സെലിബ്രിറ്റികളെ ഇന്റർവ്യൂ ചെയ്യുമ്പോൾ ഒരു ചോദ്യം പതിവാണ്.
" ഈ രംഗത്തു വന്നില്ലായിരുന്നെങ്കിൽ സാർ എന്തായി തീരുമായിരുന്നു ? "യാതൊരു ബോധവുമില്ലാത്ത ചോദ്യമാണെന്നാലും മറുപടി തള്ളാണെങ്കിലും കേട്ടിരിക്കാൻ കൗതുകമുണ്ട്.
സെലിബ്രിറ്റി അല്ലാത്തതു കൊണ്ട് ആ ഇന്റർവ്യൂ ചോദ്യം ഞാൻ തന്നെ എന്നോട് ചോദിച്ചു.
ഡോക്ടറായില്ലെങ്കിൽ താൻ ആരാകുമായിരുന്നു ?പല തവണ ആലോചിച്ചിട്ടുള്ള വിഷയം. പല ഘട്ടങ്ങളിൽ ഉത്തരം പലതായിരുന്നു.
എന്നാലിപ്പോൾ ഉത്തരം ഇതാണ്. രാഷ്ട്രീയ നേതാവ് !
ഇതു പോലെ നല്ല ഒരു കരിയർ വേറെയുണ്ടോ ചങ്ങാതി ?
എന്തു ചെയ്യാം .... നല്ലൊരു താത്വിക അവലോകനം അന്നു ചെയ്യാത്തതിന്റെ കുറവ് ഇന്ന് അരാഷ്ട്രീയ വാദികളോടൊപ്പം ഞാനും അനുഭവിക്കുന്നുവെന്നു പറഞ്ഞാൽ മതിയല്ലോ പുള്ളേ !
അപ്പോഴും ഇപ്പോഴും ഷൈൻ ചെയ്യുന്നതാരാ ? പത്രമെടുത്താല്‍, ടി.വി തുറന്നാല്‍, നെറ്റില്‍ കയറിയാല്‍, ഫെയ്‌സ് ബുക്കില്‍, ട്വിറ്ററില്‍, സര്‍ക്കാര്‍ ഓഫീസില്‍, എന്തിന് റോഡിലും നാല്‍ക്കവലകളിലും നേതാക്കള്‍ നിറഞ്ഞു നില്‍ക്കുകയല്ലേ ! എന്നതാ ഇത് ചില്ലറ കാര്യമാന്നോ ?
മലയാളസിനിമയിൽ വെറും 49 നടീനടന്മാര്‍ക്കുമാത്രമേ ഇപ്പോള്‍ പണിയുള്ളൂ എന്ന് താരങ്ങളുടെ 'അമ്മ' പോലും തുറന്നുപറഞ്ഞിരിക്കുവല്ലേ !
രാഷ്ട്രീയമാണ് നല്ല തൊഴിൽ മേഖല ! നേതാവാണ് താരം !
ഡോക്റായാൽ എന്തൊക്കെയാണ് പുലിവാൽ ! എല്ലാ ദിവസവും ആശുപത്രിയിൽ പോകണം. അവധി കിട്ടിയാൽ കിട്ടി.
അദ്ധ്വാനത്തിന്റെയും റിസ്ക്കിന്റെയും (തെറി, അടി, കേസ് .... ഇതു ഒന്ന് പരിഷ്ക്കരിച്ചതാണ് ) അടിസ്ഥാനത്തിൽ നോക്കിയാൽ ഒട്ടും ആകർഷകമല്ലാത്ത വരുമാനം .
എത്ര നന്നായി ആരോഗ്യം നോക്കിയാലും രോഗാതുരത, ആയൂർ ദൈർഘ്യം, എല്ലാം ഡോക്ടർമാർക്കു പ്രതികൂലം !
എന്നാൽ രാഷ്ട്രീയ നേതാവിനോ ?
വറുത്തതെന്നോ കരിച്ചതെന്നോ കൊളസ്‌ട്രോളെന്നോ പഞ്ചസാരയെന്നോ ഉപ്പെന്നോ ഉപ്പിലിട്ടതെന്നോ നോക്കാതെ സമയത്തും അസമയത്തും ശാപ്പാടുമടിച്ച് വ്യായാമമോ ഉറക്കമോ കുടുംബജീവിതമോ ഉത്തരവാദിത്വമോ തുടങ്ങി എന്തും ത്യജിച്ചും , മിനുങ്ങിയും മിനുങ്ങാതെയും തേരാപ്പാരാ നടക്കുന്ന നമ്മുടെ ലീഡര്‍ജിമാരുടെ ആരോഗ്യ ജാതകം ബഹു വിശേഷം !
85 വയസ്സ് തികയാതെ യശ്ശശരീരരാകുന്നവര്‍ വിരളം! മഹാമാരികള്‍ പിടിപെടുന്നവര്‍ ചുരുക്കം! ചരിത്രത്തില്‍ മഷിയിട്ടു നോക്കിയാലും ആത്മഹത്യ എന്നൊരു സംഭവമേ കാണുകയില്ല രാഷ്ട്രീയ ജീവിതത്തിൽ ! എന്തിന്, റോഡപകടങ്ങളില്‍ പെട്ട് പോലും കര്‍മ്മഭൂമിയില്‍ നേതാക്കള്‍ വീരചരമം പ്രാപിക്കുന്നില്ല.
ചുരുക്കത്തില്‍ നേതാക്കളുടെ ജീവിത ദൈര്‍ഘ്യം ശരാശരി 85.
അരാഷ്ട്രീയ വാദികളായ ജനങ്ങളുടേത് 75!
ഇവരെയെല്ലാം ചികിത്സിക്കുന്ന ഡാക്കിട്ടർമാരുടേത് 65 !
പിന്നെ മനസ്സ് ! മാനസിക ആരോഗ്യം !! മനസ്സില്‍ എപ്പോഴും സന്തോഷം !
നോക്കൂ, നേതാവായാല്‍ എവിടെപ്പോയാലും സ്ഥാനം, ബഹുമാനം, എവിടെയും സുഹൃത്തുക്കള്‍, പരിചിതര്‍, സദാ സമയം തമാശ, ചിരി.......
എപ്പോഴും ശുഭാപ്തിവിശ്വാസം... പഞ്ചായത്ത് മെമ്പര്‍, പ്രസിഡന്റ്, ജില്ല, സംസ്ഥാനം, എം.എല്‍.എ, മന്ത്രി, മുഖ്യമന്ത്രി, കേന്ദ്രം........ ഇങ്ങനെ പോകും സ്ഥാനാരോഹണങ്ങൾ !
പിന്നെ എന്ത് തള്ളിയാലും വിശ്വസിക്കാനൊരു ജനത, എന്ത് വൃത്തികേട് ചെയ്താലും ജയിപ്പിക്കാന്‍ പ്രബുദ്ധരായ വോട്ടര്‍മാര്‍. ആനന്ദലബ്ധിക്കിനിയെന്തുവേണം!
ഡോക്ടറായില്ലെങ്കിൽ നിങ്ങൾ എന്താകുമായി രുന്നു ?
ഒരു സംശയവും വേണ്ട !
