കോഴിക്കോട് ജില്ലയിൽ കഴിഞ്ഞ ഏപ്രിൽ മുതൽ ഈ ജനുവരി വരെ നടത്തിയ ഹോട്ടൽ ഭക്ഷണത്തിന്റെ സാംപിൾ പരിശോധനയിൽ 10% ഗുണനിലവാരം ഇല്ലാത്തവയാണെന്നു കണ്ടെത്തി. ആകെ 930 സാംപിളുകൾ പരിശോധിച്ചതിൽ 94 എണ്ണം അപകടകരമായവയാണ്. 49 സാംപിളുകൾ ഗുണനിലവാരം കുറഞ്ഞവയാണെന്നും സ്ഥിരീകരിച്ചു.ബിരിയാണി, കുഴിമന്തി എന്നിവയിൽ കൃത്രിമ നിറം ചേർക്കുന്നതായും കണ്ടെത്തി. കൃത്രിമ നിറങ്ങൾ അലർജി, ആസ്മ തുടങ്ങിയ രോഗങ്ങൾക്കു കാരണമാകുമെന്നു ഭക്ഷ്യസുരക്ഷാ വകുപ്പ് മുന്നറിയിപ്പു നൽകുന്നു. കൃത്രിമ നിറം ഉപയോഗിച്ചതായി കണ്ടെത്തിയാൽ ലൈസൻസ് റദ്ദാക്കുന്നത് അടക്കമുള്ള നടപടികൾ സ്വീകരിക്കുമെന്നും വകുപ്പ് അറിയിച്ചു.
ജില്ലയിൽ ഷവർമ തയാറാക്കുന്നതിനും മുന്നറിയിപ്പു പ്രസിദ്ധീകരിച്ചു. പച്ചമുട്ട ഉപയോഗിച്ചുള്ള മയണൈസ് നിർമാണം നിരോധിച്ചതാണെങ്കിലും പലയിടത്തും ഈ രീതി തുടരുന്നതായും കണ്ടെത്തി. സുരക്ഷിതമല്ലാത്ത ഭക്ഷണം ഉൽപാദിപ്പിക്കുകയോ വിൽക്കുകയോ ചെയ്യുന്നതു കണ്ടാൽ ഭക്ഷ്യ സുരക്ഷ വകുപ്പിനെ അറിയിക്കാം. പരാതിപ്പെടാൻ : 18004251125
. സുരക്ഷിതമല്ലാത്ത ഭക്ഷ്യ സാംപിളുകൾ – 94
∙ ബേക്കറി വിഭവങ്ങൾ – 54
∙ ഹോട്ടൽ ഭക്ഷണം – 10
∙ ശർക്കര സാംപിൾ – 13
∙ മറ്റുള്ളവ – 17
ആർഡിഒ റജിസ്റ്റർ ചെയ്ത കേസുകൾ
∙ ഗുണനിലവാരമില്ലെന്നു കണ്ടെത്തിയ സാംപിളുകൾ– 49
∙ വ്യാജ ബ്രാൻഡുകൾ – 77
∙ ലൈസൻസ് ഇല്ലാത്ത സ്ഥാപനങ്ങൾ – 15
ഷവർമ തയാറാക്കുമ്പോൾ പാലിക്കേണ്ട നിർദേശങ്ങൾ
∙ ഷവർമ സ്റ്റാൻഡിൽ കോണിൽ നിന്നുള്ള ഡ്രിപ് ശേഖരിക്കാനുള്ള ട്രേ വേണം. ∙ കത്തി വൃത്തിയുള്ളതും അണുമുക്തവുമായിരിക്കണം. ∙ ഭക്ഷണം കൈകാര്യം ചെയ്യുന്നവർ ഹെയർ ക്യാപ്, കയ്യുറ, വൃത്തിയുള്ള ഏപ്രൺ എന്നിവ ധരിക്കണം.∙ കോണിലുള്ള ഇറച്ചി ആവശ്യമായ സമയം വേവിക്കണം.∙ തയാറാക്കിയ മയണൈസ് അന്തരീക്ഷ ഊഷ്മാവിൽ 2 മണിക്കൂറിൽ കൂടുതൽ സൂക്ഷിക്കരുത്.∙ ഷവർമയ്ക്ക് ഉപയോഗിക്കുന്ന പച്ചക്കറികൾ ക്ലോറിൻ ലായനിയിൽ കഴുകി വൃത്തിയാക്കണം.∙ കോണിൽ ബാക്കി വരുന്ന ഇറച്ചി ഉപയോഗിക്കരുത്.
