ഒന്നൊന്നര ടേസ്റ്റാണ് ഇതിന്, എളുപ്പത്തിൽ റെഡിയാക്കാം ജിൻജർബ്രെഡ് മിനി ബണ്ട് കേക്ക്

ആവശ്യമായ ചേരുവകൾ

1. മൈദ – ഒന്നരക്കപ്പ്

 ബേക്കിങ് പൗഡർ – ഒന്നര ചെറിയ സ്പൂൺ

 ബേക്കിങ് സോഡ – അര ചെറിയ സ്പൂൺ

 ഉപ്പ് – കാൽ ചെറിയ സ്പൂൺ

 ജിൻജർ പൗഡർ – ഒരു ചെറിയ സ്പൂൺ

 കറുവാപ്പട്ട പൊടിച്ചത് – ഒരു ചെറിയ സ്പൂൺ

 ഏലയ്ക്ക പൊടിച്ചത് – കാൽ ചെറിയ സ്പൂൺ

 ജാതിക്ക പൊടിച്ചത് – കാല്‍ ചെറിയ സ്പൂൺ

2. വെണ്ണ – അരക്കപ്പ്

 ഡാർക്ക് ബ്രൗൺ ഷുഗർ – അരക്കപ്പ്

 ലൈറ്റ് ബ്രൗൺ ഷുഗർ – കാല്‍ കപ്പ്

3. മുട്ട – ഒന്ന്

4. വനില എസ്സൻസ് – ഒരു ചെറിയ സ്പൂൺ

5. വെള്ളം – അരക്കപ്പ്

ഷുഗർ ഗ്ലേസിന്

6. ഐസിങ് ഷുഗര്‍ – നാലു കപ്പ്

 പാൽ – അഞ്ചു വലിയ സ്പൂൺ

 വനില എസ്സൻസ് – ഒരു ചെറിയ സ്പൂൺ

പാകം ചെയ്യുന്ന വിധം 

∙ അവ്ൻ 180 ഡിഗ്രി സെൽഷ്യസിൽ ചൂടാക്കിയിടുക.

∙ മിനി ബണ്ട് പാനില്‍ മയം പുരട്ടി വയ്ക്കണം.

∙ ഒന്നാമത്തെ ചേരുവ യോജിപ്പിച്ച് ഇടഞ്ഞു വയ്ക്കുക.

∙ മറ്റൊരു ബൗളിൽ വെണ്ണയും പഞ്ചസാരയും ചേർത്ത് അടിക്കണം. ഇതിലേക്കു മുട്ട ചേർത്തടിച്ച ശേഷം വനില എസ്സൻസും ചേർത്തു യോജിപ്പിക്കുക.

∙ ഇതിലേക്കു മൈദ മിശ്രിതം ചേർത്തു മെല്ലേ യോജിപ്പിക്കുക.

∙ വെള്ളവും ചേർത്തു യോജിപ്പിച്ച ശേഷം തയാറാക്കിയ പാനിൽ ഒഴിച്ചു ചൂടാക്കിയിട്ടിരിക്കുന്ന അവ്നിൽ വച്ച് 20-25 മിനിറ്റ് ബേക്ക് ചെയ്യുക.

∙ അവ്നില്‍ നിന്നു പുറത്തെടുത്ത് ചൂടാറിയ ശേഷം കേക്കുകള്‍ മോൾഡിൽ നിന്നെടുത്തു വിളമ്പാനുള്ള പ്ലേറ്റിലാക്കി മുകളിൽ ഷുഗർ ഗ്ലേസ് ഒഴിക്കണം.

∙ ഗ്ലേസ് തയാറാക്കാൻ ആറാമത്തെ ചേരുവ ഒരു ബൗളിലാക്കി നന്നായി യോജിപ്പിക്കുക. ഇതു ചൂടാറിയ കേക്കുകളുടെ മുകളിൽ ഒഴിക്കാം.

∙ ഏകദേശം ആറു കേക്ക് ലഭിക്കും.