Monday 06 January 2025 12:43 PM IST : By സ്വന്തം ലേഖകൻ

കൈവിറയ്ക്കുന്നു, നാക്കു കുഴയുന്നു: വിശാലിന് എന്താണ് സംഭവിക്കുന്നത്? ആരോഗ്യാവസ്ഥയിൽ ഞെട്ടി ആരാധകർ

vishal-14

‘വിശാലിന് എന്താണ് സംഭവിക്കുന്നത്?’ കോളിവു‍ഡ് താരം വിശാലിന്റെ ആരോഗ്യവസ്ഥയിൽ ആശങ്കപ്പെട്ട് ആരാധകർ ചോദിക്കുന്ന ചോദ്യമിതാണ്. പുതിയ ചിത്രമായ മദ ഗജ രാജയുടെ പ്രി–റിലീസ് ചടങ്ങിനെത്തിയതായിരുന്നു താരം. വേദിയിൽ സംസാരിക്കാനെത്തിയ താരം പതിവിൽ നിന്നും വിരുദ്ധമായി ക്ഷീണിതനായി കാണപ്പെടുകയായിരുന്നു. ഒരു അസിസ്റ്റന്റിന്റെ സഹായത്തോടെയാണ് വേദിയിലെത്തിയത്. മാത്രമല്ല സിനിമയെക്കുറിച്ച് സംസാരിക്കുമ്പോൾ അദ്ദേഹത്തിന്റെ കൈ വിറയ്ക്കുന്നുണ്ടായിരുന്നു.

വേദിയിലെത്തിയതു മമുതലുള്ള വിശാലിന്റെ ശരീരഭാഷ കണ്ടതോടെ ആരാധകരും ആശങ്കയിലായി. ശരീരം തീരെ മെലിഞ്ഞിരിക്കുന്നു. പ്രസംഗിക്കുന്നതിനിടെ പല സമയത്തും നാക്കു കുഴഞ്ഞു. വിഡിയോ വൈറലായതോടെ വിശാലിന് എന്തുപറ്റിയെന്ന സംശയം ബലപ്പെട്ടു.. കടുത്ത പനി ബാധിച്ചാണ് വിശാൽ വേദിയിലെത്തിയതെന്ന് സ്ഥിരീകരിക്കാത്ത റിപ്പോർട്ടുകൾ ഉണ്ടായിരുന്നു. എന്നാൽ ഔദ്യോഗികമായ സ്ഥിരീകരണം നടന്റെ ഭാഗത്തുനിന്നും ഉണ്ടായിട്ടില്ല.

നീണ്ട 12 വർഷത്തെ കാത്തിരിപ്പിനു ശേഷമാണ് വിശാൽ നായകനാകുന്ന മദ​ ഗജ രാജ റിലീസിന് ഒരുങ്ങുന്നത്. 2013 പൊങ്കൽ റിലീസ് ചെയ്യേണ്ടിയിരുന്ന സിനിമയാണ് മദ​ഗജരാജ. സുന്ദർ സി.യുടെ സംവിധാനത്തിലായിരുന്നു ചിത്രം ഒരുങ്ങിയത്. സിനിമയുടേതായി ഒരു ട്രെയിലറും ഗാനവും പുറത്തുവിട്ടിരുന്നു. സാമ്പത്തികമായ പ്രശ്നങ്ങൾ മൂലം സിനിമയുടെ റിലീസ് നീട്ടുകയായിരുന്നു. ഇപ്പോൾ ഒരു വ്യാഴവട്ടത്തിനുശേഷം പൊങ്കൽ റിലീസായാണ് ചിത്രമെത്തുന്നതും.

ചിത്രത്തിൽ അഞ്ജലിയും വരലക്ഷ്മി ശരത്കുമാറുമാണ് നായികമാർ. സോനു സൂദാണ് സിനിമയിലെ പ്രധാന വില്ലൻ.