ഈ അഞ്ചു തെറ്റുകൾ ഒഴിവാക്കാം, ഡയറ്റിങ് വിജയിപ്പിക്കാം Prevent Diet Failure
Mail This Article
എത്ര മനസ്സർപ്പിച്ചിട്ടും ഡയറ്റിങ് പരാജയപ്പെട്ടുപോകുന്ന അവസ്ഥ നിങ്ങളിൽ പലരും അഭിമുഖീകരിച്ചിട്ടുണ്ടാകും അല്ലേ...? ഡയറ്റിങ് വഴി ഉദ്ദേശിക്കുന്നതു പോലെ വണ്ണം കുറയാതിരിക്കുക, ഇടയ്ക്കു വച്ചു ഡയറ്റ് നിർത്തേണ്ടി വരിക...ഇങ്ങനെ ഡയറ്റിങ് പരാജയപ്പെടാതിരിക്കാൻ ഭക്ഷണകാര്യത്തിൽ ശ്രദ്ധിക്കേണ്ട അഞ്ചു കാര്യങ്ങൾ അറിയാം.
1. ഏതെങ്കിലും ഭക്ഷണത്തിന് അമിത പ്രാധാന്യം?
ഏതെങ്കിലും ഒരു പ്രത്യേക ഭക്ഷണഘടകത്തിനു മാത്രം പ്രാധാന്യം നൽകിയുള്ള ഡയറ്റ് ആണെങ്കിൽ പോഷക അഭാവം കൊണ്ട് ഒരുപാട് ആരോഗ്യപ്രശ്നങ്ങൾ വരാം. ഇതു ഡയറ്റിങ് മുടങ്ങാനിടയാക്കാം. ഉദാഹരണത്തിന്, കാർബോഹൈഡ്രേറ്റ് ഒഴിവാക്കിയുള്ള ഡയറ്റ്. ബി വൈറ്റമിനുകളുടെ ഏറ്റവും മികച്ച സ്രോതസ്സാണ് കാർബോഹൈഡ്രേറ്റുകൾ. ബി കോംപ്ലക്സ് വൈറ്റമിനുകൾ ഉണ്ടെങ്കിൽ മാത്രം നമ്മുടെ ശ രീരത്തിൽ നടക്കുന്ന ചില പ്രക്രിയകളുണ്ട്–ഹോർമോണുകളുടെ പ്രവർത്തനം, എൻസൈമുകളെ ഉപയോഗപ്പെടുത്ത ൽ എന്നിങ്ങനെ. കാർബോഹൈഡ്രേറ്റ് പാടെ ഒഴിവാക്കുമ്പോൾ ഈ പ്രവർത്തനങ്ങൾ താളം തെറ്റുന്നു.
∙ ടിപ്സ്= എല്ലാ പോഷകങ്ങളും സമീകൃതമായി ലഭിക്കുന്ന ഡയറ്റാണു തുടർന്നുകൊണ്ടുപോകാൻ പ്രായോഗികം.
2. കാലറി കണക്കെടുപ്പു മാത്രമായാൽ
എന്തു കഴിക്കാനെടുത്താലും കാലറിയെക്കുറിച്ചു മാത്രം ചിന്തിച്ചാൽ ഭക്ഷണം കഴിക്കൽ ഒരു ദുരനുഭവമായി മാറാം. പായ്ക്കറ്റ് ഭക്ഷണങ്ങളുടെയും മറ്റും കാലറി നിരക്കു കൃത്യമായി അറിയാമെങ്കിലും സാധാരണ നാം കഴിക്കുന്ന ഭക്ഷണങ്ങളിലെ കാലറി അളവു കൃത്യമായി അറിയുക പ്രയാസമാണ്. മാത്രമല്ല പാചകരീതികൾക്കനുസരിച്ചു കാലറിയിൽ ഏറ്റക്കുറച്ചിലുകൾ വരാം. ഇതേ കാരണം കൊണ്ടു തന്നെ മൊബൈൽ ആപ്പുകളിലെ കാലറി കണക്കുകൾ കൃത്യമാകണമെന്നില്ല. തന്മൂലം ഉദ്ദേശിച്ച പോലെ ഭാരം കുറയാതെ വരാം.
∙ ടിപ്സ്-ഒരു ദിവസം എന്തൊക്കെ കഴിക്കുന്നുണ്ട് എന്നു കുറിച്ചുവയ്ക്കുക. പോഷകസമ്പുഷ്ടമായ, വിശപ്പു ശമിപ്പിക്കുന്ന, കാലറി കുറഞ്ഞ പച്ചക്കറികളും പഴങ്ങളും കൂടുതൽ ഉൾപ്പെടുത്താൻ ശ്രമിക്കുക.
3. ഇടയ്ക്കിടെയുള്ള കൊറിക്കൽ
കർശനമായ ഭക്ഷണനിയന്ത്രണം ഉള്ളപ്പോഴാണു ബിഞ്ച് ഈറ്റിങ് അഥവാ ഇടയ്ക്കിടെ ഭക്ഷണം കഴിക്കുന്ന പ്രശ്നം ഉണ്ടാകാറ്. കുറച്ചേ കഴിച്ചുള്ളു എന്ന തോന്നലുള്ളതുകൊണ്ട് ഇടനേരത്ത് എന്തെങ്കിലും കഴിക്കാൻ ശ്രമിക്കും. പക്ഷേ, ജങ്ക് ഫൂഡോ എണ്ണപ്പലഹാരങ്ങളോ പോലെ എളുപ്പം ലഭ്യമാകുന്ന എന്തെങ്കിലുമാകും കഴിക്കുന്നത്. ഇങ്ങനെ കാലറി കൂടിയ ഭക്ഷണം കഴിക്കുന്നതു കാരണം എത്ര ശ്രമിച്ചാലും ഭാരം കുറയണമെന്നില്ല.
∙ ടിപ്സ്–കൃത്യമായി ഒരു ഭക്ഷണക്രമം പ്ലാൻ ചെയ്ത് ദിവസവും കൃത്യസമയത്തു കഴിച്ചുതുടങ്ങിയാൽ വിശപ്പു നിയന്ത്രിക്കാനാകും. കാലറി കുറഞ്ഞതും അതേസമയം വയറു നിറയ്ക്കുന്നതുമായ ഭക്ഷണങ്ങൾ കഴിക്കുക. ഇടനേരത്തു വിശപ്പുതോന്നിയാൽ കഴിക്കാൻ ആരോഗ്യകരമായ സ്നാക്കുകൾ കൈവശം കരുതുക.
4. ഇഷ്ടഭക്ഷണങ്ങളില്ലാതെ വന്നാൽ
ആസ്വദിച്ചു കഴിക്കാൻ ഇഷ്ടമുള്ള ഭക്ഷണങ്ങളൊന്നും ഡയറ്റ് പ്ലാനിലില്ലെങ്കിൽ ഉറപ്പിച്ചു പറയാം, ആ ഡയറ്റ് മുന്നോട്ടു പോകില്ല. മാത്രമല്ല, എന്നും ഒരേതരം വിഭവങ്ങൾ കഴിച്ചുള്ള (ഫിക്സഡ് ഡയറ്റ് പ്ലാൻ) ഡയറ്റിങ് മനസ്സു മടുപ്പിക്കും. വ്യത്യസ്ത വിഭവങ്ങൾക്കു സാധ്യതയുള്ള ഡയറ്റാകും നല്ലത്.
∙ ടിപ്സ്–മിതത്വമാണ് ഇവിടെ സ്വീകരിക്കേണ്ട പോളിസി. ധാന്യങ്ങൾ കൊണ്ടുള്ള ഭക്ഷ്യവസ്തുക്കൾ അളവു കുറച്ച് ഉൾപ്പെടുത്തുക. പകരം പയറു പരിപ്പു വർഗങ്ങൾ കൂടുതലായി കഴിക്കാം. ചോക്‌ലറ്റും മധുരവുമൊക്കെ ഇഷ്ടമാണെങ്കിൽ ഇടയ്ക്ക് ഒരു ചെറു കഷണം രുചിച്ചു നാവിനെ തൃപ്തിപ്പെടുത്താം.
5. കൊതി തടുക്കാൻ വയ്യ
ഡയറ്റ് തുടങ്ങിക്കഴിഞ്ഞാൽ പല ഭക്ഷണങ്ങളോടും വല്ലാത്തൊരു കൊതി (ക്രേവിങ്) തോന്നാം. പ്രത്യേകിച്ച് ബേക്കറി ഭക്ഷണങ്ങളോടും വറപൊരി സ്നാക്കുകളോടും. എപ്പോഴെങ്കിലും ഒരു ക്രേവിങ് വരുമോ എന്നു വിചാരിച്ചു ബാഗിൽ ചോക്‌ലറ്റും കൊണ്ടു നടക്കുന്നവരുണ്ട്. കാലറി തീരെ കുറഞ്ഞ ഡയറ്റുകൾ ചെയ്യുമ്പോഴാണു കൂടുതലും ഇങ്ങനെ സംഭവിക്കുന്നത്.
∙ ടിപ്സ്– ലഭ്യത തടയുകയാണ് ക്രേവിങ് കുറയ്ക്കാനുള്ള വഴി. ഇത്തരം ഭക്ഷണങ്ങൾ വീട്ടിൽ സൂക്ഷിക്കാതിരിക്കുക. ഫൂഡ് ഡെലിവറി ആപ്പുകൾ ഉപയോഗിക്കാതിരിക്കുക. വല്ലാത്ത കൊതി തോന്നുന്ന ഭക്ഷണം ചെറിയ അളവിൽ കഴിച്ചു മനസ്സിനെ തൃപ്തിപ്പെടുത്തുക. പോഷകസമ്പന്നവും സമീകൃതവുമായ ഭക്ഷണരീതി ക്രേവിങ് കുറയ്ക്കും.
വിവരങ്ങൾക്കു കടപ്പാട്
സൗമ്യ എസ്. നായർ
ഡയറ്റീഷൻ, ഇഎസ്ഐസി മോഡൽ & സൂപ്പർ
സ്പെഷാലിറ്റി ഹോസ്പിറ്റൽ, ആശ്രാമം, കൊല്ലം.
കൺവീനർ, ഐഡിഐ
കേരള ചാപ്റ്റർ