ഗ്യാസ് വേണ്ട; രുചിയും ആരോഗ്യവും ചോരാതെ എയർ ഫ്രയറിൽ തയാറാക്കാം സൂപ്പർ സ്നാക്കുകൾ Healthy Air Fryer Snack Recipes

എണ്ണയില്ലാതെ എണ്ണക്കടികൾ തയാറാക്കിയാൽ അതിനു രുചി ഉണ്ടാകുമോ എന്ന ആശങ്കയിലാണോ? ഇതാ, അധിക എണ്ണയും കാലറിയുമില്ലാതെ. എയർ ഫ്രയറിൽ തയാറാക്കാവുന്ന അഞ്ചു സ്നാക്സുകളുടെ പാചകക്കുറിപ്പുകൾ. കാലറിയും കൊഴുപ്പും ഒറ്റയടിക്കു കുറയ്ക്കാവുന്ന ഈ പാചകരീതി ഭാരം കുറയ്ക്കാൻ ആഗ്രഹിക്കുന്നവർക്കും രോഗങ്ങളെ പ്രതി ഭക്ഷണപഥ്യം നോക്കുന്നവർക്കും ഏറെ അനുയോജ്യമാണ്.

​1. ഫ്രഞ്ച് ഫ്രൈസ് (French Fries)
​ചേരുവകൾ:

​ഉരുളക്കിഴങ്ങ് – 2 എണ്ണം

​കുരുമുളകുപൊടി – 1 ടീസ്പൂൺ

​വെളുത്തുള്ളി– 3 അല്ലി (ചതച്ചത്/പേസ്റ്റ്)

​ഉപ്പ്– 1/2 ടീസ്പൂൺ

​എണ്ണ– 1 ടേബിൾ സ്പൂൺ
​തയാറാക്കുന്ന വിധം:

​ഉരുളക്കിഴങ്ങു തൊലി കളഞ്ഞു കഴുകി നീളത്തിൽ മുറിക്കുക. നന്നായി കഴുകി വെള്ളം ഊറ്റിക്കളയുക. ​ഒരു ബൗളിലേക്ക് മാറ്റിയ ശേഷം അൽപം എണ്ണയും കുരുമുളകുപൊടിയും ഉപ്പും ഇട്ടു നന്നായി മിക്സ് ചെയ്യുക. ​എയർ ഫ്രയർ പ്രീ ഹീറ്റ് ചെയ്ത് 10 മിനിറ്റ് നേരം 180°C വെക്കുക. ​എയർ ഫ്രയർ ബാസ്ക്കറ്റിലേക്ക് ഉരുളക്കിഴങ്ങ് മാറ്റിയ ശേഷം 190°C-ൽ 15 മിനിറ്റ് ഫ്രൈ ചെയ്യുക. അതിനുശേഷം ചതച്ച വെളുത്തുള്ളി ചേർത്ത് അഞ്ചു മിനിറ്റു കൂടി ഫ്രൈ ചെയ്താൽ ഫ്രഞ്ച് ഫ്രൈസ് റെഡി.

​2.  ഏത്തപ്പഴം ഫ്രൈ (Air Fry Banana Fry)
​ചേരുവകൾ:

​ഏത്തപ്പഴം – 2 എണ്ണം

​നെയ്യ് – 1 ടേബിൾ സ്പൂൺ

​തയാറാക്കുന്ന വിധം:

​ഏത്തപ്പഴം നീളത്തിൽ ചെറിയ കഷ്ണങ്ങളായി മുറിക്കുക. ​നെയ്യ് കൊണ്ട് ഈ പഴത്തിന് മുകളിൽ ബ്രഷ് ചെയ്യുക.

​190°C-ൽ 10 മിനിറ്റ് ഫ്രൈ ചെയ്ത ശേഷം മറിച്ച് ഇട്ട് വീണ്ടും അഞ്ചു മിനിറ്റു കൂടി ഫ്രൈ ചെയ്താൽ ബനാന ഫ്രൈ റെഡി.

​3. ഒനിയൻ റിങ്‌സ് (Air Fry Onion Rings)

ചേരുവകൾ:

​മൈദ – 1 കപ്പ്
​കാശ്മീരി ചില്ലി പൗഡർ – 2 ടീസ്പൂൺ
​മുട്ട – 2 എണ്ണം
​പൊടിച്ച ബ്രെഡ് (Breadcrumbs) – 2 കപ്പ്
​സവാള – 3 വലുത്
​പാൽ – 1 ടേബിൾ സ്പൂൺ
​ഒലിവ് ഓയിൽ – 1 ടേബിൾ സ്പൂൺ

​തയാറാക്കുന്ന വിധം:

​മൈദ, ഉപ്പ്, കാശ്മീരി ചില്ലി പൗഡർ എന്നിവ ഒരു ബൗളിലേക്ക് ഇട്ട് നന്നായി യോജിപ്പിക്കുക. ​മുട്ട ഒരു ബൗളിൽ നന്നായി പതപ്പിച്ച് 1 ടേബിൾ സ്പൂൺ പാൽ ചേർത്ത് മാറ്റിവെക്കുക. ​ബ്രെഡ് പൊടിയിൽ ഒലിവ് ഓയിൽ ചേർത്ത് കട്ട കെട്ടാതെ യോജിപ്പിക്കുക. ​ഉള്ളി തൊലി കളഞ്ഞ് 1/2 ഇഞ്ച് കനത്തിൽ വട്ടത്തിൽ മുറിച്ച് ഓരോന്നായി വേർതിരിക്കുക. എയർ ഫ്രയർ 180°C-ൽ പ്രീ ഹീറ്റ് ചെയ്യുക. ​ഓരോ റിങ്ങും മൈദയിലും, മുട്ടയിലും, ബ്രെഡ് പൊടിയിലും മുക്കി രണ്ട് ലെയർ ആയി എയർ ഫ്രയർ ബാസ്ക്കറ്റിൽ നിരത്തുക. 180°C-ൽ 10 മുതൽ 15 മിനിറ്റ് വരെ ഫ്രൈ ചെയ്യുക.

​4. മധുരക്കിഴങ്ങ് ചിപ്സ് (Sweet Potato Chips)

​ചേരുവകൾ:

​മധുരക്കിഴങ്ങ് – 1 വലുത്
​എണ്ണ – 1 ടേബിൾ സ്പൂൺ
​ഉപ്പ് – 1/2 ടീസ്പൂൺ
​കുരുമുളകുപൊടി – 3/4 ടീസ്പൂൺ

​തയാറാക്കുന്ന വിധം:

​മധുരക്കിഴങ്ങ് കഴുകി ചെറിയ വട്ടത്തിൽ ചിപ്സിനു മുറിക്കുന്നത് പോലെ മുറിക്കുക. ​തണുത്ത വെള്ളത്തിലിട്ട് 15 മിനിറ്റ് വെച്ച ശേഷം ഒരു ടവ്വലിൽ ഇട്ട് നന്നായി ഉണക്കിയെടുക്കുക. ​ഒരു ബൗളിൽ എണ്ണ, ഉപ്പ്, കുരുമുളകുപൊടി എന്നിവ തയ്യാറാക്കി വെച്ചിരിക്കുന്ന മധുരക്കിഴങ്ങുമായി ചേർത്ത് യോജിപ്പിക്കുക. ​ഓരോ ലെയറായി എയർ ഫ്രയർ ബാസ്ക്കറ്റിൽ വെക്കുക. 190°C-ൽ ഏകദേശം 20 മിനിറ്റ് നേരം ക്രിസ്പിയായി ബ്രൗൺ നിറം ആകുന്നത് വരെ ഫ്രൈ ചെയ്യുക. ഇടയ്ക്ക് ഒന്ന് ഇളക്കി കൊടുക്കുന്നത് ഒരേപോലെ ഫ്രൈ ആകാൻ സഹായിക്കും.

​5. തക്കാളി ചട്ണി (Tomato Chutney)

​ചേരുവകൾ:

​ചെറിയ ഉള്ളി – 5 എണ്ണം

​തക്കാളി – 4 എണ്ണം

​സവാള – 1 എണ്ണം

​വെളുത്തുള്ളി – 3 അല്ലി

​പച്ചമുളക് – 2 എണ്ണം

​ഉപ്പ് – ആവശ്യത്തിന്

​ഉണക്കമുളക് – 4 എണ്ണം

​തയാറാക്കുന്ന വിധം:

​തക്കാളി, ഉണക്കമുളക്, വെളുത്തുള്ളി, ചെറിയ ഉള്ളി, സവാള എന്നിവ 150°C-ൽ 3 മിനിറ്റ് വാട്ടിയെടുക്കുക. ​ഉണക്കമുളക് മാറ്റി വെച്ച ശേഷം വീണ്ടും 180°C-ൽ 2 മിനിറ്റ് കൂടി വാട്ടിയെടുക്കുക.​ഇതിനു ശേഷം മിക്സിയുടെ ജാറിലേക്ക് മാറ്റി ഉപ്പും അല്പം വെള്ളവും ചേർത്ത് നന്നായി അരച്ചെടുക്കുക. ​ഇതിലേക്ക് അല്പം കടുക് താളിച്ച് കറിവേപ്പിലയും ഇട്ടാൽ തക്കാളി ചട്ണി റെഡി.

ഡോ. അനിതാ മോഹൻ
പോഷകാഹാര വിദഗ്ധ, തിരുവനന്തപുരം