോഴി മുഴുവനായി നിർത്തി പൊരിച്ചത് എന്നൊക്കെ കേട്ടിട്ടുണ്ട്. എന്നാൽ ഒരു കോഴിയെ അങ്ങനെത്തന്നെ കറി വച്ചാലോ? ഇതാ ഫുൾ ചിക്കൻ കറിയുടെ കിടിലൻ റെസിപ്പി. നിങ്ങളും വീട്ടിൽ ഇതൊന്ന് പരീക്ഷിച്ചു നോക്കൂ...
ചേരുവകൾ
1. ചിക്കൻ – ഒന്ന്, മുഴുവനോടെ (800 ഗ്രാമിൽ താഴെ)
2. തൈര് – രണ്ടു വലിയ സ്പൂൺ
ഇഞ്ചിയും വെളുത്തുള്ളിയും അരച്ചത് – ഒരു വലിയ സ്പൂൺ
മുളകുപൊടി – അര ചെറിയ സ്പൂൺ
മഞ്ഞൾപ്പൊടി – അര ചെറിയ സ്പൂൺ
ഉപ്പ് – പാകത്തിന്
3. വെളിച്ചെണ്ണ – പാകത്തിന്
4. സവാള – മൂന്നു വലുത്, പൊടിയായി അരിഞ്ഞത്
ഇഞ്ചിയും വെളുത്തുള്ളിയും അരച്ചത് – ഓരോ ചെറിയ സ്പൂൺ
5. മഞ്ഞൾപ്പൊടി – അര ചെറിയ സ്പൂൺ
മുളകുപൊടി – അര െചറിയ സ്പൂൺ
മല്ലിപ്പൊടി – നാലു വലിയ സ്പൂൺ
6. ഏലയ്ക്ക – മൂന്ന്
ഗ്രാമ്പൂ – മൂന്ന്
കറുവാപ്പട്ട – ഒരിഞ്ചു കഷണം
കുരുമുളക് – ഒരു ചെറിയ സ്പൂൺ
ജീരകം – ഒരു ചെറിയ സ്പൂൺ
പെരുംജീരകം – ഒരു ചെറിയ സ്പൂൺ
കശുവണ്ടിപ്പരിപ്പ്/ബദാം – ആറ്–ഏഴ്
7. തക്കാളി – ഒരു ചെറുത്, പൊടിയായി അരിഞ്ഞത്
പച്ചമുളക് – രണ്ട്, അരിഞ്ഞത്
കറിവേപ്പില – രണ്ടു തണ്ട്
തക്കാളി – ഒന്നിന്റെ പകുതി, അരിഞ്ഞത്
പാകം െചയ്യുന്ന വിധം
∙ ചിക്കൻ മുഴുവനോടെ വൃത്തിയാക്കി, രണ്ടാമത്തെ ചേരുവ പുരട്ടി ഒരു മണിക്കൂർ വയ്ക്കുക.
∙ എണ്ണ ചൂടാക്കി പുരട്ടി വച്ചിരിക്കുന്ന ചിക്കൻ ചേർത്തു ബ്രൗൺ നിറത്തിൽ പൊരിച്ചെടുത്തു മാറ്റി വയ്ക്കണം.
∙ അതേ എണ്ണയിൽ നാലാമത്തെ ചേരുവ ചേർ ത്തു വഴറ്റിയ ശേഷം അഞ്ചാമത്തെ ചേരുവ ചേർത്തു നന്നായി വഴറ്റി വാങ്ങുക. ചൂടാറിയ ശേഷം അരച്ചു വയ്ക്കുക.
∙ ആറാമത്തെ ചേരുവ എണ്ണയില്ലാതെ വറുത്തു പൊടിച്ചു വയ്ക്കണം.
∙ പാനിൽ എണ്ണ ചൂടാക്കി ഏഴാമത്തെ ചേരുവ ചേർ ത്തു വഴറ്റിയ ശേഷം സവാള മിശ്രിതം അരച്ചതും വറുത്തു പൊടിച്ച മസാലയും ചേർത്തു നന്നായി വഴറ്റണം.
∙ ഇതിലേക്കു പൊരിച്ച ചിക്കൻ ചേർത്ത്, അരക്കപ്പ് ചൂടുവെള്ളമൊഴിച്ച്, ചെറുതീയിൽ 15 മിനിറ്റ്, ചാറു കുറുകും വരെ വേവിക്കുക.
∙ മല്ലിയില കൊണ്ട് അലങ്കരിച്ചു വിളമ്പാം.
