എല്ലിനേയും പല്ലിനേയും മാത്രമല്ല മാനസികാരോഗ്യവും ക്ഷയിപ്പിക്കുന്ന വൈറ്റമിൻ ഡിയുടെ അപര്യാപ്തത: പ്രകടമാകുന്ന 10 ലക്ഷണങ്ങൾ അറിഞ്ഞു വയ്ക്കാം... The Hidden Signs of Low Vitamin D Levels

കുറച്ചു കാലം മുൻപ് വരെ അതി ശൈത്യമുള്ള വിദേശരാജ്യങ്ങളിൽ ഉള്ളവർക്ക് വരുന്ന പ്രശ്നം മാത്രമായിരുന്നു ഒരു പക്ഷേ, വൈറ്റമിൻ ഡി അപര്യാപ്തത. എന്നാൽ ഇന്ന് നമ്മുടെ നാട്ടിലും പലർക്കും വൈറ്റമിൻ ഡിയുടെ കുറവും അതിനോടനുബന്ധിച്ചുള്ള പ്രശ്നങ്ങളുണ്ട്. പലപ്പോഴും പല ലക്ഷണങ്ങൾ കണ്ടാലും അവ വൈറ്റമിൻ ഡിയുടെ കുറവ് കാരണമാണെന്ന് നമ്മൾ ചിന്തിക്കാറില്ല പകരം മറ്റെന്തെങ്കിലും രോഗമാണെന്ന് കരുതിയിരിക്കും. 

വൈറ്റമിൻ ഡിയുടെ അപര്യാപ്തത കാരണം വരുന്ന 10 ലക്ഷണങ്ങൾ അറിഞ്ഞു വയ്ക്കാം. പറ്റുന്നത്ര വേഗത്തിൽ പരിശോധിച്ച് പരിഹാരമാർഗങ്ങളും തേടാം

1. മാറാത്ത ക്ഷീണം

ക്ഷീണമുണ്ടാകുന്നത് സ്വാഭാവികമാണ്. എന്നാൽ എത്ര ഭക്ഷണം കഴിച്ചിട്ടും എത്ര വിശ്രമിച്ചിട്ടും മാറാത്ത ക്ഷീണം വൈറ്റമിൻ ഡി കുറയുന്നതിന്റെ സുപ്രധാന ലക്ഷണമാകാം.

2. പേശി കഴപ്പും തളർച്ചയും

വൈറ്റമിൻ ഡി ശരീരത്തിലെ കാൽഷ്യം ആഗിരണം ചെയ്യാനുള്ള ശേഷി കൂട്ടി പേശികളെ വലിയാനും മുറുകാനും സഹായിക്കുന്നു. സ്വാഭാവികമായും അതിന്റെ അഭാവം പേശികളെ ദോഷകരമായി ബാധിക്കും.. പേശി കടച്ചിൽ, ശക്തിയില്ലായ്മ, വല്ലായ്മ എന്നിവയിലേക്കു നയിക്കും.

3. വിട്ടുമാറാത്ത രോഗങ്ങൾ

ഒന്നുകിൽ പനി അല്ലെങ്കിൽ ചുമ അതുമല്ലെങ്കിൽ ജലദോഷം ഇങ്ങനെ സ്ഥിരമായി അസുഖങ്ങൾ വന്നു പോയ്ക്കൊണ്ടിരിക്കുന്നു. ശരീരത്തിന്റെ രോഗപ്രതിരോധ ശേഷി വൈറ്റമിൻ ഡിയുടെ അഭാവം കാരണം കുറയുന്നതാകാം കാരണം.

4. മൂഡ് സ്വിങ്ങ്‌സോ വിഷാദ രോഗമോ

തലച്ചോറിലെ സെറട്ടോണിന്റെ അളവ് ഉയർത്തി നിങ്ങളെ പ്രകാശിപ്പിക്കുന്ന വൈറ്റമിൻ ആയതു കൊണ്ടാണ് ഇതിന് ‘സൺഷൈൻ വൈറ്റമിൻ’ എന്ന പേരു വന്നത്. ആവശ്യത്തിന് സൂര്യപ്രകാശം ഏൽക്കുന്നില്ലെങ്കിൽ വൈറ്റമിൻ ഡിയുടെ ഉത്പാദനത്തിൽ കുറവു വരാം. അതുവഴി ഉത്ക്ഠ, കടുത്ത വൈകാരിക സമ്മർദ്ദം എന്നിവ അനുഭവപ്പെടാം.

5. തുടരെ തുടരെ അലട്ടുന്ന പുറം വേദന

എല്ലുകളുടെ ബലത്തിനാവശ്യമുള്ള കാൽഷ്യം ശരീരത്തിലേക്ക് എത്തിക്കുന്നതിൽ പ്രധാനിയായതു കൊണ്ട് ഇതിന്റെ അഭാവം എല്ലിന്റെ സാന്ത്രത കുറയ്ക്കും. ഇത് വല്ലാത്ത പുറം വേദനയായും എല്ലുകളിൽ വരുന്ന പൊട്ടലായും ഒക്കെ പ്രകടമാകാം.

6. അകാരണമായ വണ്ണം വയ്ക്കൽ

എത്ര വ്യായാമം ചെയ്തിട്ടും നന്നായി ഡയറ്റ് ശ്രദ്ധിച്ചിട്ടും ശരീരം വണ്ണം വയ്ക്കുന്നു. എത്ര ശ്രമിച്ചിട്ടും കുറയ്ക്കാൻ സാധിക്കാതെ വരിക. ഇതും വൈറ്റമിൻ ഡിയുടെ അപാകത കാരണമാകാം.

7. വല്ലാത്ത മുടി കൊഴിച്ചിൽ

വട്ടത്തിലും പാച്ചുകളായും മറ്റും മുടി കൊഴിഞ്ഞു പോകുന്ന അലോപേഷ്യ എന്ന അവസ്ഥ വൈറ്റമിൻ ഡിയുടെ അഭാവം കാരണം ഉണ്ടാകാം. കടുത്ത മുടി കൊഴിച്ചിൽ ഉള്ളവർ പരിശോധന നടത്തി ഫലം ഉറപ്പിക്കുന്നത് നല്ലതാണ്.

8. മുറിവുണങ്ങാനുള്ള താമസം

വൈറ്റമിൻ ഡി ശരീരത്തിൽ പുതു ചർമ കോശങ്ങൾ ഉണ്ടായി വരാന്‍ സഹായിക്കുന്നുണ്ട്.. അതിന്റെ അഭാവം മൂലം മുറിവുകളും ഉരസലുകളും മറ്റും ഉണങ്ങാതെ ഏറെ നാൾ നിൽക്കും.

9. ഉയർന്ന രക്തസമ്മർദ്ദം

ശരീരത്തിലെ രക്തവാഹിനികൾക്ക് ആയാസം പകരാനുള്ള കഴിവ് വൈറ്റമിൻ ഡിക്ക് ഉണ്ട്. ഇതു കുറയുന്നതോടെ ഹൈപ്പർ ടെൻഷൻ വരാനുള്ള സാധ്യത കൂടുതലാണ്.

10. പല്ലിന്റെ പ്രശ്നങ്ങൾ

വൈറ്റമിൻ ഡിയുടെ അഭാവം കാരണം പല്ലുകളിൽ പോടുകൾ, പൊട്ടൽ എന്നിവയൊക്കെ ധാരാളമായുണ്ടാകാനിടയുണ്ട്.. പല്ലിന്റെ മൊത്തത്തിലുള്ള ആരോഗ്യം മോശമാക്കാനും കാരണമാകാറുണ്ട്.. ഇതു കൂടാതെ മോണ വീക്കവും മറ്റും പ്രശ്നങ്ങളും ഒപ്പം ചേരും.