വൃത്തിയുള്ള കൈകളും അടുക്കളയും ആരോഗ്യപാചകത്തിനായി ‘ഹൈജീൻ മന്ത്ര’ . Cooking hygiene

ആരോഗ്യകരമായ പാചകത്തിന്റെ അടിസ്ഥാനം വൃത്തിയുള്ള കൈകളാണ്. കൈകൾ എത്രത്തോളം നന്നായി വൃത്തിയാക്കുന്നുവോ പാതിയോളം ആഹാരജന്യരോഗങ്ങളെ ഒഴിവാക്കാനാകും. 20 സെക്കൻഡു നേരമെടുത്തു ൈകകൾ കഴുകാം. ഇളം ചൂടുള്ള സോപ്പുവെള്ളം തന്നെ ഉപയോഗിക്കുക. കൈകളുടെ ഉൾവശവും പുറംഭാഗവും കൈത്തണ്ടയും നഖങ്ങളുടെ അടിഭാഗവും വൃത്തിയാക്കണം. തുടർന്ന് ശുദ്ധജലത്തിൽ കൈകൾ നന്നായി കഴുകുക. അതിനുശേഷം വൃത്തിയുള്ള തുണിയിൽ കൈകൾ തുടച്ചുണക്കുക. ഇനി പാചകം തുടങ്ങാം.

വേവിക്കാത്ത മാംസം, മുട്ട, പഴങ്ങൾ, പച്ചക്കറികൾ ഇവ കൈകാര്യം ചെയ്തതിനു ശേഷം കൈകൾ നന്നായി കഴുകണം. ആഹാരം പാചകപ്പെടുത്തിയതിനു ശേഷവും ടോയ്‌ലറ്റ് ഉപയോഗത്തിനു ശേഷവും കുഞ്ഞുങ്ങളുടെയും മുതിർന്നവരുടെയും ഡയപ്പർ മാറ്റിയതിനു ശേഷവും കൈകൾ കഴുകുന്നതു പ്രധാനമാണ്. ചുമയ്ക്കും തുമ്മലിനും ശേഷവും അടുക്കളയിലെ വേസ്റ്റ് മാറ്റിയതിനും പാത്രങ്ങൾ കഴുകിയതിനു ശേഷവും കൈകൾ വൃത്തിയാക്കണം. സിഗററ്റിൽ സ്പർശിക്കുക, ഫോൺ ഉപയോഗിക്കുക, അരുമ മൃഗങ്ങളെ ഓമനിക്കുക, മുറിവിൽ സ്പർശിക്കുക ഇവയ്ക്കു ശേഷം കൈകൾ നന്നായി വൃത്തിയാക്കാതെ പാചകത്തിനൊരുങ്ങരുത്.

അടുക്കള ക്ലീൻ ആക്കാം

അടുക്കളയിലെ പ്രതലങ്ങൾ, കൗണ്ടർ ടോപ്പുകൾ, കട്ടിങ് ബോഡുകൾ എന്നിവയും മിക്സി, ജൂസർ, അവ്ൻ ഉൾപ്പെടെയുള്ള ഉപകരണങ്ങളും ചെറിയ ചൂടുള്ള സോപ്പുവെള്ളത്തിൽ തുണി നനച്ചു തുടച്ചു വൃത്തിയാക്കണം. അടുക്കളയിൽ പാറ്റ, പല്ലി, ചിലന്തി എന്നിവയെ നിയന്ത്രിക്കണം. അടുക്കളയിലെ പ്രതലങ്ങൾ വൃത്തിയുള്ളതാകുമ്പോൾ ഇത്തരം ജീവികളുടെ ശല്യവും കുറയും. ഡൈനിങ് ടേബിൾ ആഹാരം കഴിച്ച ശേഷം തുടച്ചു വ‍ൃത്തിയാക്കണം. തലേ ദിവസത്തെ വേസ്റ്റ് അടുക്കളയിൽ സംഭരിക്കുന്ന ശീലവും ഒഴിവാക്കുക. പാത്രങ്ങൾ തുടയ്ക്കാനുപയോഗിക്കുന്ന തുണികളും ടവലുകളും വാഷിങ് മെഷീനിലോ അല്ലാതെയോ ചൂടുവെള്ളത്തിൽ കഴുകിയെടുക്കണം. ഇത്തരം തുണികൾ കുറച്ചധികം കരുതി വയ്ക്കാം. ദിവസേന പുതിയ തുണികൾ ഉപയോഗിക്കണം. പാത്രങ്ങൾ തുടയ്ക്കാനുപയോഗിക്കുന്ന തുണികൾ ഒരു കാരണവശാലും മറ്റ് ആവശ്യങ്ങൾക്ക് ഉപയോഗിക്കരുത്. കൈകൾ തുടച്ചുണക്കാൻ വെവ്വേറെ ടവലുകൾ അടുക്കളയിൽ സൂക്ഷിക്കുക. പാത്രങ്ങൾ വൃത്തിയാക്കാനുപയോഗിക്കുന്ന സ്പോഞ്ചുകൾ നിശ്ചിത ഇടവേളകളിൽ കളയണം. അത് അണുക്കളുടെ ഒരു ആസ്ഥാനം തന്നെയാണ്. ഇടയ്ക്ക് അവ ക്ലോറിൻ ബ്ലീച്ച് സൊലൂഷനും സോപ്പും ഉപയോഗിച്ചു കഴുകി വെയിലിൽ ഉണക്കിയെടുക്കാം. പച്ചക്കറികളും മറ്റും വാങ്ങുന്നതിനു വീണ്ടും ഉപയോഗിക്കുന്ന തരം ബാഗുകളുണ്ടാകും. അവ ഉപയോഗശേഷം വൃത്തിയായി കഴുകി സൂക്ഷിക്കണം.

പച്ചക്കറികളും പഴങ്ങളും കഴുകാം

പച്ചക്കറികളിലേയും പഴങ്ങളിലേയും മലിനീകരണം തടയണമെങ്കിൽ പാചകത്തിനു മുൻപേ ശ്രദ്ധിക്കണം. പച്ചക്കറികളും പഴങ്ങളും കഴുകുന്നതു പ്രധാനമാണ്. ഉപ്പ്, വിനാഗിരി, മഞ്ഞൾ, വാളൻപുളി എന്നിവ ചേർത്ത വെള്ളത്തില്‍ പച്ചക്കറികളും പഴങ്ങളും കുറഞ്ഞതു പത്തു മിനിറ്റോളം കുതിർത്തു വയ്ക്കാം. പിന്നീട് ശുദ്ധമായ ഒഴുക്കുവെള്ളത്തിൽ പല തവണ കഴുകിയെടുക്കാം. പച്ചക്കറികൾ വൃത്തിയായി കഴുകിയ ശേഷമാണു മുറിക്കേണ്ടത്. മുറിച്ചതിനു ശേഷം കഴുകുന്നതിലൂടെ പോഷണനഷ്ടം സംഭവിക്കാം. വലിയ അളവിൽ പാചകം ചെയ്യുന്നവർ ഗ്ലൗസ് ധരിക്കുന്നതു നല്ലതാണ്. റസ്റ്ററന്റുകളിലും മറ്റും പാചകക്കാരുടെ രോഗങ്ങളും ആരോഗ്യപ്രശ്നങ്ങളും ശ്രദ്ധിക്കണം. രോഗങ്ങൾ ഉള്ള സാഹചര്യത്തിൽ അവരെ മാറ്റി നിർത്താം. പാചകം ചെയ്യുന്ന സ്ഥലത്തെ വെളിച്ചവും വായുസഞ്ചാരവും ഏറെ പ്രധാനമാണ്. പാത്രങ്ങളുടെ വൃത്തി പാചകത്തിലും ആഹാരം കഴിക്കുന്നതിലുമെല്ലാം പ്രധാനമാണ്. മാംസവും മത്സ്യവും പാകപ്പെടുത്തുന്നതിനു പ്രത്യേകം പാത്രങ്ങൾ ഉപയോഗിക്കാം.

വിവരങ്ങൾക്കു കടപ്പാട്
ഡോ. മുതാസ് ഖാലിദ് ഇസ്മയിൽ
കൺസൽറ്റന്റ ് ക്ലിനിക്കൽ
ന്യൂട്രിഷനിസ്‌റ്റ് , കൊച്ചി