കീടനാശിനികൾ മുഴുവൻ കളഞ്ഞ് മുന്തിരി കഴുകിയെടുക്കാൻ ഈ 5 കാര്യങ്ങൾ ശീലിക്കാം.... Effective Grape Cleaning: A Step-by-Step Guide
Mail This Article
ഈ വീട്ടിൽ മുന്തിരി വാങ്ങിയിട്ട് തന്നെ വർഷങ്ങളായി, അപ്പോഴാണ് സുഖമില്ലാതെ കിടന്ന അച്ഛനെ കാണാനെത്തിയ സുഹൃത്തുക്കൾ ചേർന്ന് ഒരു കിലോ മുന്തിരിയുമായി എത്തിയത്. ഇത്രയധികം മുന്തിരിയൊക്കെ എങ്ങനെ വെറുതേ കളയും... കുട്ടികളൊക്കെയുള്ളതു കൊണ്ട് കഴിക്കാനും മടി... ആതിരയാകെ ആശങ്കയിൽ നിൽക്കുന്ന നേരത്താണ് അയലത്തെ റിസ വന്ന് മുന്തിരി കഴുകിയെടുക്കാനുള്ള വഴികൾ പറഞ്ഞു കൊടുക്കുന്നത്...
കുലകുലയായി അടുക്കി കിടക്കുന്നതു കൊണ്ടു തന്നെ മുന്തിരിയിൽ പ്രാണികൾ വന്ന് മുട്ടയിടാനുള്ള സാധ്യത കൂടുതലാണ്. ഇതാണ് ലാഭം മാത്രം നോക്കുന്നവർ മറ്റു ഫലങ്ങളെ അപേക്ഷിച്ച് മുന്തിരിയിൽ ധാരാളം അപകടകാരികളായ കീടനാശിനികൾ അടിക്കാനുള്ളൊരു പ്രധാന കാരണവും. എന്നാൽ ശ്രദ്ധിച്ചു വൃത്തിയാക്കി ശേഖരിച്ചു വച്ചാൽ അപകടമില്ലാതെ മുന്തിരി കഴിക്കാൻ സാധിക്കും...
1. പച്ചവെള്ളത്തിൽ കഴുകൽ
മുന്തിരി ഒരു പാത്രത്തിലെടുത്ത് ടാപ്പിൽ നിന്നു ഒഴുകി വീഴുന്ന വെള്ളത്തിന്റെ ചോട്ടിൽ 30–40 സെക്കന്റു നേരം വച്ച് മെല്ലെ ഉരസി കഴുകാം.. ഇത് ഒട്ടിപ്പിടിച്ചിരിക്കുന്ന അഴുക്കും പൊടിയും ഇളക്കിക്കളയാൻ സഹായിക്കും.
2. ബേക്കിങ്ങ് സോഡ കൊണ്ടൊരു പിടി
ഒരു ലിറ്റർ വെള്ളത്തിൽ ഒരു ടീസ്പൂൺ ബേക്കിങ്ങ് സോഡ ഇട്ട് നന്നായി കലർത്തി യോജിപ്പിക്കുക. ഇതിലേക്ക് മുന്തിരിയിട്ട് 10–15 മിനിറ്റു നേരം മുക്കി വയ്ക്കാം. ബേക്കിങ്ങ് സോഡ മുന്തിരിയിലുള്ള കീടനാശിനിയുടെ രാസപദാർഥങ്ങളെ തകർക്കാൻ സഹായിക്കും... ശേഷം വീണ്ടും പച്ചവെള്ളത്തിൽ കഴുകാം.
3. വിനാഗിരി കൊണ്ടൊരു പ്രതിരോധം
മൂന്നു ഭാഗം വെള്ളത്തിന് ഒരു ഭാഗം വിനാഗിരി എന്ന കണക്കിലൊരു ലായനി തയ്യാറാക്കി മുന്തിരി 5–10 മിനിറ്റു നേരത്തേക്ക് അതിൽ മുക്കി വയ്ക്കാം. മുന്തിരിയിൽ ബാക്കിയുള്ള കീടനാശിനിയുടെ അംശത്തെ വിനാഗിരി ഇല്ലാതാക്കും. ഒപ്പം ബാക്റ്റീരിയയേയും മറ്റ് സൂക്ഷമ ജീവികളെയും പുഴുക്കളുടേയും മറ്റും മുട്ടകളേയും ഒക്കെ നശിപ്പിക്കും. ശേഷം വെള്ളം കൊണ്ട് കഴുകുക. ഇതോടെ വിനാഗിരിയുടെ മണവും രുചിയും തീർത്തും മാറിക്കിട്ടും.
4. ഉരസി കഴുകിയുണക്കാം
കുഴിവുള്ള പാത്രത്തിൽ വെള്ളമൊഴിച്ച് മുന്തിരി കൈകൊണ്ട് തിരുമി ഒന്നുകൂടി നന്നായി കഴുകിയെടുക്കാം... അധികം നിൽക്കുന്ന വെള്ളം ടവൽ കൊണ്ട് ഒപ്പിയെടുത്തു മാറ്റാം. ശേഷം ഇവ നിരത്തിയിട്ട് കാറ്റുകൊണ്ട് ഉണങ്ങാൻ പറ്റുന്ന പാകത്തിന് വയ്ക്കുക.
5. നന്നായി സൂക്ഷിക്കാം
വായു കടക്കുന്ന പാത്രത്തിൽ വേണം മുന്തിരി സൂക്ഷിച്ചു വയ്ക്കാൻ. ഇത്തരമൊരു പാത്രത്തിലാക്കിയ ശേഷം ഫ്രിജ്ഡിൽ സൂക്ഷിക്കാം. പാത്രത്തിലെടുത്തു വയ്ക്കുമ്പോൾ വീണ്ടും ഈർപ്പം കടക്കാതിരിക്കാൻ പ്രത്യേകം ശ്രദ്ധിക്കണം. അങ്ങനെ വന്നാൽ ബാക്ടീരിയയുടെ വളർച്ച കൂടും.