മട്ടൺ സ്‌റ്റ്യൂ
1.മട്ടൺ – അരക്കിലോ
2.എണ്ണ – മൂന്ന‌ു വലിയ സ്പൂൺ
3.ഏലയ്ക്ക – മൂന്ന്
ഗ്രാമ്പൂ – നാല്
കറുവാപ്പട്ട – ഒന്നു രണ്ടു ചെറിയ കഷണം
കുരുമുളകു ചതച്ചത് – രണ്ടു ചെറിയ സ്പൂൺ
പച്ചമുളക് – ആറ്, കനം കുറച്ചു നീളത്തിൽ അരിഞ്ഞത്
ഇഞ്ചി – ഒരു ചെറിയ കഷണം, ചതച്ചത്
വെളുത്തുള്ളി – നാല് അല്ലി, ചതച്ചത്
സവാള – രണ്ട്, നീളത്തിൽ അരിഞ്ഞത്
4.മൈദ – കാൽ കപ്പ്
5.ഉപ്പ് – പാകത്തിന്
6.രണ്ടാം പാൽ – അരക്കപ്പ്
ഒന്നാം പാൽ – ഒരു കപ്പ്
7.ഉരുളക്കിഴങ്ങ് – രണ്ട് ഇടത്തരം, ചതുരകഷണങ്ങളാക്കി വേവിച്ചത്
8.കറിവേപ്പില – പാകത്തിന്
മല്ലിയില – പാകത്തിന്
പാകം ചെയ്യുന്ന വിധം
മട്ടൺ കഴുകി ചതുരകഷണങ്ങളാക്കി വയ്ക്കുക.
ഒരു പ്രഷർകുക്കറിൽ എണ്ണയൊഴിച്ചു മൂന്നാമത്തെ ചേരുവ ചേർത്തു വറുത്ത് കോരി വയ്ക്കുക.
ബാക്കി വന്ന എണ്ണയിൽ മൈദ ചേർത്തു ചെറുതീയിൽ വച്ചു തുടരെയിളക്കുക.
ഇതിലേക്കു മട്ടൺ കഷണങ്ങളും വറുത്തു മാറ്റി വച്ചിരിക്കുന്ന ചേരുവകളും ഉപ്പും ചേർത്തു നന്നായി യോജിപ്പിക്കുക.
രണ്ടാം പാൽ ചേർത്തു കുക്കർ അടച്ചുവച്ച് ഇറച്ചി വേവിക്കുക. ഇറച്ചി വെന്തു മൃദുവാകണം.
ഇറച്ചി വെന്ത ശേഷം ഉരുളക്കിഴങ്ങും ഒന്നാം പാലും ചേർത്തു ചാറു കുറുക്കി, എട്ടാമത്തെ ചേരുവ ചേർത്ത്, അടുപ്പിൽ നിന്നു വാങ്ങാം. പാലപ്പത്തിനൊപ്പം വിളമ്പാം.
