ഇനി വെജിറ്റേറിയന്സിനും കേക്ക് കഴിക്കാം ..തയാറാക്കാം എഗ്ഗ്‍ലെസ്സ് റെഡ് വെൽവെറ്റ് കേക്ക്

ആവശ്യമായ ചേരുവകൾ

1. പാൽ – ഒരു കപ്പ്

 വിനാഗിരി – ഒരു വലിയ സ്പൂൺ

2. മൈദ – ഒന്നരക്കപ്പ്

 ബേക്കിങ് പൗഡർ – ഒരു ചെറിയ സ്പൂൺ

 ബേക്കിങ് സോഡ– അര ചെറിയ സ്പൂൺ

 ഉപ്പ് – ഒരു നുള്ള്

3. വെണ്ണ ഉരുക്കിയത് – ഒരു കപ്പിന്റെ മൂന്നിലൊന്ന്

 പഞ്ചസാര – ഒരു കപ്പ്

  വനില എസ്സൻസ് – ഒരു ചെറിയ സ്പൂൺ

4. റെഡ് ഫൂഡ് കളർ – ഒരു ചെറിയ സ്പൂൺ

 കൊക്കോ പൗഡർ – ഒരു വലിയ സ്പൂൺ

ക്രീംചീസ് ഫ്രോസ്റ്റിങ്ങിന്

5. വിപ്പിങ് ക്രീം – ഒരു കപ്പ്

6. പഞ്ചസാര പൊടിച്ചത് – ഒന്നരക്കപ്പ്

 വനില എസ്സൻസ് – ഒരു ചെറിയ സ്പൂൺ

 ക്രീംചീസ് – 200 ഗ്രാം, മൃദുവാക്കിയത്

പാകം ചെയ്യുന്ന വിധം

∙ അവ്ൻ 180 ഡിഗ്രി സെൽഷ്യസിൽ ചൂടാക്കിയിടുക.

∙ കേക്ക് പാനിൽ മയം പുരട്ടി വയ്ക്കണം.

∙ പാലിൽ വിനാഗിരി ചേർത്തിളക്കി വയ്ക്കണം. ഇതു പിരിഞ്ഞു മോരു പോലെയാകും.

∙ രണ്ടാമത്തെ ചേരുവ യോജിപ്പിച്ച് ഇടഞ്ഞു വയ്ക്കുക.

∙ മോരിലേക്കു മൂന്നാമത്തെ ചേരുവ ചേർത്തു നന്നായി അടിച്ചു യോജിപ്പിക്കണം.

∙ ഫൂഡ്കളറും കൊക്കോപൗഡറും യോജിപ്പിച്ചു പേസ്റ്റാക്കിയതു മോരു മിശ്രിതത്തിൽ ചേർത്ത് അടിക്കുക. 

∙ ഇതിലേക്കു മൈദ മിശ്രിതം ചേർത്തു മെല്ലേ യോജിപ്പിക്കുക.

∙ തയാറാക്കിയ പാനിൽ ഒഴിച്ചു ചൂടാക്കിയിട്ടിരിക്കുന്ന അവ്നിൽ വച്ച് 25-30 മിനിറ്റ് ബേക്ക് ചെയ്യുക.

∙ ചൂടാറാനായി വയർ റാക്കിലേക്കു മാറ്റിവയ്ക്കുക.

∙ വിപ്പിങ് ക്രീം ഐസിനു മുകളില്‍ വച്ചു നന്നായി അടിച്ചു കുന്നുകൾ പോലെ പൊങ്ങി വരുന്ന പരുവമാക്കണം,

∙ മറ്റൊരു ബൗളിൽ ആറാമത്തെ ചേരുവ അടിച്ചു യോജിപ്പിച്ച ശേഷം വിപ്പിങ് ക്രീമിലേക്കു മെല്ലേ ചേർത്തു യോജിപ്പിക്കുക.

∙ കേക്ക് വട്ടത്തിൽ രണ്ടായി മുറിച്ചു രണ്ടു ലെയറുകൾക്കിടയില്‍ തയാറാക്കിയ ഫ്രോസ്റ്റിങ് നിരത്തി, കേക്ക് മുഴുവനായും ഫ്രോസ്റ്റിങ് കൊണ്ടു പൊതിയണം.