അകാലനര വരാതിരിക്കാനും വന്നാൽ അധികമാകാതിരിക്കാനും ആഹാരരീതിയിലും മാറ്റം വരുത്തണം. എരിവ്, പുളി, ഉപ്പ്, ബേക്കറി പലഹാരങ്ങൾ എന്നിവ പരമാവധി കുറയ്ക്കണം. പാരമ്പര്യഘടകം അകാലനരയുടെ പ്രധാന കാരണമാണ്.
∙ ഇരട്ടിമധുരം, മ‍ഞ്ചട്ടി, നെല്ലിക്ക, കറിവേപ്പില, എള്ള് എന്നിവ തുല്യ അളവിൽ ചേർത്തരച്ചത് 50 ഗ്രാം വേണം. ഇത് 600 മില്ലി വെള്ളവും ചേർത്ത് 200 മില്ലി വെളിച്ചെണ്ണയിൽ കാച്ചി എണ്ണയുടെ അളവിൽ വറ്റിക്കുക.
എണ്ണയ്ക്ക് കൽക്കമായി ഉപയോഗിച്ച മരുന്നുകൾ ഉണക്കി പൊടിച്ചത് ആഴ്ചയിലൊരിക്കൽ ഹെയർ പാക്കായും ഉപയോഗിക്കാം.
∙ 100 മില്ലി വെളിച്ചെണ്ണയിൽ കറിവേപ്പില, മൈലാ‍ഞ്ചിയില, ചുവന്നുള്ളി എന്നിവ അരച്ചത് 25 ഗ്രാമും 400 മില്ലി വെവെള്ളവും ചേർത്തു കാച്ചി 100 മില്ലിയാക്കുക.
∙ ബ്രഹ്മി ഇടിച്ചു പിഴിഞ്ഞ നീര് 400 മില്ലി (വെള്ളവും കൂടി ചേർത്ത്), കറിവേപ്പില അരച്ചത് 25 ഗ്രാം, 100 മില്ലി വെളിച്ചെണ്ണ/ എള്ളെണ്ണ ചേർത്ത് എണ്ണ കാച്ചി തേക്കുന്നത് അകാലനര തടയും.
ഉറക്കമില്ലായ്മയും സമ്മർദവും അകലാൻ
സമ്മർദവും ഉറക്കകുറവും ഇപ്പോൾ പലർക്കുമുണ്ട്. മുടികൊഴിച്ചിൽ അകറ്റാനും മുടി വളരാനും നല്ല ആഹാരവും മതിയായ വിശ്രമവും വേണം. കോവിഡ് വന്നുപോയവരിലെ മുടികൊഴിച്ചിലിനു പ്രധാനകാരണവും ഉറക്കകുറവാണ്. നല്ല ഉറക്കം കിട്ടാനുള്ള എണ്ണകള്‍ അറിയാം.
∙ ചന്ദനം, ഇരട്ടിമധുരം, എള്ള് എന്നിവ തുല്യമായെടുത്ത് അരച്ചത് 25 ഗ്രാം, 100 മില്ലി എണ്ണയിലും 400 മില്ലി വെള്ളത്തിലും ചേർത്തു കാച്ചി 100 മില്ലിയാക്കി വറ്റിച്ച് ഉപയോഗിക്കാം.
∙ 25 ഗ്രാം ഇരട്ടിമധുരം കൽക്കമാക്കിയത് 100 മില്ലി വെളിച്ചെണ്ണയിലും 400 മില്ലി കറുക ഇടിച്ചു പിഴിഞ്ഞ നീരും ചേർത്ത് കാച്ചി എണ്ണയുടെ അളവിലാക്കി വറ്റിച്ചുതേക്കുക.
വിവരങ്ങൾക്കു കടപ്പാട്: ഡോ. അഞ്ജലി ടി. സി, അസി. പ്രഫസർ, ഗവ. ആയുർവേദ കോളജ്, പരിയാരം
