ഹെൽത് കോൺഷ്യസ് ആണോ?; സ്വാദും പോഷകവും ഒത്തുചേര്‍ന്ന ചിക്കൻ ബ്രെഡ് റോൾ ഇതാ.. Healthy Chicken Bread Roll Recipe for All Ages

കുട്ടികൾ ഇഷ്ടത്തോടെ ചോദിച്ചു വാങ്ങും. കുട്ടികൾക്കു നൽകാവുന്ന നല്ലൊരു നാലുമണി പലഹാരമാണു ചിക്കൻ ബ്രെഡ് റോൾ. ഹെൽത് കോൺഷ്യസ് ആയ മുതിർന്നവർക്ക് ഈ റോൾ എയർ ഫ്രയറിൽ തയാറാക്കാം. മുട്ടയടിച്ചതിലും റൊട്ടിപ്പൊടിയിലും പൊതിഞ്ഞെടുക്കുന്നത് ഒഴിവാക്കി പാനിൽ വച്ചു ചുട്ടെടുക്കുകയുമാകാം.

ചിക്കൻ ബ്രെഡ് റോൾ

മുട്ട – രണ്ട്, ബ്രെഡ് – രണ്ട് സ്ലൈസ്, വെള്ളം – അരക്കപ്പ്, ഇഞ്ചി വെളുത്തുള്ളി പേസ്റ്റ് – ഒരു ചെറിയ സ്പൂൺ, ചിക്കൻ പുഴുങ്ങി പൊടിച്ചത് – ഒരു കപ്പ്, ഉരുളക്കിഴങ്ങ് – രണ്ട്, പുഴുങ്ങി പൊടിച്ചത്, കാപ്സിക്കം പൊടിയായി അരിഞ്ഞത് – രണ്ടു വലിയ സ്പൂൺ, പച്ചമുളക് – രണ്ട്, പൊടിയായി അരിഞ്ഞത്, ഉപ്പ് – പാകത്തിന്, മല്ലിയില പൊടിയായി അരിഞ്ഞത് – ഒരു ചെറിയ സ്പൂൺ നാരങ്ങാനീര് – രണ്ടു വലിയ സ്പൂൺ, കോൺ‌ഫ്ലോർ – രണ്ടു വലിയ സ്പൂൺ, റൊട്ടിപ്പൊടി – ഒരു കപ്പ്, എണ്ണ – വറുക്കാൻ ആവശ്യത്തിന് 

പാകം ചെയ്യുന്ന വിധം

∙ മുട്ട അടിച്ചു പതപ്പിച്ചു മാറ്റിവയ്ക്കുക.

∙ രണ്ടു സ്ലൈസ് ബ്രെഡ് അരക്കപ്പ് വെള്ളത്തിൽ കുതിർത്തശേഷം വെള്ളം പിഴിഞ്ഞു കളഞ്ഞു മാറ്റിവയ്ക്കാം.

∙ ഇഞ്ചി വെളുത്തുള്ളി പേസ്റ്റ് മുതല്‍ നാരങ്ങാനീരു വരെയുള്ള ചേരുവകൾ ഒന്നിച്ചാക്കി യോജിപ്പിക്കുക.

∙ ഇതിലേക്കു വെള്ളം കളഞ്ഞു മാറ്റിവച്ചിരിക്കുന്ന ബ്രെഡും കോൺഫ്ലോറും ചേർത്തു യോജിപ്പിക്കുക. 

∙ മിശ്രിതം ചെറിയ ഉരുളകളുണ്ടാക്കി ഓരോന്നും കയ്യിൽ വച്ചു പരത്തി റോൾ ആകൃതിയിലാക്കി മുട്ട അടിച്ചതിലും റൊട്ടിപ്പൊടിയിലും മുക്കി ചൂടായ എണ്ണയിൽ വറുത്തെടുക്കാം.

കടപ്പാട്: ഡോ. അനിത മോഹൻ, ഫോർമർ സ്റ്റേറ്റ് നൂട്രീഷൻ പ്രോഗ്രാം ഓഫിസർ, ഡയറക്റ്ററേറ്റ് ഓഫ് ഹെൽത് സർവീസസ്