ഗാര്‍ലിക് ചിക്കൻ റോസ്‌റ്റ്
1.ചിക്കൻ – ഒരു കിലോ
2.മഞ്ഞൾപ്പൊടി – അര ചെറിയ സ്പൂൺ
മുളകുപൊടി – അര ചെറിയ സ്പൂൺ
ഉപ്പ് – പാകത്തിന്
നാരങ്ങാനീര് – ഒരു നാരങ്ങയുടേത്
3.കുരുമുളക് – ഒരു വലിയ സ്പൂൺ
മല്ലി – ഒരു വലിയ സ്പൂൺ
പെരുംജീരകം – ഒരു വലിയ സ്പൂൺ
ഏലയ്ക്ക – മൂന്ന്
ഗ്രാമ്പൂ – മൂന്ന്
കറുവാപ്പട്ട – ഒരിഞ്ചു കഷണം
4.കശ്മീരി മുളകുപൊടി – ഒരു വലിയ സ്പൂൺ
മുളകുപൊടി – അര വലിയ സ്പൂൺ
5.എണ്ണ – മൂന്നു വലിയ സ്പൂൺ
6.സവാള – രണ്ട്
7.വെളുത്തുള്ളി – രണ്ടു കുടം, പൊടിയായി അരിഞ്ഞത്
കറിവേപ്പില – രണ്ടു തണ്ട്
ഉപ്പ് – പാകത്തിന്
7.മല്ലിയില, പൊടിയായി അരിഞ്ഞത് – രണ്ടു വലിയ സ്പൂൺ
പാകം ചെയ്യുന്ന വിധം
∙ചിക്കൻ അല്പം വലിയ കഷണങ്ങളാക്കി മുറിച്ച് രണ്ടാമത്തെ ചേരുവ ചേര്‍ത്തു യോജിപ്പിച്ച് അരമണിക്കൂർ വയ്ക്കുക.
∙മൂന്നാമത്തെ ചേരുവ മിക്സിയിൽ തരുതരുപ്പായി പൊടിക്കണം.
∙ഇതിലേക്കു നാലാമത്തെ ചേരുവയും ചേർത്തു മാറ്റി വയ്ക്കുക.
∙പാനിൽ എണ്ണ ചൂടാക്കി സവാള വഴറ്റണം.
∙ഗോൾഡൻ നിറമാകുമ്പോൾ വെളുത്തുള്ളിയും കറിവേപ്പിലയും പാകത്തിനുപ്പും ചേർത്തു വഴറ്റുക.
∙പുരട്ടി വച്ചിരിക്കുന്ന ചിക്കൻ ചേർത്ത് അഞ്ചു മിനിറ്റു വഴറ്റി മൂടിവച്ചു വേവിക്കുക.
∙മുക്കാൽ വേവാകുമ്പോൾ പൊടിച്ചു വച്ച കൂട്ടു ചേർത്തിളക്കണം.
∙പാകത്തിന് വെള്ളം ഒഴിച്ചു പച്ചമണം മാറുന്നതു വരെ വഴറ്റണം.
∙മസാല ചിക്കനിൽ പുരണ്ടിരിക്കുന്ന പരുവത്തിൽ വാങ്ങി മല്ലിയില അരിഞ്ഞതു കൊണ്ടലങ്കരിച്ചു വിളമ്പാം.
