ദിവസവും കാപ്പി കുടിക്കുന്നത് നല്ലതാണോ? കാപ്പിയുടെ 15 ആരോഗ്യ ഗുണങ്ങൾ അറിയാം Preventing Diseases: The Protective Role of Coffee
Mail This Article
ചൂടു കാപ്പിയുടെ സ്വാദ് ഇഷ്ടമല്ലാത്തവര് വിരളമാണ്. തലവേദനയും ഡിപ്രഷനുമൊക്കെ കാപ്പി കുടിച്ച് മാറ്റുന്നവരുമുണ്ട്. അതേസമയം കാപ്പി പതിവായി കുടിക്കുന്നത് ആരോഗ്യത്തിന് നല്ലതാണോ? പലര്ക്കുമുള്ള സംശയമാണ് ഇത്. ഗവേഷണങ്ങൾ സൂചിപ്പിക്കുന്നത് കാപ്പിക്ക് നിരവധി ആരോഗ്യ ഗുണങ്ങൾ ഉണ്ടെന്നാണ്.
കാപ്പിയുടെ 15 ആരോഗ്യ ഗുണങ്ങൾ
1. മൈക്രോബയോമ്സ് കാപ്പിയിലുണ്ട്
കുടലിന് ഗുണകരമായ മൈക്രോബയോമ്സ് കാപ്പിയിലുണ്ട്. ഇതില് പെട്ടെന്ന് ദഹിക്കുന്ന നാരുകളും പ്രീബയോട്ടിക് ഗുണങ്ങളും ഏറെയുണ്ട്. ഒരു ഗ്ലാസ് ഓറഞ്ച് ജ്യൂസിനേക്കാൾ കൂടുതൽ നാരുകൾ കാപ്പിയിലുണ്ട്. കുടലിന്റെ ആരോഗ്യം മെച്ചപ്പെടുത്താന് ഇത് സഹായിക്കും.
2. ബുദ്ധിശക്തി മെച്ചപ്പെടുത്തുന്നു
ദിവസവും കാപ്പി കുടിച്ചാല് നല്ല ഓർമ്മശക്തിയും ശ്രദ്ധയും ഉണ്ടാകുമെന്ന് പഠനങ്ങള് പറയുന്നു. തലച്ചോറിന്റെ ആരോഗ്യത്തെ സ്വാധീനിക്കുന്നതു മൂലം അൽഷിമേഴ്സ് രോഗം വരാനുള്ള സാധ്യത കുറയ്ക്കുകയും ചെയ്യും.
3. പിത്താശയ രോഗ സാധ്യത കുറയ്ക്കുന്നു
കാപ്പി ദിവസവും കുടിക്കുന്നത് പിത്താശയവുമായി ബന്ധപ്പെട്ട രോഗങ്ങള്ക്കുള്ള സാധ്യത കുറയ്ക്കും. പിത്തസഞ്ചിയില് കല്ല് അടിയാതിരിക്കാന് കാപ്പി ഉപയോഗം സഹായിക്കുമെന്ന് പഠനങ്ങള് പറയുന്നു.
4. കാൻസർ സാധ്യത കുറയ്ക്കുന്നു
കാൻസർ സാധ്യത കുറയ്ക്കുന്ന സംയുക്തങ്ങൾ കാപ്പിയിൽ ഉണ്ട്. കഹ്വിയോൾ, കഫെസ്റ്റോൾ എന്നീ രണ്ട് സംയുക്തങ്ങൾ പ്രോസ്റ്റേറ്റ്, വൃക്കയിലെ കാൻസർ കോശങ്ങളുടെ വളർച്ചയെ തടഞ്ഞതായി ഗവേഷണങ്ങള് പറയുന്നു. അതോടൊപ്പം കാപ്പിയുടെ ഉപയോഗം കരൾ, പ്രോസ്റ്റേറ്റ്, സ്തനം, വൻകുടൽ, എൻഡോമെട്രിയൽ കാൻസർ തുടങ്ങിയ ചില അർബുദങ്ങളുടെ അപകടസാധ്യത കുറയ്ക്കുന്നതായി തെളിവുകളുണ്ട്.
5. കോശങ്ങളെ സുഖപ്പെടുത്തുന്നു
ആന്റിഓക്സിഡന്റായ പോളിഫെനോളുകളുടെ പ്രധാന ഉറവിടമാണ് കാപ്പി. ശരീരത്തിന് ചുറ്റുമുള്ള കോശങ്ങൾക്കും ജനിതക വസ്തുക്കൾക്കും കേടുപാടുകൾ വരുത്തുന്നത് തടയാനും നന്നാക്കാനും കാപ്പിയിലെ ആന്റിഓക്സിഡന്റുകൾ സഹായിക്കുന്നു. കുടലില് നല്ല ബാക്ടീരിയകളെ വളര്ത്താനും പോളിഫെനോളുകൾ സഹായിക്കുന്നു.
ഈ ആന്റിഓക്സിഡന്റിന് മെറ്റബോളിക് ഗുണങ്ങളുണ്ട്. ക്ലോറോജെനിക് ആസിഡ് കാൻസർ, പ്രമേഹം, അമിതവണ്ണം എന്നിവയുൾപ്പെടെ നിരവധി അവസ്ഥകളുടെ അപകടസാധ്യത കുറയ്ക്കുമെന്ന് പറയുന്നു.
6. പാർക്കിൻസൺസ് രോഗ സാധ്യത കുറയ്ക്കുന്നു
കാപ്പിയ്ക്ക് ന്യൂറോപ്രൊട്ടക്റ്റീവ് ഗുണങ്ങൾ ഉണ്ട്. ഇത് പാർക്കിൻസൺസ് രോഗം വരാനുള്ള സാധ്യത കുറയ്ക്കും. ഒരു ദിവസം അഞ്ചോ അതിലധികമോ കപ്പ് കാപ്പി കുടിക്കുന്ന ആളുകൾക്ക് അപകടസാധ്യത കുറയുമെന്ന് നിരവധി പഠനങ്ങൾ പറയുന്നു. കാപ്പി കുടിക്കുന്നത് മൂലം പാർക്കിൻസൺസ് രോഗികളില് അസുഖത്തിന്റെ തീവ്രത കുറയ്ക്കുമെന്നും ഗവേഷണങ്ങള് പറയുന്നു.
7. പ്രമേഹത്തിൽ നിന്ന് സംരക്ഷണം
ടൈപ്പ് 2 പ്രമേഹം ഏറ്റവും സാധാരണമായ അവസ്ഥകളിലൊന്നാണ്. 45 വയസിനു മുകളില്, ഉദാസീനമായ ജീവിതശൈലി, അമിതഭാരം ഉള്ളവരിലാണ് ടൈപ്പ് 2 പ്രമേഹം കണ്ടുവരുന്നത്. ദിവസവും 4 കപ്പ് കാപ്പി കുടിക്കുന്ന ആളുകളില് ടൈപ്പ് 2 പ്രമേഹം വരാനുള്ള സാധ്യത കുറവാണ്.
8. ദഹനം മെച്ചപ്പെടുത്തുന്നു
ദഹനം മെച്ചപ്പെടുത്താന് കാപ്പി വളരെ നല്ലതാണ്. ദഹന സംബന്ധിയായ ബുദ്ധിമുട്ട് ഉള്ളവര് കാപ്പി കുടിച്ചു നോക്കൂ മലബന്ധം പോലുള്ള പ്രശ്നങ്ങളെ എളുപ്പത്തില് മറികടക്കാം.
9. ഊർജ്ജം നൽകാൻ കാപ്പി
ശരീരത്തിനു ഊർജ്ജം നൽകാൻ കാപ്പി വളരെ നല്ലതാണ്. ഒരു ദിവസം മുഴുവൻ ഉന്മേഷത്തോടെയിരിക്കാന് രാവിലെ കാപ്പി കുടിച്ച് തുടങ്ങാം. ശാരീരിക പ്രവർത്തനങ്ങള് മെച്ചപ്പെടുത്താന് കാപ്പി കുടി ഉപകരിക്കും.
10. പക്ഷാഘാത സാധ്യത കുറയ്ക്കുന്നു
മിതമായ കാപ്പി ഉപഭോഗം പക്ഷാഘാതം വരാനുള്ള സാധ്യത കുറയ്ക്കുമെന്ന് പറയുന്നു. ഒരു ദിവസം മൂന്ന് കപ്പ് വരെ കുടിക്കുന്ന ആളുകൾക്ക് കാപ്പി കുടിക്കാത്തവരെ അപേക്ഷിച്ച് പക്ഷാഘാതം വരാനുള്ള സാധ്യത 21 ശതമാനം കുറവാണെന്ന് സമീപകാല ഗവേഷണങ്ങൾ കണ്ടെത്തി.
11. ശരീരഭാരം കുറയ്ക്കുന്നു
കാപ്പിയിൽ മധുരം ചേര്ത്തില്ലെങ്കില് രാവിലെയുള്ള കഫീൻ ശീലം ശരീരഭാരം കുറയ്ക്കാൻ സഹായിക്കും. വിശപ്പ് അടിച്ചമർത്തുന്ന കഫീന്റെ പങ്കും ഉപാപചയന പ്രവർത്തനത്തിൽ അതിന്റെ സ്വാധീനവും ഈ ഫലങ്ങൾക്ക് കാരണമായേക്കാം.
12. കരളിന്റെ ആരോഗ്യം സംരക്ഷിക്കുന്നു
കാപ്പിയുടെ ഉപഭോഗം വിട്ടുമാറാത്ത കരൾ രോഗത്തിനെതിരെ സംരക്ഷണ വലയം ഒരുക്കുമെന്ന് ഗവേഷകര്. കരൾ രോഗത്തിന് കാരണമായ നോൺ ആൽക്കഹോളിക് ഫാറ്റിലിവർ രോഗമുള്ള ആളുകളിൽ കരൾ ഫൈബ്രോസിസിൽ നിന്ന് കാപ്പി സംരക്ഷിക്കുന്നുവെന്ന് പറയുന്നു.
ദിവസവും 3-4 കപ്പ് കാപ്പി എല്ലാത്തരം വിട്ടുമാറാത്ത കരൾ രോഗങ്ങളുടെയും അപകടസാധ്യത കുറയ്ക്കുന്നതായി കണ്ടെത്തി. ഇതിൽ സിറോസിസ്, ഫാറ്റി ലിവർ, കരൾ കാൻസറായ ഹെപ്പറ്റോസെല്ലുലാർ കാർസിനോമ എന്നിവയും ഉൾപ്പെടുന്നു.
13. നീര്ക്കെട്ട് കുറയ്ക്കുന്നു
കാപ്പി നീര്വീക്കം കുറയ്ക്കാൻ സഹായിക്കും. ക്രോണിക് ഇൻഫ്ലമേഷൻ പോലുള്ള ആരോഗ്യപ്രശ്നങ്ങൾക്ക് ആശ്വാസമാകാന് കാപ്പിക്ക് കഴിയും. വിട്ടുമാറാത്ത നീര്വീക്കം, ഹൃദ്രോഗം, ടൈപ്പ് 2 പ്രമേഹം തുടങ്ങിയ അവസ്ഥകൾ കുറയ്ക്കും.
14. ഹൃദ്രോഗ സാധ്യത കുറയ്ക്കുന്നു
കാപ്പി ഹൃദയാരോഗ്യത്തെ സംരക്ഷിക്കും. കാപ്പി കുടിക്കാത്തവരേക്കാൾ കാപ്പി കുടിക്കുന്നവർക്ക് ഹൃദ്രോഗ സാധ്യത കുറവാണ്. കാപ്പി ഉപയോഗം ഹൃദയസ്തംഭനം ഉണ്ടാകാനുള്ള സാധ്യത കുറയ്ക്കും.
ഒരു ദിവസം 3- 5 കപ്പ് വരെ കാപ്പി കുടിക്കുന്നത് ഹൃദയ സംബന്ധമായ അസുഖങ്ങളിൽ 15 ശതമാനം കുറയ്ക്കുമെന്ന് പഠനങ്ങള് പറയുന്നു. എങ്കിലും ഉയർന്ന രക്തസമ്മർദ്ദമുള്ളവർ വലിയ അളവിൽ കഫീൻ കഴിക്കരുതെന്ന് നിര്ദേശിക്കുന്നു.
15. വിഷാദരോഗത്തിനുള്ള സാധ്യത കുറയ്ക്കുന്നു
ഒരു ദിവസം കുറഞ്ഞത് 4 കപ്പ് കാപ്പി കുടിക്കുന്ന ആളുകൾക്ക് വിഷാദ രോഗം വരാനുള്ള സാധ്യത വളരെ കുറവാണ്. കാപ്പി കുടിക്കുമ്പോള് ലഭിക്കുന്ന ഊര്ജ്ജം വിഷാദത്തെ നീക്കും.