തയാറാക്കിയത്: മെർലി എം. എൽദോ, ഫോട്ടോ: സരുൺ മാത്യു
ഫില്ലിങ്ങിന്
1. നെയ്യ് – രണ്ടു വലിയ സ്പൂൺ
2. കശുവണ്ടിപ്പരിപ്പ് – ഒരു ചെറിയ സ്പൂൺ
3. ഉണക്കമുന്തിരി – ഒരു ചെറിയ സ്പൂൺ
4. പഞ്ചസാര – നാലു വലിയ സ്പൂൺ
വെള്ളം/പാൽ – ഒരു വലിയ സ്പൂൺ
5. തേങ്ങ ചുരണ്ടിയത് – രണ്ടു കപ്പ്
6. ഏലയ്ക്ക പൊടിച്ചത് – ഒരു നുള്ള്
മാവിന്
7. മൈദ – കാൽ കപ്പ്
മുട്ട – ഒന്നിന്റെ കാൽ ഭാഗം
ഉപ്പ് – പാകത്തിന്
മഞ്ഞൾപ്പൊടി, ഏലയ്ക്കാപ്പൊടി – ഓരോ നുള്ള്
8. വെള്ളം – പാകത്തിന്
പാകം ചെയ്യുന്ന വിധം
∙ പാനിൽ നെയ്യ് ചൂടാക്കി കശുവണ്ടിപ്പരിപ്പു ചേർത്ത് ഏതാനും സെക്കൻഡ് ഇളക്കിയ ശേഷം ഉണക്കമുന്തിരിയും ചേർത്തു വറുത്തു കോരുക.
∙ അതേ പാനിൽ തന്നെ പഞ്ചസാര എടുത്ത് വെള്ളം/പാൽ ചേർത്തിളക്കണം. പഞ്ചസാര മുഴുവൻ അലിഞ്ഞ ശേഷം തേങ്ങ ചേർത്ത് ഇടത്തരം തീയിൽ വയ്ക്കുക.
∙ നന്നായി വരണ്ടു വരുമ്പോൾ ഏലയ്ക്ക പൊടിച്ചതും വറുത്തു വച്ചിരിക്കുന്ന മിശ്രിതവും ചേർത്തു നന്നായി ഇളക്കി വാങ്ങുക. ഫില്ലിങ് തയാർ.
∙ ഏഴാമത്തെ ചേരുവ ഒരു ബൗളിലാക്കി പാകത്തിനു വെള്ളം ചേർത്തു കട്ടകെട്ടാതെ ദോശമാവിനെക്കാൾ അയവുള്ള മാവു തയാറാക്കണം.
∙ നോൺസ്റ്റിക് പാൻ ചൂടാക്കി ഓരോ തവി വീതം മാവു കോരിയൊഴിച്ചു വട്ടത്തിൽ പരത്തി ചെറുതീയിൽ വേവിക്കുക.ഒരു വശം വേവുമ്പോൾ ഒരു പാത്രത്തിലേക്കു മാറ്റി ഇതിന്റെ ഒരറ്റത്തു ഫില്ലിങ് വച്ച് അമർത്തി ചുരുട്ടിയെടുക്കണം. ഇങ്ങനെ മുഴുവൻ മാവും ഫില്ലിങ്ങും വച്ചു ചെയ്യുക.
