Monday 18 October 2021 01:06 PM IST : By സ്വന്തം ലേഖകൻ

‘തെറ്റിനെക്കുറിച്ച്‌ മാത്രം പറയുക; അതുവരെയുള്ള ഹിസ്റ്ററി മുഴുവൻ ഒച്ചയിട്ട്‌ പറഞ്ഞാൽ കുട്ടിയ്ക്ക്‌ അതൊരു ‘ഒച്ച’ മാത്രമാവും’: ശ്രദ്ധേയമായി കുറിപ്പ്

drshiimmkidds

"കുഞ്ഞുങ്ങൾക്ക് തെറ്റ്‌ മനസ്സിലാവുകയും അവരത്‌ തിരുത്തി പിന്നീടൊരിക്കലും ആവർത്തിക്കാതിരിക്കുകയുമാണ് വേണ്ടത്. അതിനവരെ തല്ലുകയോ ചീത്ത വിളിക്കുകയോ ഒന്നുമല്ല മാർഗം. തല്ലിയാൽ അവർക്ക്‌ നമ്മളോട്‌ വെറുപ്പ്‌ തോന്നും, ആ വേദന മാറുന്നത്‌ വരെ മാത്രമൊരു സങ്കടവും കാണും. വേറെ പ്രത്യേകിച്ച്‌ കാര്യമൊന്നും കാണില്ല. മറിച്ച്‌, അവർ തെറ്റ്‌ ചെയ്‌താൽ അവർക്കിഷ്‌ടമുള്ള കാര്യങ്ങൾ കൃത്യമായി പറഞ്ഞ് ബോധ്യപ്പെടുത്തി നിഷേധിക്കാം. എത്ര വാശി പിടിച്ചാലും അത്‌ നടത്തി കൊടുക്കാതിരിക്കാം. വളരെ ക്ഷമയോടെ അവർ ചെയ്‌ത തെറ്റ്‌ അവർക്ക് ബോധ്യമാവുന്നത് വരെ വിശദീകരിച്ച്‌ കൊടുക്കാം, ആവർത്തിക്കാതിരിക്കാൻ പറയാം."- പാരന്റിങ്ങിനെ കുറിച്ച് ഡോക്ടർ ഷിംന അസീസ് പങ്കുവച്ച കുറിപ്പ് ശ്രദ്ധേയമായി. 

ഡോക്ടർ ഷിംന അസീസ് പങ്കുവച്ച കുറിപ്പ് വായിക്കാം; 

വളരെ അപൂർവമായി മാത്രം മക്കളെ വഴക്ക്‌ പറയുന്നൊരമ്മയാണ്‌. ആണ്ടിനും സംക്രാന്തിക്കുമൊക്കെ മാത്രമുള്ള ആ ഒച്ചയിടൽ പോലും അവരുടെ ഗ്രാന്റ്‌പാരന്റ്‌സിന്‌ അക്ഷന്തവ്യമായ തെറ്റാണ്‌. അതിനുള്ളത്‌ എനിക്ക്‌ വേറെ കിട്ടാറുമുണ്ട്‌. അങ്ങനെ കാര്യങ്ങൾ കൈവിട്ട് പോയ സമയങ്ങൾ പലപ്പോഴും അവർ ചെയ്ത തെറ്റ് എന്തെന്ന് അഡ്രസ്സ് ചെയ്യുന്നതിനേക്കാൾ, എന്റെ ദേഷ്യം മാറാനാണ്‌ ചെയ്ത് പോയത് എന്ന്‌ തോന്നിയിട്ടുണ്ട്‌. എന്ത് മാത്രം ഇൻസൽറ്റായിരിക്കാം അവർക്ക്‌  അന്നേരം തോന്നുന്നത്‌. ഈ സംഭവങ്ങൾ നടക്കുന്നത് മൂന്നാമതൊരാളുടെ സാന്നിധ്യത്തിലാണെങ്കിൽപ്പിന്നെ പറയുകയും വേണ്ട!! എത്ര മാത്രം അവർക്ക്‌ വേദനിക്കുന്നുണ്ടാകാം. 

കുഞ്ഞുങ്ങൾക്ക് തെറ്റ്‌ മനസ്സിലാവുകയും അവരത്‌ തിരുത്തി പിന്നീടൊരിക്കലും ആവർത്തിക്കാതിരിക്കുകയുമാണ് വേണ്ടത്. അതിനവരെ തല്ലുകയോ ചീത്ത വിളിക്കുകയോ ഒന്നുമല്ല മാർഗം. തല്ലിയാൽ അവർക്ക്‌ നമ്മളോട്‌ വെറുപ്പ്‌ തോന്നും, ആ വേദന മാറുന്നത്‌ വരെ മാത്രമൊരു സങ്കടവും കാണും. വേറെ പ്രത്യേകിച്ച്‌ കാര്യമൊന്നും കാണില്ല. മറിച്ച്‌, അവർ തെറ്റ്‌ ചെയ്‌താൽ അവർക്കിഷ്‌ടമുള്ള കാര്യങ്ങൾ കൃത്യമായി പറഞ്ഞ് ബോധ്യപ്പെടുത്തി നിഷേധിക്കാം. എത്ര വാശി പിടിച്ചാലും അത്‌ നടത്തി കൊടുക്കാതിരിക്കാം. വളരെ ക്ഷമയോടെ അവർ ചെയ്‌ത തെറ്റ്‌ അവർക്ക് ബോധ്യമാവുന്നത് വരെ വിശദീകരിച്ച്‌ കൊടുക്കാം, ആവർത്തിക്കാതിരിക്കാൻ പറയാം. പ്രത്യേകം ശ്രദ്ധിക്കേണ്ട കാര്യം, ആ തെറ്റിനെക്കുറിച്ച്‌ മാത്രം പറയുക എന്നതാണ്‌. അത്‌ വരെയുള്ള ഹിസ്‌റ്ററി മുഴുവൻ ഒച്ചയിട്ട്‌ പറഞ്ഞാൽ കുട്ടിക്ക്‌ അതൊരു 'ഒച്ച' മാത്രമാവും.

കുട്ടികളെ പറഞ്ഞ്‌ മനസ്സിലാക്കിയതിന്റെ കടകവിരുദ്ധമായ കാര്യങ്ങൾ മറ്റ്‌ രക്ഷിതാക്കൾ നടത്തി കൊടുത്ത്‌ കുഞ്ഞിനെ കൺഫ്യൂസ്‌ ചെയ്യിക്കാതെ നോക്കുക. അങ്ങനെയായാൽ പിന്നെ കുഞ്ഞിന്‌ അവർ നല്ലവരും നമ്മൾ മോശവുമായിത്തീരും. പറഞ്ഞ്‌ കൊടുക്കുന്ന നല്ല കാര്യങ്ങൾ നമ്മൾ സ്വയം ചെയ്‌ത്‌ കാണിച്ച്‌ അവർക്ക്‌ മാതൃകയാവാം.

എല്ലാത്തിലുമുപരി നല്ലത്‌ കണ്ടാൽ നല്ലതാണെന്ന്‌ പറയുകയും കുഞ്ഞിനെ അനുമോദിക്കുകയും ചെയ്യുക. അല്ലാതെ വായ തുറന്നാൽ കുഞ്ഞിന്റെ കുറ്റം മാത്രം പറയുന്ന രക്ഷിതാവിന്റെ വാക്കുകൾക്കും കുട്ടി വലിയ വിലയൊന്നും കൊടുത്തെന്ന്‌ വരില്ല. ഒരിക്കലും മറ്റു കുട്ടികളുമായി താരതമ്യം ചെയ്യുകയുമരുത്‌. കൃത്യമായ നിയമങ്ങളും നിയന്ത്രണങ്ങളും കൈവിടാതെ കുട്ടികളെ സ്‌നേഹിച്ച്‌ കൊണ്ടേയിരിക്കുക. അവരോട്‌ നിറയേ സംസാരിക്കുക. പണ്ടാരാണ്ട്‌ പറഞ്ഞത്‌ പോലെ, പാരന്റിംഗ്‌ ഈസ്‌ ആൻ ആർട്ട്‌. രക്ഷകർതൃത്വം ഒരു കലയാണ്‌. അതിന്‌ ജന്മം നൽകണമെന്ന്‌ പോലുമില്ല.

Tags:
  • Mummy and Me
  • Parenting Tips