ടെക് നെക് , സെർവിക്കൽ സ്പോണ്ടിലോസിസ് എന്നിങ്ങനെ കഴുത്തു സംബന്ധമായ വേദനയോ പ്രശ്നങ്ങളോ ഉള്ളവർക്കു ജിമ്മിൽ വ്യായാമം ചെയ്യാമോ ? ഈ സംശയം ഒട്ടേറെപേർക്കുണ്ട്. കഴുത്തു വേദനയുള്ളവർക്കു ജിമ്മിൽ വ്യായാമം ചെയ്യുന്നതിനു പ്രത്യേക തടസ്സങ്ങളൊന്നുമില്ല. എന്നാൽ ശരിയായ രീതിയിൽ വ്യായാമം ചെയ്യേണ്ടത് നിർണായകമാണ്.
ജിമ്മിൽ വ്യായാമം ആരംഭിക്കുന്നതിനു മുൻപു ചികിത്സിക്കുന്ന ഡോക്ടറോടു വിദഗ്ധാഭിപ്രായം തേടാം. ജിമ്മിലെ ട്രെയ്നറോടു നിലവിലുള്ള സാഹചര്യത്തെക്കുറിച്ചു പറയുകയും വേണം.
∙ജിമ്മിലെ വ്യായാമത്തിനിടയിൽ നിൽക്കുമ്പോൾ തല എപ്പോഴും ഉയർത്തി നേരെ വയ്ക്കാൻ ശ്രമിക്കണം. തല മുൻപോട്ടു കുനിക്കുന്ന ശീലം കഴുത്തിലെ സമ്മർദം വർധിപ്പിക്കും.ദൈനംദിന ജീവിതത്തിലും ഇതു ശ്രദ്ധിക്കണം.
∙ ജിമ്മിൽ വ്യായാമത്തിനിടെ ന്യൂട്രൽ പൊസിഷനിൽ തല വച്ചാൽ പോലും ഭാരം എടുക്കുന്ന സമയത്ത് , തല മുൻപോട്ട് ആഞ്ഞു പോകാം. അത്തരം സാഹചര്യങ്ങൾ ഒഴിവാക്കണം.
∙ കഴുത്തുവേദനയുള്ളവർ പ്രത്യേകമായി ഒഴിവാക്കേണ്ട ചില വ്യായാമങ്ങളുണ്ട്. ബിഹൈൻഡ് ദ നെക് പ്രസ്
(Behind-the-Neck Press) പോലുള്ള, ബാർബെൽ കഴുത്തിനു പിന്നിലേക്ക് ഇറക്കുന്ന തരം വ്യായാമങ്ങൾ കഴുത്തിന് അധിക സമ്മർദം നൽകുന്നതിനാൽ പൂർണമായും ഒഴിവാക്കാം. അതുപോലെ അബ്ഡോമിനൽ ക്രഞ്ചുകൾ ചെയ്യുമ്പോൾ കൈകൊണ്ടു തല വലിച്ചു പിടിക്കുന്ന രീതിയും ഒഴിവാക്കണം.
∙ അതേസമയം, പുറകിലെയും തോളിലെയും ( Back & Shoulder) പേശികളെ ശക്തിപ്പെടുത്തുന്ന Rows , Face Pulls തുടങ്ങിയ വ്യായാമങ്ങൾക്കു കൂടുതൽ പ്രാധാന്യം നൽകണം. ഈ വ്യായാമങ്ങൾ കഴുത്തിനും പുറകു ഭാഗത്തിനും മികച്ച പിന്തുണ നൽകുകയും ശരിയായ പോസ്ചർ നിലനിർത്താൻ സഹായിക്കുകയും ചെയ്യുന്നു.
∙ വർക്കൗട്ടിനു മുൻപും ശേഷവും ആവശ്യമായ സ്ട്രെച്ചിങ് ചെയ്യുന്നതു വളരെ പ്രധാനമാണ്. ഇതു കഴുത്തിലെ പേശികൾക്ക് അയവു നൽകുകയും വേദനയും സമ്മർദവും കുറയ്ക്കുകയും ചെയ്യും.
വിവരങ്ങൾക്കു കടപ്പാട്
ഡോ. അഹമ്മദ് സുബീർ
സീനിയർ കൺസൽറ്റന്റ്
ന്യൂറോളജി & ന്യൂറോ ഇന്റർവെൻഷൻ
പിആർഎസ് ഹോസ്പിറ്റൽ ,
തിരുവനന്തപുരം