സൗന്ദര്യത്തിന് കറുപ്പെന്നോ വെളുപ്പെന്നോ ഇല്ല. ശരീരം അഴകോടെ ഇരുന്നാലും കഴുത്തിൽ വന്നു ചേരുന്ന കറുപ്പുനിറം ചിലപ്പോൾ തലവേദനയാകാറുണ്ട്. എത്ര ശ്രമിച്ചിട്ടും ഈ കറുപ്പുനിറം മാറാത്തതു വലിയ ബുദ്ധിമുട്ടാകുന്നുണ്ടോ? ഇതാ കഴുത്തിൽ രൂപപ്പെടുന്ന കറുത്തനിറം മാറാൻ ചില പൊടിക്കൈകൾ.
1. തേനും രക്‌തചന്ദനത്തിന്റെ പൊടിയും യോജിപ്പിച്ച്‌ സ്‌ഥിരമായി രാത്രിയില്‍ കഴുത്തില്‍ അണിയാം. രാവിലെ എഴുന്നേല്‍ക്കുമ്പോള്‍ ഇത് കഴുകികളയാം. കിടക്കുമ്പോൾ കഴുത്ത് ടവൽ കൊണ്ട് അയച്ച് ചുറ്റി വയ്ക്കണം.
2. പപ്പായ നീരും തേനും ചാലിച്ച്‌ കുഴമ്പ് രൂപത്തിലാക്കി കഴുത്തില്‍ പുരട്ടുക. ആഴ്‌ചയില്‍ മൂന്നു ദിവസം ഇങ്ങനെ ചെയ്യണം.
3. നാരങ്ങാ നീരില്‍ തേനോ പാലോ പനിനീരോ തക്കാളിനീരോ ചാലിച്ച്‌ കഴുത്തില്‍ പുരട്ടുന്നത്‌ കറുപ്പു നിറം മാറ്റി ചർമ്മത്തിന് സ്നിഗ്ധത വർധിപ്പിക്കും.
4. പഴം ഗ്രൈൻഡ് ചെയ്ത് തേനില്‍ ചാലിച്ച്‌ കഴുത്തില്‍ പുരട്ടുക. അധികം ഉണങ്ങും മുമ്പ് കഴുകണം. ആഴ്‌ചയില്‍ മുന്ന്‌ ദിവസം ഇങ്ങനെ ചെയ്യണം.
5. ഭക്ഷണ കാര്യത്തിലും ശ്രദ്ധ വേണം. ആപ്പിളും കദളിപ്പഴവും സ്‌ഥിരമായി കഴിക്കുക. ധാരാളം വെള്ളം കുടിക്കുക.
6. റവ തൈരിൽ കലക്കി വെണ്ണയും യോജിപ്പിച്ച്‌ സ്‌ഥിരമായി സ്‌ക്രബ്‌ ചെയുക.
സാധാരണ വണ്ണമുള്ളവരിലും വെയിലു കൊള്ളുന്നവരിലും കാണുന്ന ഈ കറുപ്പുനിറം മാറുന്നില്ലെങ്കിൽ ഹോർമോൺ പ്രശ്നത്തിനും അഡ്രിനാലിൻ ഗ്രന്ഥികളുടെയും പിച്യൂട്ടറി ഗ്രന്ഥിളുടെയും പ്രവർത്തന തകരാറുകൾക്കും പങ്കുണ്ടോ എന്നു വിദഗ്ധ പരിശോധനയിലൂടെ അറിയണം. ‘അകാന്തോസിസ് നൈഗ്രിക്കൻസ്’ എന്ന രോഗത്തിന്റെ പരിശോധനയും നടത്തണം. ഏറെ പ്രായമായവരിൽ ആദ്യമായി ഈ കറുപ്പുനിറം പ്രത്യക്ഷപ്പെട്ടാൽ ഉദര കാൻസറുകളുടെ സൂചനയാണോ എന്നു പരിശോധിക്കണം.
