അലുമിനിയം, സ്റ്റീൽ പാത്രങ്ങളെ ഉപേക്ഷിച്ച് മൺപാത്രങ്ങളും ഇരുമ്പ് ചട്ടികളും വാങ്ങുന്നത് പുതിയൊരു ആരോഗ്യ ചിന്തയുടെ കൂടി ഭാഗമായിട്ടുണ്ട്.

ചിരട്ട കൊണ്ടുള്ള ഉത്പന്നങ്ങളുടെ ഡിമാൻഡും ഇതേ കാരണത്താൽ കൂടിയിട്ടുണ്ട്. കോട്ടയം പരുത്തുംപാറ സ്വദേശിയായ പി.ജെ. അനിമോൻ്റെ ദൗർബല്യമാണ് ചിരട്ടകൾ കൊണ്ടുള്ള പാത്രങ്ങളുടെയും കൗതുകവസ്തുകളുടെയും നിർമാണം.

നല്ല വലുപ്പമുള്ള ചിരട്ടകൾ തിരഞ്ഞെടുത്ത് ആക്സോ ബ്ലേഡുകൊണ്ട് മുറിച്ച് ആകൃതി വരുത്തി സാൻഡ് പേപ്പർ കൊണ്ട് മിനുസപ്പെടുത്തിയാണ് അനിമോൻ ഇതെല്ലാം ഉണ്ടാക്കുന്നത്. വെള്ളത്തിൽ ഇട്ട് തിളപ്പിച്ച് ഉറപ്പാക്കി, പുറം പോളിഷ് ചെയ്തു ഭംഗിയാക്കുന്നു.
ജഗ്ഗ്, ഗ്ലാസ്, ചിരട്ടപ്പുട്ട് കുറ്റി, തവികൾ എന്നിവയൊക്കെയാണ് അനിയുടെ കൈവശമുള്ള പാത്രങ്ങൾ. പക്ഷികളുടെയും മൃഗങ്ങളുടെയും ചെടികളുടെയും രൂപങ്ങൾ അലങ്കാരത്തിനുപയോഗിക്കാം.

ചിരട്ട കൊണ്ടു നിർമിച്ച നിലവിളക്കാണ് അനിമോന്റെ മറ്റൊരു മാസ്റ്റർ പീസ്. സ്വന്തം ആശയങ്ങൾക്കും ചിന്തകൾക്കും അനുസരിച്ച് രൂപം നൽകിയതിനാൽ ഈ ഉത്പന്നങ്ങൾ എല്ലാം വളരെ വ്യത്യസ്തമാണെന്ന് അനിമോൻ അവകാശപ്പെടുന്നു.
വിലാസം – അനിമോൻ, പള്ളിപ്പറന്പിൽ, പരുത്തുംപാറ, കോട്ടയം