മീൻ അച്ചാർ
1.മീൻ – 450 ഗ്രാം
2.മഞ്ഞൾപ്പൊടി – ഒരു നുള്ള്
ഉപ്പ് – പാകത്തിന്
3.എള്ളെണ്ണ – പാകത്തിന്
4.മഞ്ഞൾപ്പൊടി – കാൽ ചെറിയ സ്പൂൺ
വറ്റൽമുളക് – 50 ഗ്രാം, അരി കളഞ്ഞത്
ജീരകം – ഒരു വലിയ സ്പൂൺ
കുരുവില്ലാത്ത ഉണക്കമുന്തിരി – 110 ഗ്രാം
കസ്കസ് മെല്ലേ വറുത്തത് – രണ്ടു വലിയ സ്പൂൺ
5.വിനാഗിരി – പാകത്തിന്
6.വെളുത്തുള്ളി – രണ്ടു കുടം
7.ഇഞ്ചി – ആറിഞ്ച് കഷണം
8.പച്ചമുളക് – 20 ഗ്രാം, വട്ടത്തിലരിഞ്ഞത്
9.വാളൻപുളി – ഒരു നാരങ്ങാ വലുപ്പം
10.പഞ്ചസാര – ഒരു വലിയ സ്പൂൺ
11.കടുക്പരിപ്പ് – രണ്ടു വലിയ സ്പൂൺ
പാകം ചെയ്യുന്ന വിധം
∙മീനിൽ മഞ്ഞൾപ്പൊടിയും ഉപ്പും പുരട്ടി ഇളം ബ്രൗൺനിറത്തിൽ കരുകരുപ്പായി വറുത്തു മാറ്റി വയ്ക്കുക.
∙നാലാമത്തെ ചേരുവ വിനാഗിരി ചേർത്തു വെവ്വേറെ അരച്ചു വയ്ക്കണം.
∙വെളുത്തുള്ളി തൊലി കളഞ്ഞു പകുതി ചതയ്ക്കുക. ബാക്കി പൊടിയായി അരിയണം. ഇഞ്ചിയുടെ പകുതി പൊടിയായി അരിഞ്ഞ ശേഷം ബാക്കി ചതച്ചു വയ്ക്കണം.
∙മൺചട്ടിയിൽ എണ്ണ ചൂടാക്കി അരപ്പും ചതച്ചു വച്ച ഇഞ്ചിയും വെളുത്തുള്ളിയും ചേർത്തു തടി സ്പൂൺ കൊണ്ടു വഴറ്റുക.
∙ഇതിലേക്കു വാളൻപുളി വിനാഗിരി ചേർത്തു പിഴിഞ്ഞതും ഉപ്പും പഞ്ചസാരയും ചേർത്തു തിളപ്പിക്കണം.
∙അരിഞ്ഞു വച്ചിരിക്കുന്ന ഇഞ്ചിയും വെളുത്തുള്ളിയും പച്ചമുളകും കടുക്പരിപ്പും ചേർത്തു ചെറുതീയിൽ 10 മിനിറ്റ് വയ്ക്കുക.
∙അടുപ്പിൽ നിന്നു വാങ്ങി ചൂടാറിയ ശേഷം മീൻ കഷണങ്ങൾ ചേർത്തിളക്കുക.
