സുരഭി ലക്ഷ്മിയുടെ വീട്ടിൽ എത്തി സുരഭിയുടെ അമ്മയേയും അമ്മൂമ്മയേയും കണ്ട സന്തോഷം പങ്കുവച്ച് നടൻ വിനോദ് കോവൂർ. സുരഭി ഇല്ലാത്ത ദിവസം ആണ് ആ വീട്ടിൽ പോയതെന്നും അതാണ് ചിത്രത്തിൽ സുരഭി ഇല്ലാത്തത് എന്നും വിനോദ്.
‘ഈ ഫോട്ടോയിൽ എന്റെ വലതുഭാഗത്തിരിക്കുന്നത് സുരഭി ലക്ഷ്മി അഥവാ പാത്തൂന്റെ അമ്മമ്മ ലക്ഷ്മി അമ്മയും ഇടതു ഭാഗത്തിരിക്കുന്നത് പ്രശസ്ത അഭിനേത്രിക്ക് ജന്മം കൊടുത്ത സുരഭിയുടെ രാധമ്മയുമാണ്.
ഇന്നലെ നരിക്കുനിയിലെ സുരഭിയുടെ വീട്ടിൽ പോയിരുന്നു. അമ്മമ്മ കഴിഞ്ഞ കുറച്ച് ദിവസങ്ങളായ് വാർദ്ധക്യ സഹജമായ ചില അസുഖം കാരണം മിംസ് ഹോസ്പ്പിറ്റലിൽ ചികിത്സയിലായിരുന്നു. അപ്പോഴൊന്നും അമ്മമ്മയെ പോയി കാണാൻ പറ്റിയില്ല.
കഴിഞ്ഞ ദിവസം കോഴിക്കോട് കുടുംബശ്രീ പ്രവർത്തകർക്ക് അവാർഡ് കൊടുക്കുന്ന ചടങ്ങിൽ ഞങ്ങൾ ഇരുവരും പങ്കെടുത്തിരുന്നു. അമ്മമ്മയുടെ കാര്യം അന്വേഷിച്ചപ്പോൾ ഡിസ്ചാർജായി വീട്ടിലാണെന്നറിഞ്ഞു.
പിറ്റേ ദിവസം അമ്മമ്മയെ പോയി കണ്ടു.
കട്ടിലിൽ കിടക്കുന്ന അമ്മമ്മ എന്നെ കണ്ടപ്പോൾ ഇതൊരാ മൂസക്കായിയോന്ന് ചോദിച്ച് വിശേഷങ്ങൾ ചോദിച്ചറിയാൻ തുടങ്ങി. M80 മൂസയിൽ സുരഭി പാടിയ പൂച്ച പാട്ട് പാടി. സുരഭിയുടെ അമ്മയുടേയും അമ്മമ്മയുടേയും നിഷ്കളങ്ക സംസാരവും സ്നേഹവും ഏറെ നേരം അനുഭവിച്ചു. ശേഷം പൂമുഖത്തിരുന്ന് സുരഭിയുടെ സഹോദരിമാരോടും സഹോദരനോടും സംസാരിച്ചിരിക്കുമ്പോൾ അമ്മമ്മയുടെ Bed ന് അരികിലെ Emergency Bell അടിച്ചു സഹോദരിമാർ രണ്ടാളും റൂമിലേക്ക് ഓടി. സഹോദരൻ സുധിയേട്ടൻ പറഞ്ഞു എന്തെങ്കിലും അത്യാവശ്യം ഉണ്ടെങ്കിൽ വിളിക്കാൻ ഒരു Bell വെച്ചിട്ടുണ്ട്. അപ്പോൾ സഹോദരിമാർ രണ്ട് പേരും ചിരിച്ചോണ്ട് വരുന്നു. എന്തിനാ വിളിച്ചേന്ന് ചോദിച്ചപ്പോൾ മൂസക്കായ് പോകുന്നതിന് മുമ്പ് അമ്മമ്മക്ക് കൂടെ ഒരു ഫോട്ടോ എടുക്കണമെന്നാ പറഞ്ഞെന്ന്.
ന്നാ ഇപ്പൊ തന്നെ എടുക്കാലോന്ന് ഞാൻ പറഞ്ഞപ്പോൾ ഏയ് ആയിട്ടില്ല അമ്മമ്മ ഒന്ന് ഒരുങ്ങുകയാണെന്ന് സുമി പറഞ്ഞു.
റെഡിയായപ്പോൾ അമ്മമ്മയെ ബെഡിൽ നിന്ന് ഇറക്കി കൈപിടിച്ച് നടത്തി ഡൈനിംഗ് റൂമിൽ എത്തിച്ചു ഇരുത്തി എടുത്ത ഫോട്ടോയാണ്. രാധമ്മയെ നിർബന്ധിച്ച് പിടിച്ച് ഇരുത്തിയതാണ്.
അമ്മമ്മക്ക് സന്തോഷായ് എനിക്കും.
ശരിക്കും അമ്മമ്മയെ കണ്ടപ്പോൾ എന്റെ അമ്മയെ ഓർമ്മ വന്നു
സ്നേഹനിധികളായ അമ്മമ്മക്കും അമ്മക്കും ആയുരാരോഗ്യവും ദിർഘായുസും ഉണ്ടാവട്ടെ.
NB – കഥയിൽ സുരഭി എവിടെ എന്ന ചോദ്യം വേണ്ട. താരം ബത്തേരിയിൽ ഒരു കോളേജ് ഡേ ഉദ്ഘാടനത്തിന് പോയിരിക്കുകയാണ്’.– വിനോദ് കുറിച്ചു.
